Цените на лебот и на останатите производи од мелничарско-пекарската индустрија остануваат стабилни и во наредниот период нема да има нивно зголемување.
Ова е главниот заклучок од денешната средба на заменик-министерот за економија и труд, Марјан Ристески, и директорот на Државниот пазарен инспекторат, Влатко Стојкоски, со претставниците на трите најголеми стопански комори од овој сектор.
Средбата беше организирана како одговор на неодамнешните најави во јавноста за евентуален нов бран поскапувања на основните прехранбени продукти. По деталната дискусија со претставниците на индустријата, констатирано е дека во најголем дел цените се непроменети и дека постои заедничка согласност за одржување на фер цени кои ќе бидат прифатливи за стандардот на граѓаните.
Заменик-министерот Ристески истакна дека надлежните институции се свесни за економските предизвици со кои се соочуваат компаниите, пред сè поради растот на цените на енергенсите. Тој нагласи дека државата нема намера да врши непотребна интервенција на пазарот, но потенцираше дека приоритет останува заштитата на потрошувачите од нереални и неосновани поскапувања кои би создале дополнителен товар врз семејните буџети.
Од Министерството за економија и труд најавија дека во соработка со Државниот пазарен инспекторат ќе продолжат будно да ја следат состојбата на терен. Доколку се утврди дека се создава вештачки притисок врз цените без објективна економска основа, државата е подготвена соодветно да реагира за да ја осигура стабилноста на пазарот и социјалната сигурност на населението.
