Археолошките истражувања кои НУ Национален археолошки музеј ги започна на 28 октомври резултираа со потврда на историските податоци за постоење мозаик на локалитетот Пеленица во близина на скопската населба Драчево. За време на ископувањата е откриен доцноантички полихромен мозаик изработен во техниката opus tessellatum, како и керамички артефакти и монета кои датираат од истиот временски период.
Откриениот дел од мозаикот засега е регистриран на периферните делови од истражуваната површина, а финалните анализи треба да го дефинираат неговиот целосен обем и архитектонскиот контекст на објектот. Проектот се реализира со финансиска поддршка од Општина Кисела Вода, во соработка со НУ Конзерваторски центар - Скопје и со поддршка од црквата „Св. Спас“ во Драчево.
Археолошкиот локалитет го посетија градоначалничката на Општина Кисела Вода, Бети Стаменкоска Трајкоска, директорката на Националниот археолошки музеј, Магдалена Манаскова, и пратеничката Велика Стојкова Серафимовска.
Стручната екипа ја предводи м-р Радомир Ивановиќ, виш кустос во Музејот, заедно со археолози и конзерватори од Археолошкиот музеј, Конзерваторскиот центар - Скопје и Институтот за старословенска култура - Прилеп. Според најавите, на локалитетот следува спроведување геофизички истражувања во дворот на манастирскиот комплекс, додека за следната година е планирана реализација на соодветни конзерваторски зафати за заштита на пронајдоците. Градоначалникот на Град Скопје, Орце Ѓорѓиевски, најави спроведување на нова мерка за поддршка при решавањето на станбеното прашање за младите семејства. Согласно донесената одлука, младите брачни парови на возраст до 40 години, како и самохраните родители кои градат сопствен дом во опфатот на Генералниот урбанистички план, ќе бидат целосно ослободени од плаќање на делот од надоместокот за уредување на градежно земјиште што му припаѓа на Градот, што изнесува 60 проценти од вкупните комуналии.
Ѓорѓиевски посочи дека овој модел претходно е успешно воведен во Општина Кисела Вода, а сега се пренесува како системска мерка на ниво на Град Скопје. Со намалувањето на финансискиот товар за 60 проценти при издавањето одобренија за градење, градот има за цел да им овозможи на младите семејства полесен почеток и пренасочување на заштедените средства кон уредување на домот.
За обезбедување максимален ефект од оваа мерка, градоначалникот упати апел до сите градоначалници на скопските општини да се приклучат кон иницијативата преку ослободување и од преостанатите 40 проценти од надоместокот кои им припаѓаат на локалните општини. Доколку општинските совети ја прифатат иницијативата, младите парови и самохраните родители ќе остварат целосно ослободување од плаќање комуналии во износ од 100 проценти.
Мерката ќе стапи во сила веднаш по нејзиното објавување во службеното гласило, по што образецот за аплицирање и условите за остварување на правото ќе бидат јавно достапни на официјалната веб-страница на Град Скопје. Извршниот одбор на Народната банка на Србија донесе одлука за одземање на дозволата за работа на АЛТА банка АД Белград. Според официјалното соопштение, оваа мерка следува по спроведените контролни активности кои утврдиле значително влошување на финансиската состојба и ликвидноста на банката, со што биле загрозени интересите на депонентите.
По уврдувањето на условите за покренување стечајна постапка, управувањето со целокупниот имот на банката е пренесено на српската Агенција за осигурување на депозити, со што се обезбедува наплата за сите доверители, пред сè граѓаните и стопанството.
Истовремено, против членовите на управните органи, акционерите и сите одговорни лица во банката се покренати соодветни правни постапки за утврдување одговорност за настанатата состојба.
За заштита на заштедите на граѓаните, српската Агенција за осигурување на депозити во рок од седум работни дена ќе ги започне исплатите на осигурените депозити. Сите физички лица и мали претпријатија ќе можат да располагаат со своите заштеди до законски гарантираниот износ од 50.000 евра преку банка-преземач која дополнително ќе биде одредена.
По објавувањето на оваа одлука, со официјална реакција се огласи и АЛТА банка АД Битола (поранешна Стопанска банка АД Битола), која беше преземена од српската АЛТА банка.
Од раководството на банката ја информираа јавноста дека АЛТА банка АД Битола е самостојно правно лице регистрирано во Македонија, кое работи под непосредна супервизија на Народната банка на Република Македонија и согласно домашната законска регулатива.
Од АЛТА банка АД Битола нагласуваат дека банката е целосно ликвидна и дека сите нејзини експозитури и банкомати функционираат вообичаено, без никакви ограничувања за клиентите при подигнување готовина, располагање со депозитите или извршување на трансакциите.
Во соопштението се посочува дека случувањата со матичната банка во Србија не значат автоматска промена на правниот статус или финансиската состојба на банката во Македонија, бидејќи таа располага со сопствен капитал, средства и обврски. Депозитите на сите физички лица во Македонија се осигурени преку домашниот Фонд за осигурување на депозити, согласно законите во државата.
Од македонската АЛТА банка исто така порачуваат дека околностите во земјата се суштински различни од оние во Србија и дека банката ги спроведува своите активности врз основа на професионални и регулаторни принципи, без подлегнување на политички притисоци. Управата ги уверува комитентите дека нивните средства се целосно безбедни и дека институцијата останува посветена на одржувањето на финансиската стабилност и довербата кај клиентите. Меѓународната коалиција за мирно, транспарентно и одржливо истражување на вселената забележа значајно проширување откако кон „Artemis Accords“ се приклучија Албанија, Хрватска, Брегот на Слоновата Коска и Сан Марино. Со ова, вкупниот број на земји потписнички достигна 76.
Според информациите од НАСА, ова претставува една од најбрзите експанзии на меѓународна соработка во историјата на цивилните вселенски програми, со што речиси 40 проценти од сите држави во светот денес активно соработуваат во рамки на оваа коалиција.
Администраторот на НАСА, Џаред Исакман, истакна дека овој замав ја потврдува растечката посветеност за одговорно истражување на вселената. Тој нагласи дека речиси една третина од сите потписнички се приклучиле за време на вториот претседателски мандат на претседателот Доналд Трамп, во чии рамки НАСА подготвува повторно слетување на американски екипаж на Месечината и изградба на база за идните мисии кон Марс.
Државите членки редовно одржуваат технички работилници и состаноци за координирање на лунарните слетувања, размена на научни податоци, спречување на мешање во мисиите и стандардизирање на опремата.
Следниот состанок на потписничките ќе се одржи во Анталија, Турција, каде фокусот ќе биде ставен врз поддршката за новите земји-учеснички во вселенските истражувања и управувањето со вселенскиот отпад. 
