Скопје официјално доби Градски воз. Заедно со премиерот Христијан Мицкоски и министерот за транспорт Александар Николоски, градоначалникот Орце Ѓорѓиевски го пушти во употреба новиот железнички линиски превоз, кој треба да овозоможи побрз, побезбеден и поеколошки транспорт за граѓаните.
Првата фаза опфаќа целосно рехабилитирана железничка делница во должина од околу 25 километри, која ги поврзува Зелениково и Железничката станица во Скопје. Со новата реконструирана пруга, патувањето на оваа релација ќе трае околу 20 минути.
Во рамките на градежните активности е извршена целосна модернизација: стариот колосек е демонтиран, дотраените дрвени прагови се заменети со нови бетонски, а пругата е машински подбиена и регулирана со современа механизација. Паралелно со ова, интензивно се работи на следните две фази за поврзување и на останатите делови од градот.
Целта на Град Скопје е целосно интегрирање на железничкиот и автобускиот превоз преку усогласување на возните редови, со што на патниците ќе им се овозможи непречено преседнување и поквалитетна мобилност низ целата градска мрежа.
Покрај стартот на Градскиот воз, најавена е и испорака на 100 нови градски автобуси, за кои е веќе завршена целата постапка. Како следна и завршна фаза во модернизацијата на јавниот превоз во главниот град се подготвува воведувањето на BRT (Bus Rapid Transit) системот, за кој подготовките се наоѓаат во завршна фаза.