Претседателот на СДСМ, Венко Филипче, на прес-конференција одржана во Собранието упати директни обвинувања до премиерот Христијан Мицкоски и гувернерот на Народната банка, Трајко Славески, во врска со состојбите околу АЛТА банка АД Битола.

Според изнесените тврдења од страна на опозициската партија, постои ризик за оштетување на граѓаните во износ од 150 до 180 милиони евра, при што e посочено дека илјадници депоненти и околу единаесет илјади пензионери се соочуваат со оневозможен пристап до нивните заштеди и средства на сметките.

Од СДСМ нагласија дека партијата речиси една година предупредувала на ризиците од влезот на оваа банкарска институција на домашниот пазар. Филипче побара институционални одговори од премиерот и гувернерот за тоа дали биле испочитувани сите законски процедури и дали се извршени соодветни проверки за потеклото на капиталот при преземањето на банката. Дополнително, прашуваат и за функционалноста на банкоматите и експозитурите, како и за оправданоста на барањата за редовно отплаќање на кредитите во услови кога средствата на граѓаните се блокирани.

Во однос на оперативните трансакции, од опозициската партија побараа Јавното обвинителство итно да отвори постапка и да испита дали се вршат префрлања на парични средства меѓу правни субјекти додека сметките на физичките лица се оневозможени за користење, како и какви трансакции биле реализирани во изминатиот период.

Како следен чекор, претседателот на СДСМ најави покренување иницијатива за организирање надзорна расправа во Собранието со цел да се утврдат причините за настанатата ситуација во банкарскиот сектор. Најавено е и поднесување интерпелација за работата на гувернерот на Народната банка, Трајко Славески.