Фармацевтската компанија Реплек АД објави одлични финансиски резултати за првите девет месеци од 2025 година. Сегментот Фармација остварил приходи од 26 милиони евра во периодот од 1 јануари до 30 септември 2025 година, што претставува раст од 18% во споредба со истиот период минатата година.
Извозот останува главниот двигател на растот, сочинувајќи 75% од вкупните приходи. Извозните приходи достигнале 19,74 милиони евра, со раст од 18% на годишно ниво. Домашниот пазар придонел со 6,25 милиони евра, исто така бележејќи раст од 18%.
На годишното Собрание во април 2025 година, усвоена е одлука за исплата на дивиденда во бруто износ од 400 денари по акција, која беше исплатена во јуни. Ова претставува раст од 33% во однос на дивидендата исплатена за 2023 година.
Во насока на обезбедување одржлив раст, Реплек интензивно инвестира во стратешки проекти:
- Модернизација на производство: Пуштена е во употреба нова линија за серијализација и пакување за зголемување на капацитетот и усогласеност со меѓународните стандарди.
- Дигитална трансформација: Од 1 октомври 2025 година, компанијата успешно премина на глобалната ERP платформа SAP S/4HANA за поголема транспарентност и ефикасност.
- Регионално проширување: Реплек го започна своето регионално проширување со отворање претставништва во Босна и Херцеговина и Србија кон крајот на 2024 и почетокот на 2025 година, пазари кои веќе оствариле првични продажби.
- Проширено портфолио: Во текот на 2025 година се лансирани пет нови производи, а се очекува портфолиото со нови лекови дополнително да се збогати до крајот на годината.
