Регулаторната комисија за енергетика, водни услуги и услуги за управување со комунален отпад (РКЕ) го означи почетокот на нов инвестициски циклус во енергетиката, издавајќи ги првите лиценци за батериски систем за складирање на електрична енергија од обновливи извори.
Лиценците се издадени на компанијата ЕНЕРГО СОЛАР СИСТЕМИ за два батериски системи со вкупна инсталирана моќност од 2.600 kW. Овие системи се инсталирани во склоп на две веќе изградени и функционални фотонапонски електроцентрали (ФЕЦ).
Претседателот на РКЕ, Марко Бислимоски, истакна дека воведувањето на батериите во пракса значи забрзана енергетска транзиција кон создавање на одржлив, ефикасен и еколошки енергетски систем во земјава.
„Издавањето на овие лиценци во кои се вклучени батериски системи за складирање на електрична енергија, всушност го означува почетокот на еден нов инвестициски циклус во енергетиката. Употребата на батериите ќе придонесе за сигурно и доверливо функционирање на системите, а едновремено и за економски посигурен и поефикасен енергетски пазар,“ посочи Бислимоски.
Од РКЕ очекуваат голем број сопственици на ФЕЦ да поднесат барање за инсталирање на вакви системи за складирање, познати како „сториџи“. Дополнително, се очекува и интерес од компании кои би биле самостојни оператори на складишта само со батериски системи.
Бислимоски нагласи дека складирањето на енергија во периоди кога има вишок и нејзино користење во периоди кога потребите се зголемуваат, се очекува да влијае и врз намалување на вкупните трошоци во системот. Батериските системи, исто така, ќе можат да даваат услуги на операторот на електропреносниот систем за балансирање на мрежата и одржување на параметрите во пропишани граници.
Условите, постапката и потребната документација за добивање на лиценца за складирање на електрична енергија се уредени во Законот за енергетика и Правилникот за лиценци.
