Министерот за земјоделство, шумарство и водостопанство, Цветан Трипуновски, најави интензивна градежна офанзива во земјоделскиот сектор, истакнувајќи дека Скопје наскоро ќе го добие долгоочекуваниот логистичко-дистрибутивен центар. Според неговите најави, изборот на компанијата изведувач ќе се комплетира за само неколку дена, а самиот центар ќе биде целосно изграден во текот на идната година.
Овој капитален објект е дел од поширокиот проект за модернизација на македонското земјоделство, финансиран со кредит од Светска банка. Трипуновски појасни дека новата владина структура уште во летото 2024 година морала да направи итно реструктуирање на овој проект, бидејќи претходната власт за четири години постигнала поразителна реализација од под 10%. Со новата динамика, проектот конечно се придвижува од мртва точка.
Паралелно со дистрибутивниот центар, крупни промени се случуваат и во Платежната агенција (АФПЗРР). По завршувањето на тендерската постапка и изборот на фирма, до крајот на оваа година Агенцијата ќе добие нова, модерна зграда. Ова просторно проширување не е само естетско, туку претставува клучен предуслов за добивање акредитација за нови европски мерки и поефикасна распределба на субвенциите.
Министерството воведува и целосна дигитализација и ред во управувањето со ресурсите преку подготовка на сеопфатна база на земјоделско земјиште. Оваа база ќе содржи прецизен преглед на сето државно земјиште дадено под закуп, како и јасна евиденција на слободните површини, со што ќе се стави крај на злоупотребите и нефункционалноста.
Во делот на хидросистемите, Трипуновски информираше дека во рамки на проектот „Наводнување на Македонија“ веќе се подготвува теренот за почеток на изведбата на системот „Страиште“, додека за хидросистемот „Пепелиште“ се очекува изборот на изведувач да заврши најдоцна до крајот на оваа година.
