Заменик претседателот на Владата и министер за транспорт, Александар Николоски, денеска оствари работна средба со Рашид Бин Саед Ал-Кајари, вршител на должност амбасадор на Катар, со фокус на зајакнување на билатералната економска соработка и воспоставување на директна авиолинија Скопје-Доха.

Двајцата соговорници ја оценија билатералната соработка како добра, но ја потенцираа значајната можност за зајакнување на економските и трговските односи меѓу Македонија и Катар.

Вицепремиерот Николоски ја претстави амбициозната програма на Владата во областа на инфраструктурата, туризмот и авиосообраќајот. Посебен акцент беше ставен на можноста за воспоставување на директна авиолинија меѓу Скопје и Доха, што се смета за клучно за одржување на бизнис релациите и поврзувањето на граѓаните.

На средбата се разговараше и за зголемување на соработката во транспортниот сектор, туризмот и инвестициите.

Министерот Николоски истакна дека Македонија е во фаза на реализација на крупни капитални проекти и упати јавен повик до сите заинтересирани компании од Катар да се пријават на меѓународните јавни повици.