Министерството за енергетика денеска објави дека на петтата седница на Мешовитиот комитет за економска соработка со Унгарија е зацврстена стратешката енергетска соработка меѓу двете земји.

Средбата ја потврдила посветеноста на Скопје и Будимпешта кон регионална енергетска стабилност, непрекинато снабдување со гас и поддршка на клучни инфраструктурни проекти.

На билатералните средби со Петар Старај, претседавач на Мешовитиот комитет, и Петар Холица, заменик државен секретар на Министерството за енергетика на Унгарија, била потврдена заедничката заложба за размена на добри практики и експертиза.

Државниот секретар на Министерството за енергетика на Македонија, Горан Јовановски, истакна:

„Охрабрени сме од техничкиот дијалог за геотермална енергија, модернизацијата на РЕК Битола и продлабочената соработка помеѓу HUPX (Унгарската берза на електрична енергија) и MEMO (Македонскиот оператор на пазарот на електрична енергија), која ќе ја олесни интеграцијата на пазарите и размената на експертиза.“

Од Министерството потенцираат дека седницата јасно покажала оти соработката меѓу Македонија и Унгарија се базира на доверба и визија за одржлива енергетска иднина за целиот регион.