Регулаторната комисија за енергетика (РКЕ) донесе одлука за ново зголемување на малопродажните цени на нафтените деривати во просек за 1,84 отсто. Новиот ценовник стапува на сила од полноќ и ќе важи од 19 мај 2026 година, како одговор на промените и растот на берзанските цени на светските пазари каде бензините поскапеа во просек за речиси пет отсто, а мазутот забележа скок од дури 14,4 отсто.
Од полноќ, литар ЕУРОСУПЕР БС-95 поскапува за два денари и ќе се продава по цена од 87 денари. Поголемо зголемување од 2,5 денари по литар има кај бензинот ЕУРОСУПЕР БС-98, чија нова цена ќе изнесува 89 денари, како и кај дизел горивото ЕУРОДИЗЕЛ коешто исто така поскапува за 2,5 денари и ќе достигне цена од 92 денари за литар.
Единствено поевтинување има кај Екстра лесното масло за домаќинство, чија малопродажна цена се намалува за половина денар и од полноќ ќе изнесува 1,93,5 денари за литар. Од друга страна, цената на мазутот се зголемува за 0,846 денари по килограм и новата максимална вредност ќе биде 50,814 денари за килограм.
Во оваа пресметка на РКЕ се вкалкулирани и државните олеснувања, односно намалениот износ на акцизите за два денари по литар кај дизелот и двата типа бензини, како и намалената стапка на ДДВ од 10 отсто за бензините. Од комисијата напоменуваат дека ова се максималните утврдени вредности на горивата, што значи дека трговците на големо и мало можат да ги формираат своите цени на бензинските пумпи и пониско од овие износи.
