Најновите податоци на Државниот завод за статистика откриваат значителни промени во земјоделскиот сектор, каде во април 2026 година е забележан раст на цените во однос на истиот месец минатата година.
Овој тренд е видлив и кај трошоците што ги имаат земјоделците (инпут), но уште повеќе кај финалните производи кои се пласираат на пазарот (аутпут), што директно ги подгрева очекувањата за движењето на цените на храната. Крајниот аутпут бележи висок скок од дури 10,8%, додека вкупните трошоци во земјоделството пораснале за 4,2%.
Најголемиот двигател на поскапувањето доаѓа од растителното производство, каде цените во април годинава скокнале за 13,6% во споредба со април 2025 година. За разлика од нив, кај добиточното производство ситуацијата е стабилна, па дури е забележан и минимален пад на цените од 0,3%, што нуди мал простор за здив во сточарскиот сектор.
Од друга страна, статистиката покажува дека за да произведат храна, земјоделците годинава се соочуваат и со многу поголеми трошоци. Во делот на инпутот, цените за тековно потрошените средства во земјоделството, каде спаѓаат репроматеријалите, се повисоки за 3,9%. Дополнително, силен удар трпат и оние кои планираат развој, бидејќи средствата наменети за инвестиции во земјоделството бележат уште поголем раст од 7,1%, што го прави модернизирањето на производството задолжително поскапо од лани.
