Секторот за внатрешни работи (СВР) Струмица откри и разби група од четири лица, вклучувајќи и вработен во обезбедување, кои се сомничат за кражба на предмети од рудникот „Бучим“ во Радовиш и нивна понатамошна продажба на нелегален отпад.

Акцијата започнала на 18.11.2025 година во 09:00 часот, на стариот магистрален пат Струмица-Радовиш, во близина на село Владевци. Полициски службеници од СВР Струмица ги лишиле од слобода А.Д.(31) и К.И.(19), двајцата од Струмица, откако при преглед на товарно возило „форд“ со струмички регистарски ознаки, пронашле делови од генератор.

Истиот ден, во 12:30 часот во близина на село Воиславци, радовишко, лишен од слобода е и Е.У.(45) од Струмица, кој управувал друго товарно возило „форд“, во кое биле пронајдени генератор, алат и други украдени предмети.

Во службени разговори во полициската станица, приведените лица признале дека предметите ги украле од рудникот „Бучим“ и дека и претходно вршеле вакви кражби, а одземените предмети ги продавале на лицето А.Ш.(43) од Струмица.

Врз основа на судска наредба, извршен е претрес во домот на А.Ш., при што во негова близина е пронајдена голема количина складиран отпад и стари возила. Инспектор за животна средина утврдил дека А.Ш. и Е.Д. неовластено тргуваат со овој отпад, со што извршиле кривично дело „загрозување на животната средина и природата со отпад“ по член 230 од Кривичниот законик.

Во врска со настанот, од слобода е лишен и В.А.(32) од Радовиш, вработен во агенција за обезбедување на рудникот. Тој се сомничи дека за одреден паричен надомест им дозволувал на крадците преку спореден влез да влегуваат во кругот на рудникот и да ги одземаат предметите.

Лицата се задржани во полициските станици во Струмица и Радовиш, а за случајот е запознаен јавен обвинител. По целосно документирање на случајот, против сите лица ќе биде поднесена соодветна кривична пријава.