Градоначалникот на Општина Битола, Тони Коњановски, денеска оствари работна средба со министерот за култура и туризам, Зоран Љутков, на која се разговараше за тековните проекти, инфраструктурните предизвици и идните стратегии за развој на културниот туризам во градот. На состанокот во кабинетот на градоначалникот присуствуваше и секретарот на Општината, Борче Димитровски, при што министерот Љутков потенцираше дека Битола останува еден од клучните и најсилните столбови на македонската уметност, култура и духовност.

По почетната средба, Коњановски и Љутков, придружувани од битолските пратеници, претседателот на Советот и директорите на локалните национални установи, извршија теренски увид во градежните активности за целосна реконструкција на поранешното кино „Партизан“. Министерот информираше дека реконструкцијата се наоѓа во напредна фаза и дека градежната динамика се одвива одлично. За комплетно завршување на овој проект се обезбедени околу 94 милиони денари, а според моменталното темпо на работа, објектот се очекува да биде готов и пуштен во употреба до крајот на 2027 година, што е и нешто побрзо од првично планираниот рок.

Поранешниот кино-објект се трансформира во современ мултифункционален културен центар. Новиот простор ќе понуди модерно галериско уредување и дополнителна сала со иновативни архитектонски решенија, што директно ќе ја збогати културната и туристичката понуда на Битола.

Во рамки на денешната агенда, градоначалникот и министерот ги посетија и Јени џамија, како и археолошкиот локалитет „Хераклеа Линкестис“, каде што Министерството за култура и туризам реализира значајни капитални инвестиции за заштита на културното наследство.