Државниот секретар во Министерството за надворешни работи и надворешна трговија, Јовица Палашевски, оствари работна средба со заменик-амбасадорот на Сојузна Република Германија, Јан-Аксел Вос, и со претставниците на Германскиот економски тим (GET), советникот Бјорн Воглер и проектниот менаџер Себастиан Стаск.
Фокусот на разговорите беше ставен врз Стратегијата за привлекување странски директни инвестиции и можностите за нејзино зајакнување преку користење на германската експертиза, досегашните искуства и меѓународните практики.
За време на средбата се разгледани конкретни предлози за воспоставување поефикасен и координиран механизам за претставување на домашните инвестициски потенцијали пред странските компании. Главниот акцент е ставен врз организирање насочени промотивни активности и воспоставување непосредни контакти со потенцијални инвеститори.
Соговорниците разгледаа и можности за организирање обуки и програми за јакнење на институционалните и кадровските капацитети, како и за пренесување на германските искуства во областа на привлекувањето и поддршката на странските инвеститори. Од германска страна беше потврдена целосната подготвеност за продолжување на соработката и обезбедување конкретна експертска поддршка за подобрување на целокупниот систем за странски инвестиции во земјата.