По воспоставувањето институционална заштита за македонскиот рубин, Министерството за енергетика, рударство и минерални суровини започнува нова фаза за негова поширока афирмација и промоција на целокупното геолошко и палеонтолошко наследство на државата.

Министерката Сања Божиновска и претседателот на Здружението за промоција на природните науки „Откритие“, Илија Петковски, денеска потпишаа Меморандум за соработка. Со овој документ се здружуваат институционалните, научните и стручните капацитети со цел заштита, валоризација и промоција на минералното богатство пред домашната и меѓународната јавност.

Развој на геотуризмот

Министерката Божиновска истакна дека Македонија поседува исклучително богато геолошко наследство кое со децении било недоволно промовирано. Според неа, целта на оваа иницијатива е да се развие научната свест, да се доближи геологијата до граѓаните, да се поттикне интересот кај младите и да се даде силен поттик на геотуризмот како дел од националниот идентитет и економски потенцијал.

На потпишувањето на Меморандумот присуствуваше и Деан Шкартов, долгогодишен познавач и промотор на македонскиот рубин, чија минералошка колекција има значаен придонес во афирмацијата на домашните природни богатства во земјата и странство.

Формирање на Центар за промоција на геонаследството

Со договорената долгорочна соработка се предвидува организирање изложби, научно-популарни настани, работилници и едукативни програми. Исто така, ќе се градат партнерства со домашни и странски музеи, универзитети и научни установи.

Како директен резултат од оваа соработка, во просториите на Министерството ќе биде формиран Центар за промоција на геонаследството. Овој центар ќе функционира како постојан изложбен и едукативен простор за презентација на минерали, кристали и фосили, каде стручната фела и институциите заеднички ќе работат на зачувување и меѓународна презентација на македонското природно богатство.