Управата за јавни приходи (УЈП) упати итно предупредување до граѓаните поради појава на лажни SMS пораки кои се испраќаат во име на институцијата. Во пораките лажно се известуваат граѓаните дека нивниот „даночен поврат е подготвен“ и притоа се приложува сомнителен линк.
Од УЈП апелираат до сите кои ќе добијат ваква порака воопшто да не го отвораат линкот и во никој случај да не внесуваат лични, банкарски или други чувствителни податоци, бидејќи станува збор за класичен обид за измама и фишинг.
Даночната управа ги советува граѓаните да бидат исклучително внимателни и да не наседнуваат на ваквите пораки кои имаат за цел злоупотреба на нивните финансиски средства и лични податоци.
Сите информации, известувања и услуги поврзани со даноците треба да се проверуваат исклучиво преку официјалните дигитални канали и портали на Управата за јавни приходи.
За каква било верификација или проверка на информациите, граѓаните можат да се информираат преку официјалната веб-страница ujp.gov.mk или да испратат запит на официјалната е-пошта info@ujp.gov.mk. Дополнително, граѓаните можат да го контактираат Инфо центарот на телефонскиот број 0800 33 000 доколку ѕвонат од фиксни оператори, односно на бројот 02 3253 200 за сите останати повици. УЈП подвлекува дека нивните служби никогаш не бараат внесување на банкарски шифри или чувствителни лични податоци преку текстуални SMS пораки.