Собранието на пленарна седница ја разгледа Фискалната стратегија за периодот 2027-2031 година. Овој стратешки документ, подготвен од Министерството за финансии и усвоен од Владата, има за цел да обезбеди одржливи и стабилни јавни финансии на среден и долг рок, да спроведе постепена фискална консолидација и да ги ублажи ефектите од енергетската и ценовната нестабилност, истовремено поттикнувајќи одржлив економски раст и зголемување на отпорноста на идни кризи.
Фискалната стратегија во целост се темели на четири основни принципи кои вклучуваат фискална одговорност и дисциплина, фазна и предвидлива консолидација за да се избегнат економски шокови, социјална правичност преку заштита на најранливите категории граѓани од кризите и целосна отчетност со јасно дефинирани механизми за следење на трошењата.
Во однос на даночната политика, заменик-министерот за финансии Николче Јанкуловски пред пратениците истакна дека главниот фокус ќе биде ставен на намалување на сивата економија и поголема наплата на средствата во државниот буџет. Ова ќе се реализира преку масовна дигитализација и воспоставување поефикасен даночен систем со цел секој праведно да ги плаќа своите обврски. Тој порача дека управувањето со јавниот долг ќе биде строго контролирано, обезбедувајќи ги неопходните средства за дефицитот, за старите долгови што достасуваат и за проектно финансирање без притоа да се загрози макроекономската стабилност.
Еден од најзначајните долгорочни ефекти на стратегијата е планираното постепено намалување на буџетскиот дефицит како процент од бруто-домашниот производ (БДП). Проекциите предвидуваат фискалната консолидација да го спушти дефицитот од 3,5% во 2027 година, на точно 3,0% во 2028 година, за на крајот да се сведе на ниво од 2,8% до 2029 година.
Во периодот од 2027 до 2031 година се очекува постепено динамизирање на економската активност во земјава и постигнување на просечна стапка на раст од 4%. Носител на овој раст и клучен инструмент на фискалната политика ќе бидат капиталните расходи кои ќе ја зголемат продуктивноста преку големи вложувања во патна и железничка инфраструктура, енергетски капацитети, водоводни системи и социјални објекти.
Дополнителен придонес за економскиот развој се очекува од поддршката за иновации кај домашните компании, привлекувањето на нови странски директни инвестиции, реформите во деловното окружување и пазарот на труд, како и дигитализацијата на јавните услуги. Голема улога во овој процес ќе има и Планот за раст на Европската Унија за Западен Балкан, под услов да се стабилизираат инфлациските притисоци и да зајакне економијата кај главните меѓународни трговски партнери на земјата.
