Компанијата Либерти АД Скопје ги објави финансиските резултати за периодот од 1 јануари до 30 јуни 2026 година. Компанијата забележува благо зголемување на приходите од продажба, со посебен фокус на намалување на трошоците и значаен поттик на производните капацитети.
Остварени се вкупни приходи од продажба во износ од околу 32,27 милиони евра, наспроти 31,82 милиони евра во истиот период минатата година. Растот се должи пред сè на засилената побарувачка и повисоките продажни цени на домашниот пазар.
Зголемување на продажбата на домашниот пазар и нови нарачки
Приходите на домашниот пазар пораснаа од 5,73 милиони евра на 7,13 милиони евра. Приходите од извоз бележат благо намалување и изнесуваат 25,14 милиони евра во споредба со минатогодишните 26,09 милиони евра.
Од раководството истакнуваат дека во јуни е реализирано производство од 9.000 тони, што е зголемување за 3.000 тони над просекот од претходниот период. И покрај летниот период кој е традиционално понеактивен, компанијата има договорено поголеми количини на нарачки за наредниот период и го задржува таргетот од 9.000 тони месечно. Побарувањата од купувачите се главно обезбедени со авансни плаќања, банкарски гаранции или преку осигурителни компании.
Расходи и стратешки заштеди
Вкупните расходи за првото полугодие од 2026 година се искачија на 37,27 милиони евра, наспроти 34,62 милиони евра во првите шест месеци од 2025 година. Ова зголемување произлегува од поголемиот обем на производство, но и од повисоките цени на репроматеријалите и енергенсите.
Сепак, преку замена на репроматеријалот со ладно валан материјал, компанијата успеа да го намали трошокот по единица производ и значително да ја намали загубата. Со оглед на овие заштеди и бизнис плановите, од Либерти очекуваат негативниот резултат постепено да се движи кон нула.
Инвестиции во модернизација и заштитни квоти од ЕУ
Во текот на 2026 година интензивно се работи на повеќе проекти за автоматизација и подобрување на ефективноста. Меѓу нив се автоматизацијата на влезот на Поцинкувална, инсталирањето на нова узда за затегање, забрзувањето на линијата за пластифицирање и модернизацијата на системите за ладење.
Дополнителен предизвик за бизнисот е што од 1 јули 2026 година Македонија повторно влезе во режимот на заштитни квоти што ги поставува Европската Унија за увоз на челични производи. Во однос на зелената транзиција, компанијата останува посветена на постигнување јаглеродна неутралност до 2030 година и целосно го почитува европскиот механизам CBAM.