Надворешната канцеларија за криминалистички работи при ОВР Неготино поднесе кривична пријава против правно лице од Скопје, австрискиот државјанин В.М. во својство на одговорно лице во фирмата, како и против 52-годишниот Р.М. од Гевгелија, кој раководел со подружницата во Кавадарци. Тројцата се сомничат за сторено кривично дело „бесправно градење“ согласно член 244 од Кривичниот законик.
Според информациите од истрагата, полициски службеници и градежен инспектор од Општина Неготино во текот на овој месец извршиле увид на терен и констатирале сериозни прекршувања на законските процедури. Пријавените започнале градежни активности на потегот меѓу неготинските села Пепелиште и Војшанци, каде што ископале канал во должина од околу 600 метри и поставиле кабли за електрична енергија.
Проблемот е што инвеститорот ги отпочнал овие големи инфраструктурни работи на своја рака, односно пред да бидат исполнети неопходните законски услови. Иако претходно било поднесено барање до Општина Неготино, фирмата почнала да гради пред да го добие финалното одобрение за градба и пред да ја плати изготвената пресметка за надомест за уредување на градежно земјиште. Со ваквото самоволно постапување и со неплаќањето на давачките, пријавените предизвикале директна штета на буџетот на Општина Неготино во износ од 1.502.981 денари.
