Триглав Осигурување АД - Скопје ги објави неревидираните финансиски извештаи за работењето во првите три квартали од 2026 година. Компанијата оствари нето-добивка од околу 2,29 милиони евра, што претставува зголемување од 3 проценти во споредба со истиот период минатата година.
Нето-приходите од премија за периодот јануари-септември достигнаа околу 14,93 милиони евра, што претставува раст од 3 проценти, односно зголемување за околу 487,8 илјади евра во однос на 2025 година. Позитивното влијание врз овие приходи главно произлегува од промената во нето-резервите за преносна премија, која донесе околу 1,17 милиони евра, како и од движењето на премијата предадена во реосигурување и соосигурување.
Истовремено, приходите од финансиски вложувања изнесуваат околу 764,2 илјади евра и се за 14 проценти пониски поради помалиот обем на вложувања и намалените реализации од хартии од вредност, додека приходите по основ на провизии од реосигурување пораснаа за 11 проценти и достигнаа околу 1,46 милиони евра.
На расходната страна, нето-расходите за штети се во износ од околу 6,36 милиони евра и бележат зголемување од 11 проценти, односно за околу 650,4 илјади евра во споредба со минатата година, главно како резултат на промените во нето-резервите за штети.
Од друга страна, бруто-ликвидираните штети забележаа пад, особено во каско осигурувањето на возила и автоодговорноста. Нето-трошоците за спроведување на осигурувањето се намалени за околу 243,9 илјади евра и изнесуваат околу 6,31 милиони евра, првенствено заради отсуството на трошоци за закуп на главен деловен простор, по стекнувањето со сопствен деловен објект.
Во текот на периодот од 1 јануари до 30 септември 2026 година, Друштвото нема извршено промени во сметководствените политики, нема исплатено дивиденди, ниту пак има значајни вложувања или продажба на материјални средства и кредитни задолжувања.
Согласно најновите естимации за целата 2026 година, Триглав Осигурување очекува остварување на бруто-премија од околу 29,41 милиони евра и годишна нето-добивка во износ од околу 1,92 милиони евра, продолжувајќи со стабилно, профитабилно и одржливо работење во рамките на Стратегијата на Групацијата Триглав за периодот 2026-2030 година.