Министерката за образование и наука, Весна Јаневска, денеска соопшти дека за новата учебна година се обезбедени учебници по сите предмети во основното и средното образование. Со тоа, како што нагласи, прашањето за недостиг на учебници е затворено и не треба повеќе да биде предмет на дискусија.
„Изготвивме нов Закон за учебници заедно со сите засегнати чинители и успеавме да ги завршиме постапките за обезбедување на учебници по сите предмети, вклучително и по странските јазици, по кои овие основни помагала за совладување на наставната материја недостигаа цели седум години“, изјави министерката.
Јаневска го потенцираше овој успех како одговорност на актуелната Влада и го нарече „срамота“ тоа што во 21-виот век воопшто се дискутира за ова прашање. Таа ја обвини претходната Влада дека за седум години не успеала да го реши проблемот со недостиг на учебници.
