Македонската берза информираше дека од денеска на официјалниот пазар во подсегментот на берзанска котација ќе започне тргувањето со две нови емисии на државни обврзници.
Вкупната вредност на двете емисии на државни обврзници изнесува 1,19 милијарди денари (околу 19,4 милиони евра). Одлуката доаѓа по барање на Министерството за финансии, а се однесува на долгорочни хартии од вредност со рок на достасување од 15 години. Двете емисии се со датум на издавање од 26 март 2026 година.
Првата емисија вклучува државни обврзници без девизна клаузула со вкупна вредност од 949.150.000 денари (околу 15,4 милиони евра). Издадени се вкупно 94.915 хартии од вредност со поединечна номинална вредност од 10.000 денари. Овие обврзници носат годишна каматна стапка од 5,10%, а датумот на достасување е 26 март 2041 година. Шифрата за тргување на берзата е M260341.
Втората емисија се однесува на државни обврзници со девизна клаузула во вкупна вредност од 245.310.000 денари (околу 4 милиони евра). Оваа серија опфаќа 24.531 обврзница со номинална вредност од 10.000 денари и фиксна каматна стапка од 4,85% на годишно ниво. Како и кај првата емисија, рокот на достасување е во март 2041 година, а шифрата за тргување е M260341D.
