Министерството за внатрешни работи (МВР) соопшти дека вчеравечер, на 21.10.2025 година, полициски службеници од Полициската станица за гранични премини и гранична контрола Дојран спречиле обид за криумчарење мигранти и уапсиле две лица. Околу 22:10 часот, кај местото викано „Дубрава“, полицијата забележала патничко возило „опел“ со велешки регистарски ознаки, кое превезувало мигранти. Возилото било управувано од 17-годишник од Струмица, а сопатник бил Ф.М. (18) од Богданци. Возилото е запрено пред Богданци, по што двете лица се лишени од слобода. При службен разговор, тие го признале делото и изјавиле дека превезувале вкупно осум мигранти – шест државјани на Египет и двајца од Сирија. По преземени мерки, мигрантите се пронајдени и спроведени во прифатно-транзитниот центар во Гевгелија. Осомничените Ф.М. и малолетникот се задржани во полициска станица. МВР најави дека по целосно документирање на случајот, против приведените ќе биде поднесена соодветна пријава за криумчарење мигранти. Премиерот Христијан Мицкоски денеска објави дека е потпишан Меморандум за разбирање со американско-британската компанија „Бурсток“, со кој се најавува голема инвестиција во наменската воена индустрија во Македонија. Според објавата на премиерот, почетната инвестиција од страна на „Бурсток“ ќе достигне до 150 милиони долари и ќе овозможи отворање на 1.000 нови, високоплатени работни места. „Денеска потпишавме меморандум за разбирање со Американско-британската компанија Бурсток којашто ќе инвестира во наменската воена индустрија во Македонија до 150 милиони долари, ќе имаме нови високоплатени 1.000 работни места и ова е само почеток,“ истакна Мицкоски. Премиерот, исто така, најави дека ова е само почеток на соработката, со очекувања инвестициите во воената наменска индустрија да достигнат повеќе од една милијарда долари. Компанијата „Бурсток“ има долгогодишно искуство во областите на одбраната, дипломатијата, безбедноста и разузнавањето, како и во обуката, консултантски услуги и управување со проекти. Како што информираше Мицкоски, таа е специјализирана и во поморскиот и воздухопловниот комерцијален сектор. Европската комисија, во најновиот извештај за имплементацијата на Планот за раст, потврди дека Македонија преку Mинистерството за економија и труд целосно и успешно ја спроведе реформската мерка 4.1.1 – „Справување со неформалната економија во поддршка на Стратегијата за формализација на неформалната економија“. Целта на мерката е унапредување на формалната економија преку интензивирање на инспекцискиот надзор и примена на пристап заснован на проценка на ризик, со фокус на секторите најподложни на неформални активности, градежништво, туризам и земјоделство. Според оценката на Европската комисија, земјата далеку ги надминала поставените цели за зголемување на бројот на инспекции и резултатите од надзорот во рамките на оваа реформа со вкупна вредност од приближно 2,5 милиони евра, насочени кон јакнење на институциите, дигитализација на инспекциските служби и зајакнување на формалната економија. Државниот инспекторат за труд (ДИТ) спроведе 16.464 инспекции во периодот јули 2024 – јуни 2025, што претставува 242% зголемување во однос на целта за 20% зголемување во однос на просекот од 2020–2023 година. Притоа се откриени 543 нерегистрирани работници, што е зголемување од над 200% во однос на претходните години. Државниот пазарен инспекторат (ДПИ) реализира 669 инспекции, што е 40% повеќе од целната вредност, при што издадени се 222 управни решенија, а 18 нерегистрирани економски оператори се затворени поради непочитување на законите. Овие постигнувања е резултат на спроведување на пристап заснован на проценка на ризик при планирањето на инспекциските активности, со приоритетно насочување кон секторите најпогодени од неформална економија – градежништво, туризам и земјоделство. Двете институции применуваат методологии за управување со ризик и активно користат дигитални алатки за подобрување на ефективноста и транспарентноста во своето работење. Европската комисија во својата оценка нагласува дека Македонија ја реализирала реформата „целосно и успешно“, без утврдено двојно финансирање и со целосна усогласеност со европските стандарди. По поднесена кривична пријава од Управата за финансиска полиција, Основното јавно обвинителство Прилеп денеска донесе Наредба за спроведување истражна постапка против 16 физички и 7 правни лица, додека уште девет други лица се осомничени за дела кои се гонат во скратена постапка. Тие се осомничени за кривични дела – Злоупотреба на постапката за јавен повик, доделување на договор за јавна набавка или јавно-приватно партнерство од член 275-в, како и Проневера во службата од член 354 од Кривичниот законик. Со пријавата се опфатени и дејствија на несовесно работење, злоупотреба на службена положба и овластување, фалсификување или уништување деловни книги и други кривични дела за дел од осомничените, кои обвинителството исто така ги испитува. Постои основано сомнение дека осомничените, како соизвршители, учествувале во дејствија со кои свесно ги повредувале прописите за јавни набавки во ЈЗУ Општа Болница со проширена дејност Прилеп со намера за себе или за друг да остварат значителна имотна корист, односно да предизвикаат значителна имотна штета на болницата, што е поткрепено и со наоди од извештај на Државниот завод за ревизија. Осомничените, меѓу кои поранешната директорка, раководители и други вработени на болницата, но и управители на осомничени правни лица, преку постапки за јавни набавки за сервис на моторни возила, чистење на работните простории, сервис на водоводна мрежа, молерофарбарски услуги, физичко обезбедување, реконструкција на инфективното одделение, односно преку неизвршување на договорните обврски и незаконски промени на налози за исплата, предизвикале вкупна штета на буџетот на болницата „Борка Талески“ од 42.726.978 денари. Основното јавно обвинителство Прилеп до судијата на претходна постапка достави предлог за определување мерка притвор за шестмина осомничени, додека за останатите 19 физички лица се предложени мерки на претпазливост. Според најновите податоци објавени од Државниот завод за статистика (ДЗС), просечната месечна исплатена нето-плата по вработен во август 2025 година изнесува 45.310 денари. Овој е годишен раст од 10,3% во споредба со просечната нето-плата исплатена во август 2024 година. Истиот процент на зголемување, од 10,3%, е забележан и кај просечната месечна бруто-плата, која во август 2025 година изнесува 68.180 денари. Најголемо влијание врз годишното зголемување на просечната нето-плата имаат секторите: Дејности на здравствена и социјална заштита со раст од 14,6%, Образование со зголемување од 14,5%, Административни и помошни услужни дејности со раст од 14,1%. Во однос на претходниот месец, зголемување на нето-платата е забележано кај: Уметност, забава и рекреација за 5,2%, Објекти за сместување и сервисни дејности со храна за 4,7%, Рударство и вадење на камен за 4,5%. Денеска во раните утрински часови, полициски службеници од Регионалниот центар за гранични работи Север и СВР Скопје спроведоа акција во скопската населба Чаир, при што приведоа шест странски државјани под сомнение за фалсификување службени документи и нелегален престој. Акцијата е спроведена околу 01:30 часот, кога се лишени од слобода четири лица од Турција – А.З. (30), З.А. (26), Е.С.О. (20) и А.У. (51), како и двајца државјани од Узбекистан – Н.А.Т. (39) и А.Д.М.У. (27). Претресот, извршен со судска наредба во домот на А.З. на подрачјето на Чаир, бил инициран поради сомневање за сторен прекршок по Законот за странци и член 378 од Кривичниот законик (фалсификување исправа). При претресот, петмина од затекнатите лица немале дозволи за престој, а биле пронајдени и одземени повеќе предмети за кои постои сомнение дека се користеле за криминални активности: дозволи за престој, пари, печати, лаптоп компјутери и турски патни исправи. Сите шест лица се задржани во полициска станица. Одделението за прекуграничен криминал и миграции работи на целосно документирање на случајот, по што против нив ќе бидат поднесени соодветни кривични и прекршочни пријави. Управата за јавни приходи (УЈП) упати апел до сите даночни обврзници навремено да ги поднесат ДДВ-04 пријавите и да го платат даночниот долг за изминатиот даночен период, имајќи предвид дека рокот е поместен поради неработен ден. Иако законскиот рок за поднесување и плаќање на ДДВ-04 пријавите (месечни и тримесечни) е 25 октомври (сабота), бидејќи тој е неработен ден, рокот се поместува за првиот нареден работен ден – понеделник, 27 октомври 2025 година. УЈП предупредува дека поради скратената работна недела, даночните обврзници имаат пократок период за подготовка и исполнување на овие обврски. Од УЈП апелираат до даночните обврзници, обврските да се исполнат навремено и да не го чекаат последниот ден од законски утврдениот рок, со цел да се избегне преоптоварување на системот и можни технички пречки во последен момент,“ се вели во соопштението на УЈП. Напоменуваат дека поднесувањето на пријавата без истовремено плаќање на долгот не ги исполнува законските обврски. Само со целосно точно и навремено поднесување на пријавата и плаќање на обврските, се избегнуваат дополнителни камати, санкции и непотребен стрес. Според податоците за енергетските биланси за 2023 година објавени од Државниот завод за статистика (ДЗС), Македонија останува високо зависна од увозот на енергија, додека бруто-примарното производство бележи значителен пад. Во 2023 година, вкупната потребна енергија изнесувала 2.707.695 тони нафтени еквиваленти (тое). Од оваа количина, дури 63.2% е обезбедена од увоз, што ја потврдува високата увозна зависност на земјата. Во структурата на вкупната потрошувачка, најмногу се застапени нафтените продукти со учество од 43.3% и цврстите горива со учество од 30.0%. Бруто-примарното производство во 2023 година изнесувало 942.472 тое, што претставува намалување од 9.3% во споредба со претходната 2022 година. Најголем негативен придонес кон овој пад има производството на лигнит (јаглен), каде е забележан пад од 19.3%. Сепак, кај обновливите извори на енергија има голем раст: Соларната електрична енергија со раст од 369.6% и хидроенергијата со раст од 20.6%. Финалната енергетска потрошувачка во 2023 година достигнала 1.793.862 тое, а најголем потрошувач останува секторот Сообраќај. Основното јавно обвинителство Битола, преку Канцеларијата за поврат на имот во Јавното обвинителство на Република Македонија, упати итно барање до надлежните органи на Република Србија за замрзнување имот – 10 нови товарни и приклучни возила набавени во 2025 година за правно лице со седиште во Белград за кое е утврдено дека има сопственичка поврзаност со лице осомничено за злоупотреби во РЕК Битола против кое беше поведена истрага на 9 октомври. Од српските органи беше побарано да забранат на правното лице од Белград, на неговиот управител или на друго лице во нивно име да ги отуѓува, оптоварува или да располага со моторните возила за кои постои сомнение дека се набавени и претставуваат посредна имотна корист од кривичните дела за кои е отворена истрага. Дополнително, од српските власти е побарано да се обезбеди и да се отвори сеф за кој е утврдено дека осомничениот го поседува во една српска банка со цел да се провери неговата содржина. Поднесените барања се прифатени и српското обвинителство издаде наредби за замрзнување на наведениот имот. Освен ова, од сметките на осомничениот и неговата фирма во државава, која исто така е опфатена со истрагата, по барање на обвинителството се замрзнати околу 30 милиони денари, а обвинителството побара да се забрани и располагање на дополнителен движен и недвижен имот во државава – три стана во Скопје, парцела градежно неизградено земјиште и гаража стекнати во 2024 година, како и три товарни и едно патничко возило набавени во 2025 година, за кои постои сомнение дека претставуваат принос од казниво дело, односно имот кој во иднина може да е предмет на конфискација поради сторените кривични дела кои се опфатени со истрагата. Мобилни екипи на царинската управа во изминатите денови спречија низа прекршочни дела на граничните премини и во внатрешноста на државата, при што е запленета разновидна стока, девизи и документи. Во акциите се откриени и спречени обиди за шверц на цигари, ветеринарни препарати, облека со ознаки на познати брендови, германски регистарски таблички и мигранти. На граничниот премин Деве Баир, при контрола на автобус на релација Скопје – Истанбул – Скопје, откриен е обид за шверц на 160 штеки цигари, кои биле сокриени во делови за вентилација, под седиштата и во багажот. Цигарите биле во сопственост на возачот, македонски државјанин, против кого е поведена прекршочна постапка. Значајна заплена е забележана и на Богородица, каде мобилен тим спречил нелегален внес на 100 килограми ветеринарни препарати и додатоци за исхрана за добиток, за чиј увоз е потребна посебна дозвола од Агенцијата за храна и ветеринарство. Производите биле пронајдени во кабината на камион, а против возачот е поведена постапка. Исто така, при контрола на стока во Царинската испостава Тетово, откриени се 1.512 метри квадратни теписи кои не биле опфатени со царинските документи. На граничниот премин Богородица, при контрола на камион со стока од Турција за Косово, запленети се 80 парчиња облека со ознаки на заштитени трговски марки, поради сомневање за повреда на право од интелектуална сопственост. На Табановце, при личен претрес на македонски државјанин кој патувал за Берлин, пронајдени се непријавени седум илјади евра. Согласно законските прописи, на патникот му се вратени две илјади евра, а останатите се задржани. На истиот премин запленети се и 665 парчиња гел за нокти кои се обидел да ги прошверцува возач на камион. На граничниот премин Блаце, пак, под седиштата на минибус пронајдени се непријавени очила за сонце со проценета вредност од околу 60.000 денари. Мобилната служба за скенер на Богородица откри обид за криумчарење на пет мигранти, државјани на Сиера Леоне, Египет и Екваторска Гвинеја, скриени во товарно возило. Лицата се предадени на МВР за понатамошна постапка. На граничниот премин Блаце, мобилен тим откри три комплети германски регистарски таблички и сообраќајни дозволи скриени во јакните на тројца македонски државјани. Тие се обиделе да воведат возила во слободен промет без плаќање на увозни давачки, а против нив е поведена соодветна постапка. Царинската управа најави продолжување на засилените контроли со цел спречување на сите облици на нелегална трговија. 
