Унгарската нафтена компанија МОЛ (MOL) размислува да купи дел од акциите на Нафтената индустрија на Србија (НИС). Оваа потенцијална зделка би можела да биде решение за кризата во која се најде НИС откако стапија на сила санкциите на САД за рускиот енергетски сектор. Според информациите, МОЛ би можел да го купи уделот од 11,3% кој е во сопственост на рускиот Газпром (кој заедно со Газпром Нефт има мнозински удел во НИС). Ова би ја направило руската страна малцински акционер. Потенцијалната продажба доаѓа откако американскиот ОФАК (Канцеларијата за контрола на странски средства при Министерството за финансии на САД) ги активираше санкциите за НИС, која оперира со единствената рафинерија во Србија. Поради овие санкции, банките престанаа да ги обработуваат плаќањата, а хрватскиот нафтовод ЈАНАФ престана да испорачува сурова нафта. Руските компании испратиле барање до ОФАК во кое изјавиле дека се подготвени да ја отстапат контролата на трета страна. Се очекува зделката да се забрза, при што некои медиуми шпекулираат дека таа би можела да биде дискутирана во Будимпешта на 15 ноември. Доколку МОЛ го купи овој дел, српската влада би поседувала 29,9% од акциите, МОЛ 11,3%, а малите акционери 13,9%. Ова, според аналитичарите, би значело дека Србија и МОЛ би имале вкупно мнозинство од 55,1%, што би ја променило контролната структура во компанијата. Авиокомпанијата Air Serbia денеска објави дека, по повеќе од три децении, повторно воспоставува директна авиолинија помеѓу Белград и Торонто. Директните летови ќе започнат од 23 мај 2026 година и ќе се одвиваат двапати неделно, секоја среда и сабота, со користење на авиони Airbus A330-200. Продажбата на билетите ќе започне на 16 октомври 2025 година. Торонто е третата дестинација на Air Serbia во Северна Америка, по веќе воспоставените линии кон Њујорк и Чикаго. Оваа рута има посебно значење, бидејќи последен пат ЈАТ (претходникот на Air Serbia) летал директно до Торонто во мај 1992 година. „Овој стратешки чекор го означува почетокот на ново поглавје во историјата на нашата компанија и претставува продолжение на економскиот, трговскиот и културниот развој на Србија. Значајноста на оваа директна линија ги надминува економските и комерцијалните размислувања, особено поради големата српска дијаспора во Торонто. Оваа рута не само што поврзува две земји, туку и две култури и две заедници“, изјави извршниот директор Марек. Марек додаде дека воспоставувањето силно присуство на северноамериканскиот пазар е клучно за остварување на визијата Белград да стане транзитен центар кој ги поврзува Европа и Северна Америка. Новата линија ќе им овозможи на патниците од Србија и целиот регион, вклучувајќи ја и Македонија, многу полесно и побрзо да стигнат до своите семејства и пријатели во Канада. Според најновите податоци од Државниот завод за статистика на Хрватска, просечната нето плата во Хрватска за јули 2025 година изнесувала 1.437 евра, што претставува номинален пад од 0,5% во однос на јуни 2025 година, а реално е намалена за 0,9%. Истовремено, просечната бруто плата за истиот месец изнесувала 2.000 евра, со пад од 0,4% номинално и 0,8% реално во однос на претходниот месец. Меѓутоа, во однос на јули 2024 година, просечната нето плата номинално пораснала за 9,3%, а реално за 5,0%. Просечната бруто плата за јули 2025 година, исто така, пораснала за 9,8% номинално, односно 5,5% реално во однос на истиот месец минатата година. Највисоки просечни нето плати за јули 2025 година се исплатени во секторот Авиосообраќај, каде што просечната нето плата изнесувала 2.353 евра. Од друга страна, најниска просечна нето плата е во секторот Производство на облека, која изнесувала 937 евра. Највисока бруто плата, е исплатена во истиот сектор (Авиосообраќај), со износ од 3.436 евра, додека најниската бруто плата е во секторот Производство на облека, која изнесувала 1.232 евра. Претседателот на Србија, Александар Вучиќ, во Пекинг се состана со претседателот на Народна Република Кина, Си Џинпинг. Вучиќ ја изрази својата длабока благодарност за континуираната поддршка и искреното пријателство што Кина ѝ го дава на Србија, нагласувајќи дека двете земји се „челични пријатели“. Вучиќ упати благодарност до Си Џинпинг за топлиот пречек, гостопримството и поддршката, која била особено важна во најтешките моменти за Србија. Тој истакна дека Кина е искрен и доверлив партнер и дека Србија никогаш нема да ја заборави помошта од економски, медицински и политички аспект. Една од главните теми на средбата беше економската соработка. Вучиќ се заблагодари за зголемената трговска размена, која достигна рекордно ниво благодарение на иницијативите на претседателот Си и Договорот за слободна трговија. Посебно внимание беше посветено на инфраструктурните проекти, меѓу кои и меѓународната железничка линија Белград–Будимпешта, за која беше најавено дека ќе биде пуштена во сообраќај за само 15 дена. Вучиќ упати и посебна благодарност за инвестициите на кинеските компании во Србија и изрази надеж за нови вложувања во иднина. Ова, како што нагласи, е од голема важност за економскиот развој на земјата. Според податоците од Државниот завод за статистика на Србија, бруто домашниот производ (БДП) во вториот квартал на 2025 година забележа реален раст од 2,1% во споредба со истиот период од претходната година. Анализата на економските сектори покажува дека најголем раст на бруто додадената вредност е забележан во секторот информации и комуникации (5,9%), по што следи индустријата и секторот за водоснабдување и управување со отпадни води (3,0%). Од друга страна, секторот градежништво забележа значителен пад од 16,1%, што претставува најголемо намалување меѓу сите сектори. Кога се разгледуваат компонентите на БДП, најголем раст има кај увозот на стоки и услуги (9,8%), а потоа и кај извозот на стоки и услуги (4,6%). Раст е забележан и кај финалната потрошувачка на домаќинствата (3,0%), непрофитните институции (3,8%) и државата (3,7%). Единствено кај бруто инвестициите во основни средства е забележан пад од 4,0%. Сезонски приспособените податоци покажуваат раст на БДП од 1,1% во вториот квартал на 2025 година во однос на претходниот квартал. Хрватската економија продолжува да расте, покажуваат најновите податоци од Државниот завод за статистика на Хрватска. Во вториот квартал на 2025 година, бруто домашниот производ пораснал за 3,4% во однос на истиот период минатата година. Според првичните проценки, бруто додадената вредност е зголемена за 3,3%. Растот е забележан во сите економски дејности. Главни двигатели на растот се: - Потрошувачката на домаќинствата е зголемена за 4,0%, главно поттикната од зголемениот промет во трговијата на мало и угостителските услуги. - Државната потрошувачка бележи раст од 2,4% во однос на истиот период минатата година. - Извозот на стоки и услуги е зголемен за 1,6%, додека увозот се зголемил за 3,3%. 
