Финансии

„Триглав Осигурување“ со добивка од 1,62 милиони евра во првата половина од годината: Раст од 41% во однос на лани

Отворен јавниот повик: До 30.000 денари државни субвенции за приклучок или котел на гас

Министерството за енергетика, рударство и минерални суровини ги повикува граѓаните да ја искористат можноста за директна финансиска поддршка преку јавниот повик за субвенционирање на приклучоци и котли на природен гас. Преку оваа мерка, домаќинствата можат да добијат поврат на средствата до 30.000 денари, односно до 70 проценти од направените трошоци. Вкупниот буџет обезбеден за оваа намена изнесува 3 милиони денари. Право на учество на јавниот повик имаат домаќинствата кои ги исполнуваат следниве критериуми: - За нов приклучок: Домаќинства кои во текот на 2026 година ќе извршат куќен приклучок на системот за дистрибуција на природен гас. - За котел на гас: Домаќинства кои ќе набават котел на природен гас за објект што веќе бил приклучен на дистрибутивната мрежа заклучно со 1 јануари 2026 година. За едно домаќинство е дозволено поднесување на само едно барање. Доделувањето на средствата ќе се врши по принципот „прв дојден – прв услужен“, сè до целосно исцрпување на предвидениот буџет. Крајниот рок за поднесување на барањата е 31 октомври 2026 година. По завршувањето на рокот, посебна комисија формирана од Министерството ќе ги разгледа сите доставени апликации, по што ќе следува исплата на средствата за корисниците кои ги исполнуваат условите. Целата документација и деталните информации за јавниот оглас се достапни на официјалната веб-страница на Министерството (energy.gov.mk).

Либерти АД Скопје ги зголеми приходите на 32 милиони евра, зголемена е продажбата на домашниот пазар

Димитриеска-Кочоска: Ребалансот на Буџетот обезбедува повеќе средства за капитални инвестиции, земјоделство и општините

Тутунски комбинат Прилеп оствари добивка од над 240 илјади евра во првата половина од годината

Тутунски комбинат АД Прилеп ги објави постигнатите резултати од работењето за периодот од 1 јануари до 30 јуни 2026 година. Според финансискиот извештај, компанијата ја заврши првата половина од годината со позитивен финансиски резултат, односно остварена добивка од 241.700 евра. Во истиот период минатата година, добивката на комбинатот изнесувала 749 илјади евра. Позитивниот финансиски биланс во овој период е резултат на подобрената комуникација на раководството со кооперантите, со што е реализиран зголемен обем на откупен тутун од страна на компанијата. Пад на оперативните приходи поради извозот и раст на расходите Во делот на оперативните активности, комбинатот бележи значителен пад на оперативните приходи, кои се намалија од минатогодишните 10,44 милиони евра на 2,03 милиони евра. Ова намалување главно се должи на намалената продажба на домашниот и странскиот пазар, односно на фактот што во извештајниот период сè уште не е реализиран извозот на тутунот. Оперативните расходи кои произлегуваат од редовното работење бележат раст и достигнаа 23,67 милиони евра, наспроти 16,49 милиони евра во истиот период лани. Зголемувањето на расходите е најмногу изразено кај ставката трошоци за суровини и други материјали, како и поради намалената набавна вредност на трговските стоки. Стабилни финансиски приходи и исполнување на планот Финансиските приходи изнесуваат 690.800 евра и бележат благо зголемување во споредба со минатогодишните 666.700 евра. Во исто време, финансиските расходи се искачија на 444.500 евра наспроти 402.200 евра минатата година, пред сè поради зголемените трошоци за камати и курсни разлики од работењето со неповрзани друштва. Од раководството на Тутунски комбинат АД Прилеп истакнаа дека ги исполнуваат сите планирани параметри и очекуваат оваа тенденција да продолжи. Во претстојните квартали се планира целосна реализација и продажба на целиот откупен тутун, што ќе донесе повисоки приходи и уште подобри финансиски резултати до крајот на годината.

Аутомакедонија со остварени приходи од 4,85 милиони евра и добивка од 335 илјади евра

Аутомакедонија АД Скопје ги објави неревидираните консолидирани и поединечни финансиски извештаи за периодот од 1 јануари до 30 јуни 2026 година. Извештајот покажува значајно подобрување на оперативната ефикасност и силен раст на профитабилноста. Овие резултати го одразуваат и ефектот од организациското преструктурирање спроведено во 2025 година, кога сервисните активности се издвоени во посебен правен субјект во целосна сопственост на матичното друштво. Поради тоа, сервисниот сегмент повеќе не е дел од поединечниот извештај на Аутомакедонија АД Скопје, туку целосно е опфатен во консолидираните биланси кои ја даваат комплетната слика за деловната активност. Скок на приходите од продажба и раст на оперативната добивка Во првите шест месеци од 2026 година, Групацијата оствари консолидирани оперативни приходи во износ од околу 4,85 милиони евра, што претставува зголемување од 5 проценти во споредба со истиот период минатата година. Клучниот двигател на овој раст се приходите од продажба кои достигнаа околу 4,81 милиони евра, бележејќи скок од 17 проценти како резултат на зголемениот обем на деловни активности. Од друга страна, во поединечниот извештај оперативните приходи изнесуваат 3,54 милиони евра и се пониски за 10 проценти, што е директна последица од префрлањето на сервисните дејности во новата зависна компанија. Консолидираните оперативни расходи пораснаа за 4 проценти и достигнаа 4,39 милиони евра. Побавниот раст на расходите во однос на приходите овозможи оперативната добивка на Групацијата да се искачи на 455.300 евра, што е раст од 26 проценти. Висока профитабилност и стабилна финансиска состојба На ниво на Групација, Аутомакедонија оствари консолидирана нето-добивка по оданочување од 335.000 евра, што е за 35 проценти повеќе во однос на првото полугодие од 2025 година. Нето-добивката која им припаѓа на акционерите на матичното друштво изнесува 315.400 евра и бележи зголемување од 36 проценти. Заклучно со 30 јуни 2026 година, вкупните консолидирани средства на Групацијата достигнаа 19,25 милиони евра, што е зголемување од 8 проценти. Постојаните средства пораснаа за 10 проценти, додека кај тековните средства е забележан раст на побарувањата од купувачите и истовремено намалување на залихите. Вкупната консолидирана главнина и резерви пораснаа за 8 проценти и изнесуваат 7,78 милиони евра, а вкупните обврски се искачија на 11,47 милиони евра.

Фер туризам започнува со пријавен доход: УЈП со засилени активности во летната туристичка сезона

Во екот на летната туристичка сезона, кога традиционално се зголемува обемот на туристички услуги и приходите од нив, Управата за јавни приходи започна со спроведување на координирани активности. Главната цел е поттикнување на доброволната даночна усогласеност и обезбедување еднакви услови за сите учесници на пазарот. Главен фокус на овие мерки се приходите што физичките лица ги остваруваат од краткотрајно издавање сместувачки капацитети, односно апартмани, станови, куќи, викендички и соби, како и од други сезонски дејности поврзани со туризмот. За реализација на оваа акција, Управата за јавни приходи спроведува повеќе паралелни активности. Меѓу нив се објавување практични насоки за пријавување на остварениот доход, директна комуникација и поддршка за даночните обврзници, како и поврзување со останатите институции на државно и локално ниво за споделување податоци. Покрај тоа, УЈП прави детални анализи на ризик, спроведува насочени контроли и води информативна кампања преку медиумите и социјалните мрежи. Целта на Управата не е само да ги посочи законските обврски, туку и да им помогне на граѓаните навремено и правилно да ги исполнат своите даночни должности. Од Управата потсетуваат дека секој остварен приход од издавање сместувачки капацитети подлежи на оданочување согласно законските прописи. Сите лица кои остваруваат ваков тип доход се повикуваат навремено да ги исполнат обврските, бидејќи доброволната усогласеност е основа за фер конкуренција и поголема доверба во институциите.

Адинг со одлични резултати: Добивка од 800 илјади евра и вкупен приход од 5,65 милиони евра во првата половина од годината

Градежната компанија АДИНГ АД Скопје оствари одлични финансиски резултати во првите шест месеци од годината. Според објавените податоци, компанијата бележи раст на приходите и профитабилноста, при што остварените резултати значително ги надминаа првично планираните предвидувања. Раст на приходите и присуство на странските пазари Во периодот јануари-јуни, АДИНГ АД Скопје оствари вкупен приход во износ од 5,65 милиони евра. Ова претставува зголемување за 8,3 проценти, односно за 433.800 евра повеќе во споредба со истиот период лани. Во структурата на вкупните приходи, 63,2 проценти се остварени на домашниот пазар, додека 36,8 проценти произлегуваат од пласман на странските пазари. Во однос на извозот, најголем удел зазема пазарот во Србија со 47,4 проценти, по што следат Бугарија со 21,9 проценти, Црна Гора со 8,9 проценти, Босна и Херцеговина со 7,9 проценти и Украина со 7,6 проценти. Останатиот дел од извозот е реализиран во Косово со 4,1 процент, Либија со 1,4 проценти и Грција со 0,8 проценти. Гледано по квартали, вкупните приходи бележат силен раст во второто тримесечје. Во првиот квартал се остварени 2,1 милиони евра, додека во вториот квартал приходите скокнаа на 3,55 милиони евра. Скок на добивката за 15 проценти и надминување на планот за 114 проценти Компанијата ја заврши првата половина од годината со позитивен финансиски резултат и остварена добивка пред оданочување од 800.900 евра. Овој резултат е за 15 проценти повисок во споредба со минатогодишната добивка во истиот период, која изнесуваше 696.300 евра. Остварената добивка пред оданочување е дури за 114,4 проценти поголема од планираната, која за овој период била предвидена на ниво од 373.500 евра. Анализата по тримесечја покажува дека во првиот квартал е остварена добивка од 284.700 евра, додека во вториот квартал се додадени нови 516.200 евра. Движење на расходите, инвестиции и дивиденда Вкупните расходи на АДИНГ во првото полугодие достигнаа 4,8 милиони евра, што претставува зголемување од 6,6 проценти, односно 295.800 евра повеќе во однос на минатата година. Расходите во првиот квартал изнесуваат 2 милиони евра, додека во вториот квартал се искачија на 2,8 милиони евра. Меѓу останатите финансиски показатели, заклучно со 30 јуни 2026 година, кредитната задолженост на компанијата е зголемена за 245.200 евра. Реализирани се капитални инвестиции во износ од 279.900 евра, додека залихите на готови производи се намалени за 51.900 евра. Исто така, во овој период е извршена исплата на дивиденда во износ од 1.690 евра. Значително натфрлање на производствените и деловните планови Во првиот квартал, остварувањето на планот е натфрлено за 12,7 проценти. Според месечните показатели, во јануари е забележана реализација од 82,5 проценти од планот, во февруари 118,3 проценти, а во март 127,2 проценти. Уште подобри резултати се евидентирани во вториот квартал, каде што планот е натфрлен за 43,3 проценти. Овој бран на раст започна во април со реализација од 168,2 проценти во однос на месечниот план, продолжи во мај со 130,4 проценти и заврши во јуни со 132,9 проценти остварување на предвидениот план.

Анализа на работењето на ЦКБ: Стабилен раст на кредитирањето и добивка од над 15 милиони денари во првото полугодие

Централна кооперативна банка АД Скопје ги објави финансиските извештаи за период заклучно со 30 јуни 2026 година. Второто тримесечје од годинава банката го заврши со позитивен финансиски резултат и остварена добивка од 15,13 милиони денари, делувајќи во макроекономски услови на стабилен раст на потрошувачката, инфраструктурни инвестиции и забавување на инфлацијата. Раст на активита и силна експанзија кај кредитите за физички лица Во однос на билансната позиција, Централна кооперативна банка евидентираше пораст на вкупната актива и пасива за 2 проценти во споредба со крајот на претходната година, со што поставениот деловен план за овој период е исполнет со високи 98 проценти. Позитивни движења беа забележани и кај пласманите. Во второто тримесечје е евидентиран пораст на кредитите и побарувањата од останатите комитенти за 5 проценти во однос на крајот од минатата година, што претставува 97 проценти реализација на планираните цели. Според наведеното во извештајот, овој раст најголемо потекло има од зголеменото одобрување на кредити за населението, односно физичките лица. Каматни приходи, депозити и влијанието на монетарните политики Во услови на општ пораст на каматните стапки во целиот банкарски сектор, банката ги прилагоди и ги зголеми каматните стапки на депозитите, што доведе до ширење на депозитната база и исполнување на планот за депозити од други комитенти со 98 проценти. Оваа стратегија овозможи расходите за камати да се задржат на речиси исто ниво во споредба со истиот период минатата година, додека остварените расходи беа за 8 проценти пониски од првично планираните. Како резултат на зголемениот каматен пондер кај кредитите и зачувувањето на квалитетот на постоечкото портфолио, банката оствари повисоки вкупни приходи од камати за 8 проценти во споредба со првото полугодие од минатата година. Ова доведе и до забележителен раст на нето-каматниот приход за 14 проценти на годишно ниво. Паралелно, паричните средства и паричните еквиваленти бележат пад од 10 проценти, реализирајќи го планот со 100 проценти, додека вложувањата во хартии од вредност забележаа пораст во однос на крајот од минатата година. Движења кај провизиите, оперативните трошоци и курсните разлики На страната на неколку други билансни позиции беа забележани одредени варирања. Во јуни 2026 година, приходите од провизии бележат пад од 3 проценти на годишно ниво, а во однос на планот се пониски за 15 проценти. Со истовремениот раст на расходите за провизии за 3 проценти, нето-приходот од овие услуги е намален за 6 проценти во споредба со 2025 година. Трошоците за вработените забележаа зголемување на годишно ниво, но останаа за 2 проценти под предвидениот буџет. Останатите расходи од дејноста се поголеми за 9 проценти во споредба со истиот период лани, но исто така се за 9 проценти пониски од планираните. Од друга страна, нето-приходите од курсни разлики бележат значителен скок од 50 проценти во споредба со второто тримесечје од 2025 година, додека расходите за амортизација се зголемени за 6 проценти на годишно ниво, но се за 14 проценти под нивото на планот. Кредитен ризик, кредитни линии и дивидендна политика Заклучно со 30 јуни 2026 година, банката за издвоената исправка на вредноста на финансиските средства и посебната резерва за вонбилансната изложеност на нето-основа одвои износ од 6,68 милиони денари, што претставува намалување на оваа позиција за 666 илјади денари во споредба со истиот период од изминатата година. Во извештајниот период банката не вршеше исплата на дивиденда. Во делот на задолжувањата, банката користи средства од кредитна линија склучена во март 2025 година со Развојната банка на Северна Македонија во износ од 5 милиони евра. Овие средства, кои имаат рок за повлекување до крајот на 2027 година, се наменети за поддршка на инвестиции на приватни мали и средни претпријатија, при што банката ги пласира до крајните корисници со поволна каматна стапка од 1,95 проценти годишно без дополници трошоци. Очекувања за претстојниот период и претпазлив раст И покрај тоа што инфлаторните притисоци во Европа и САД влегоа во фаза на смирување, менаџментот на банката потенцира дека глобалните економски и геополитички неизвесности се сè уште присутни. На домашен план се забележуваат знаци на стабилизација и умерен оптимизам во стопанството. Во наредниот период, ЦКБ АД Скопје најавува претпазлива политика во преземањето на нов кредитен ризик и внимателно следење на сигналите од Народната банка. Главниот фокус ќе биде ставен на заштита и задржување на постоечката база на клиенти преку подобрена продуктна понуда, модернизација на информатичката инфраструктура и дополнителен развој на дигиталните и алтернативните канали за банкарско работење.

Просечната нето-плата во мај достигна 49.544 денари, годишен раст од 8,2 проценти

Просечната месечна исплатена нето-плата по вработен во мај изнесуваше 49.544 денари, соопшти Државниот завод за статистика. Во споредба со истиот месец од претходната година, просечната нето-плата забележа раст од 8,2 проценти. Според статистичките податоци, овој годишен раст првенствено се должи на зголемувањето на платите во неколку сектори. Најголем скок е забележан кај снабдувањето со вода, отстранувањето отпадни води и управувањето со отпад со раст од 11,9 проценти, потоа во секторот уметност, забава и рекреација со 11,3 проценти, како и во транспортот и складирањето, каде што просекот е повисок за 10,9 проценти. На месечно ниво, во споредба со април оваа година, најголемо зголемување на нето-платата е евидентирано во трговијата на големо и мало и поправката на моторни возила за 6,3 проценти, во рударството и вадењето камен за 5,8 проценти, како и во секторот транспорт и складирање за 5,7 проценти. Во истиот период, просечната месечна исплатена бруто-плата по вработен изнесуваше 74.482 денари, што исто така претставува годишен раст од 8,2 проценти во споредба со мај 2025 година.