Министерката за енергетика, рударство и минерални суровини, Сања Божиновска, денеска најави зајакнување на контролата и транспарентноста во мерењето на потрошената електрична енергија, истакнувајќи дека точноста на броилата значи доверба дека секој граѓанин плаќа за реално потрошената енергија. Министерката ја посети акредитираната лабораторија на Електродистрибуција, која врши метролошка проверка и инспекција на броила. За време на посетата, тимот на лабораторијата ја презентираше најсовремената технологија и опрема, меѓу кои и седум испитни станици од германската компанија ЕМХ. Со оваа опрема се обезбедува прецизно, сигурно и транспарентно тестирање на броилата што ги користат домаќинствата низ државата, а резултатите од надзорната оценка потврдуваат дека Телото за инспекција целосно ги исполнува меѓународните стандарди. Како клучен чекор кон поголема доверба и фер однос, министерката Божиновска, заедно со директорот на Бирото за метрологија, најави: „И во Бирото за метрологија наскоро ќе биде ставена во функција современа опрема за државна контрола и верификација на броилата – со што секој граѓанин ќе може независно да ја провери исправноста на своето броило во државна институција. Тоа е прашање на фер однос, јавен интерес и транспарентност.“ Вицепремиерот и министер за транспорт, Александар Николоски, денеска на трибината „Автопат Е-75 Инфраструктурата како основа за развој на транзитниот туризам“ истакна дека Македонија има огромен потенцијал за развој на туризмот, но предупреди дека недостатокот на добри хотели и бавните урбанистички процедури ја кочат експанзијата на овој сектор. Николоски посочи дека земјата веќе бележи успех во привлекувањето посетители, нагласувајќи дека Македонија е меѓу ретките држави со двоцифрен раст на бројот на туристи. „За само една година, воведена е 21 директна авио дестинација од европските метрополи, а само лани преку Македонија транзитирале преку 10 милиони патници. Ова доволно кажува за посветеноста на Владата за развој на туризмот,“ изјави Николоски. Вицепремиерот нагласи дека потенцијалите за развој на туризмот долж Коридор 10 се огромни, но главниот предизвик останува како транзитните туристи да се задржат подолго во земјата. - Изградбата на брзата пруга: Со тоа, од центарот на Скопје до центарот на Солун туристите ќе се превезуваат за час и дваесетина минути, што се очекува да ја зголеми искористеноста на железницата. - Винската индустрија: Владата силно ги помага земјоделците, а винската индустрија бележи најдобри цени. Отворањето на мали винарии во Тиквешијата веќе привлекува транзитни туристи. - Археолошкиот локалитет Стоби: На вчерашната седница на Влада е усвоена одлука Министерството за транспорт да финансира целосно урбанистичко решение за Стоби, со цел локалитетот да стане далеку поатрактивен. Николоски ја отвори темата за недостиг на сместувачки капацитети, потенцирајќи дека на државата ѝ фалат хотели и повеќе добри хотели. „Во моментов сме во една ситуација кога е комплицирано да се гради. Урбанистичките планови се носат предолго, посебно во заштитените подрачја. Практично невозможно е да се гради во заштитените подрачја. Не можеме да зборуваме за туризам, а во главниот туристички центар да нема хотели со пет ѕвезди,“ истакна Николоски. Вицепремиерот ја повика јавноста на размислување за стратегија како да се поедностави процедурата за изградба на хотели и да се привлечат инвеститори, особено долж Коридор 10 и во заштитените подрачја, каде што сегашните ограничувања ја кочат изградбата на квалитетни капацитети. Трибината беше организирана од Министерството за култура и туризам, а на неа учествуваа и министерот Зоран Љутков и директорот на ЈП за државни патишта Коце Трајановски. Градоначалникот на Град Скопје, Орце Ѓорѓиевски, заедно со градоначалникот на Општина Бутел, Дарко Костовски, денеска го означија почетокот на изградбата на мега паркот во Бутел. Овој проект е првиот што започнува со реализација од предизборната програма на градоначалникот Ѓорѓиевски. Запуштениот простор долж булеварот „Христијан Тодоровски - Карпош“ ќе се трансформира во модерен и функционален зелен простор со површина од 8.000 м², кој ќе содржи богати зелени површини, плоштад, детски катчиња, пешачки патеки и фитнес зони, наменети за сите возрасти. Овој парк е еден од четирите мега паркови ветени во програмата, а дополнително се планира изградба на околу 50 мали паркови во сите скопски општини. Градоначалникот Ѓорѓиевски најави дека во Бутел, паралелно со паркот, следува и голем инфраструктурен бран. Како дел од стратегијата за уредување на 50 критични крстосници низ Скопје, ќе се изгради кружен тек на крстосницата меѓу улиците „Бутелска“ и „Александар Урдаревски“, со цел постигнување поголема безбедност и визија за град со нула фатални несреќи до 2030 година. Паралелно со тоа, ќе следи целосна реконструкција на улиците „Бутелска“ и „Радишанска“ со нов асфалт, модерни пешачки патеки, улично осветлување и атмосферска канализација која треба да го реши долгогодишниот проблем со поплави. Меѓу поголемите проекти кои наскоро ќе започнат се и реконструкцијата на Стар Качанички пат, развојот на Економската зона Визбегово и ревитализацијата на реката Серава со уредени зелени коридори, велосипедски и пешачки патеки. Министерот за надворешни работи и надворешна трговија, Тимчо Муцунски, најави значајно преориентирање во надворешно-трговската и дипломатската стратегија на земјата, со акцент на пазарите кои имаат огромен потенцијал и кои досега биле запоставувани. Главниот фокус е ставен на Блискиот Исток, како и на одредени пазари во Африка и Азија. Како конкретен чекор во оваа насока, министерот Муцунски најави отворање на нова амбасада во Саудиска Арабија. „Ќе се отвори нова амбасада во Саудиска Арабија, земја со којашто имаме сериозен потенцијал, се очекува да се отвори во 2026 година.“ - изјави Муцунски. Во однос на Обединетите Арапски Емирати (ОАЕ), по неодамнешната посета на македонската влада во ОАЕ, министерот изрази очекување за дополнителни конкретни придобивки. „Покрај визното олеснување коешто веднаш го добивме и е значајно за нашите граѓани и бизнис, очекуваме и со ОАЕ да имаме конкретно придвижување. Не би можел сега да соопштам поради доверливата комуникација помеѓу двете страни, но ќе има бенефити коишто граѓаните наскоро ќе ги чувствуваат.“ - потенцираше тој. Министерот во 2026 година планира да посети дел од пазарите во Африка и Азија, а планот е да биде придружуван со претставници од нашата деловна заедница.“ нагласи Муцунски. Државниот завод за статистика (ДЗС) објави дека во септември 2025 година е забележан раст на бројот на издадени одобренија за градење. Вкупно се издадени 314 одобренија, што претставува зголемување од 6.1% во однос на истиот месец лани. Иако бројот на одобренија расте, предвидената вредност на објектите бележи пад. Предвидената вредност на објектите изнесува 7.124.419 илјади денари, што е за 5.2% помалку во споредба со септември 2024 година. Според намената, најголем дел од одобренијата, односно 220 (70,1%), се издадени за објекти од високоградба. За објекти од нискоградба се наменети 38 (12,1%) одобренија, додека 56 (17,8%) се однесуваат на реконструкција. Најголем дел од инвеститорите се физички лица, кои се јавуваат како инвеститори на 229 (72,9%) од објектите. Деловните субјекти се инвеститори на преостанатите 85 (27,1%) објекти. Географски, најмногу одобренија за градење во септември 2025 година се издадени во Полошкиот Регион, каде се евидентирани 98 одобренија. Во извештајниот период е предвидена изградба на 727 нови станови, со вкупна корисна површина од 69.411 квадратни метри. Одделот за внатрешна контрола, криминалистички истраги и професионални стандарди при Министерството за внатрешни работи (МВР) поднесе кривична пријава против полицискиот службеник Н.А., вработен во Полициската станица од општа надлежност Аеродром при СВР Скопје, поради постоење основи на сомнение за сторено кривично дело „тешка кражба“. Полицискиот службеник е осомничен за кривичното дело „тешка кражба“ по член 236 став 4 во врска со став 1 точка 1 и член 22 „соизвршителство“ од Кривичниот законик. Според пријавата, осомничениот Н.А. во повеќе наврати, во периодот од 5 јануари до 7 мај 2025 година, во претходен меѓусебен договор и заедничко дејствување со три други лица од Скопје, противправно одзеле туѓи подвижни предмети. Предметите на кражбата биле бакарни кабли – јавни инсталации кои содржат бакар, одземени од објекти на акционерско друштво од Скопје, сместени во кругот на поранешна фабрика во Скопје. По поднесувањето на кривичната пријава до Основното јавно обвинителство Скопје, на осомничениот полициски службеник му е одреден 30-дневен притвор. Од МВР информираат дека Одделот за внатрешна контрола, криминалистички истраги и професионални стандарди, покрај кривичната постапка, ќе поднесе и предлог за поведување постапка за утврдување на дисциплинска одговорност против Н.А. Како задолжителна мерка, против него ќе биде изречена и мерка отстранување од работното место – суспензија. Државниот завод за статистика објави дека во септември 2025 година, вкупниот број на туристи кои ја посетиле Македонија изнесувал 132.999, при што се остварени вкупно 262.686 ноќевања. Според податоците на ДЗС за септември, најмногу од посетителите биле странски туристи, кои учествувале со 75,4% од вкупниот број, додека 24,6% биле домашни туристи. Слично, во однос на ноќевањата, странските туристи оствариле 68,2% од вкупниот број, додека домашните 31,8%. Во септември 2025 година, најголем број странски туристи пристигнале од Турција со 32.950 посетители, следени од Србија со 8.830, Германија со 6.615 и Полска со 3.577 туристи. Податоците за првите девет месеци од 2025 година (јануари – септември) покажуваат позитивен тренд во туризмот, главно поттикнат од странските посетители. Вкупниот број на туристи е зголемен за 5,8% во однос на истиот период од претходната година, што се должи на значителното зголемување кај странските туристи од 9,6%, иако кај домашните туристи има благо намалување од 1,4%. Вкупниот број на ноќевања, пак, е зголемен за 0,9% во истиот период, со пораст кај странските туристи од 7,0% и намалување кај домашните од 3,8%. Премиерот Христијан Мицкоски денеска ја посети компанијата „Костал Македонија“ во Охрид, каде беше најавен нов инвестициски циклус вреден над 30 милиони евра за следната година, со кој ќе се отворат 200 нови работни места. Посетата ја истакна заложбата на Владата за поддршка на странските инвеститори и развојните цели на компанијата, која планира до 2027 година да достигне извоз и обрт од над 300 милиони евра. Извршниот директор на „Костал Македонија“, Виктор Мизо, потврди дека и покрај стагнацијата на автомобилскиот пазар, компанијата одлучила да продолжи со планот за инвестиции и развој. „Костал“ го проширува своето портфолио на клиенти и производи со дополнителните 30 милиони евра инвестиции, а целта е до 2027 година да биде една од трите најголеми фабрики-извозници во македонската индустрија. Мизо нагласи дека новите 200 вработувања ќе опфатат работници во производство, како и технички лица – инженери и луѓе во административни дејности, очекувајќи позитивен ефект не само за охридско-струшкиот регион, туку и за целата држава. Премиерот Мицкоски го изрази своето задоволство од довербата што „Костал“, како семеен бизнис со голема традиција и годишен обрт од околу 3,5 милијарди евра на ниво на групација, ја покажува кон Охрид и Македонија. ОВР Кавадарци до Основното јавно обвинителство Кавадарци поднесе кривична пријава против В.Д. (48) од Кавадарци, вработена како благајник во Јавното претпријатие за комунални работи Кавадарци. Таа е осомничена за сторени кривични дела „проневера во службата" и „затајување". Според поднесената пријава, постои основано сомнение дека пријавената В.Д., во периодот од 22.09.2025 до 31.10.2025 година, одзела вкупно 568.684 денари (околу 9.246 евра) од претпријатието. Имено, како благајник, таа била одговорна за парите од дневниот промет од наплатните пунктови, добиени по основ на платени сметки за водоснабдување и комуналии. Се сомнева дека дел од овие пари, кои ѝ биле доверени во службата, не ги внесувала на банкарската сметка на претпријатието, туку дел задржувала за себе, а остатокот го внесувала на сметката. Со овие дејствија, пријавената го оштетила Јавното претпријатие за комунални работи Кавадарци за наведената сума. 
