Турскиот национален авиопревозник, Turkish Airlines, потпиша договор со Boeing за набавка на вкупно 75 нови авиони од моделите Boeing 787-9 и 787-10, кои ќе бидат доставени помеѓу 2029 и 2034 година. Компанијата продолжува со преговори за набавка на мотори од Rolls-Royce и GE Aerospace, а по успешните преговори со CFM International, се очекува да бидат потпишани и договори за 737-8/10 MAX авионите. Како дел од својата „Vision 2033“, која ја нагласува 100-годишнината на авиокомпанијата, Turkish Airlines има за цел да ја прошири својата флота на над 800 авиони, при што ќе го зголеми уделот на авиони од следната генерација на 90% до 2033 година и на 100% до 2035 година. Ова дополнително ќе ја зајакне оперативната ефикасност, додека ќе се одржи просечен годишен раст од 6%. Новиот договор ќе помогне во понатамошното зајакнување на Истанбул како стратешки хаб за патнички и товарни летови, а истовремено ќе ги прошири можностите на Turkish Airlines за понуда на повеќе дестинации и за привлекување на туристи. Директорот на ТИРЗ, Гоце Димовски, денеска оствари работна средба со менаџментот на фабриката Баумер која работи во рамките на ТИРЗ Скопје 1. На средбата се разговараше за досегашните активности на фабриката, како и плановите за во иднина и потенцијалната нова инвестиција, по што беше реализирана и обиколка низ производствениот погон. Димовски нагласи дека дирекцијата за ТИРЗ ја поддржува секоја нова инвестиција која ќе донесе поголем економски раст за државата и ќе отвори нови работни места. „Како институција активно работиме за уште поголем развој на постоечките компании во рамки на зоните, но и за нови потенцијални инвестиции кои дополнително ќе влијаат позитивно на националната економија. Оваа Влада, уште од самиот почеток како главни цели ги постави економскиот раст, новите инвестиции и новите работни места, а со досегашните резултати по повеќе од една година, верувам дека можеме уште повеќе.“ - изјави Димовски. Директорот на фабриката, Соња Стефановска, посочи дека според резултатите кои се постигнати од страна на компанијата во изминатиот период, постојат можности за потенцијално зголемување на производните капацитети и воведување на нови технологии со што ќе се отворат и нови работни места. Швајцарската компанија Баумер произведува напредна сензорска технологија, енкодери, мерни инструменти од областа на електрониката. Компанијата е присутна со 39 подружници низ 19 земји од светот, а во Македонија е присутна од 2019 година, кога официјално го отвори производствениот капацитет во ТИРЗ Скопје 1, каде се наоѓа и истражувачкиот центар во кој работат инженери од областа на електрониката, информатиката и машинската технологија. Премиерот на Република Македонија, Христијан Мицкоски, најави дека од 1 октомври ќе започне исплатата на линеарното зголемување на пензиите, како дел од владината стратегија за поддршка на пензионерите во земјава. „Од 1 октомври ќе започне првата корекција на пензиите, односно линеарното зголемување. Потоа, дополнително ќе следи уште едно зголемување на пролет, со што ќе се заокружи инвестицискиот циклус за зголемување на пензиите“, изјави Мицкоски, одговарајќи на новинарско прашање во однос на најавеното есенско зголемување на пензиите. Како што посочи премиерот, по овој процес, вкупното зголемување на пензиите за секој пензионер ќе достигне 7.000 денари, што, како што истакна, значително ги надминува претходните ветувања за зголемување на пензиите од 5.000 денари за време на кампањата. М-НАВ АД Скопје ја информира македонската јавност дека по три дена интензивна работа, стручниот тим успешно го отстранил дефектот на електрониката на радарската глава Бањски рид. По поправката, на 24 септември 2025 година, во 16:40 часот, радарската глава беше вратена во функција и започнати се неопходни тестирања кои траеја до 25 септември 2025 година до 12 часот, кога истата беше повторно вклучена во системот за контрола на воздушниот сообраќај. Согласно информациите од М-НАВ, за време на нефункционалноста на радарската глава, безбедноста на воздушниот сообраќај не беше доведена во опасност. Сите безбедносни мерки беа имплементирани во согласност со меѓународните стандарди, а само беше забележан краткотраен намалување на протокот на летови на Меѓународниот аеродром Скопје. Од компанијата исто така нагласуваат дека било каква дезинформација која предизвикува страв кај јавноста само дополнително ја нарушува довербата во институциите и предизвикува штети на државата. М-НАВ АД Скопје упати благодарност до Владата на Република Македонија, како и до Министерот за транспорт и врски, г. Александар Николовски, за нивната безрезервна поддршка во овие моменти. Од почетокот на годината до август, новите регистрации на автомобили во Европската Унија бележат минимален пад од 0.1% во споредба со истиот период во 2024 година. Според податоците на Европската асоцијација на автомобилски производители (ACEA), уделот на батериски електрични автомобили (BEV) во вкупниот пазар достигна 15.8%, што претставува пораст во однос на 12.6% од минатата година. Сепак, ова сеуште е под темпото што е потребно за успешна транзиција кон електрични возила. Најпопуларна категорија остануваат хибридните електрични автомобили, кои продолжуваат да имаат најголем пазарен удел од 34.7%. Во првите осум месеци од 2025 година, во ЕУ се регистрирани вкупно 1.132.603 нови батериски електрични автомобили и сочинуваат 15.8% од пазарот. Големите пазари како Германија (+39.2%), Белгија (+14.4%) и Холандија (+5.1%) бележат раст во продажбата на електрични автомобили, додека Франција бележи пад од 2%. Регистрациите на хибридни електрични автомобили продолжуваат да растат, со вкупно 2.485.069 единици во првите осум месеци на 2025 година. Голем раст е забележан во Франција (+30.5%), Шпанија (+29.3%), Германија (+10.1%) и Италија (+9.4%). Овие автомобили сочинуваат 34.7% од вкупниот пазар на автомобили во ЕУ. Регистрациите на плуг-ин хибридни електрични автомобили (PHEV) продолжуваат да растат, достигнувајќи 631.783 единици во истиот период. Пазарниот раст е највисок во Шпанија (+99.9%), Германија (+61.2%) и Италија (+62.6%), што доведе до зголемување на уделот на оваа категорија на 8.8%, во споредба со 6.9% во 2024 година. Во исто време, продажбата на бензински и дизел автомобили продолжува да опаѓа. Бензинските автомобили бележат пад од 19.7%, сите големи пазари забележуваат намалување: Франција (-33.5%), Германија (-25.2%), Италија (-17.6%) и Шпанија (-13.1%). Во целокупниот пазар, уделот на бензинските автомобили падна на 28.1% од 34.9% минатата година. Дизел автомобилите имаат удел од 9.4% во 2025 година. Промените на годишно ниво покажуваат пад од 16.3% на бензинските автомобили и 17.5% на дизел автомобилите. 40 штеки цигари, 5 грама марихуана, 2.700 ќесички суплементи, 17 парфеми, 7.500 евра, 600 пакувања со вештачки трепки, 35 литри алкохолни пијалоци и разна друга стока е запленета во текот на изминатите денови, во случаи на откриени прекршочни дела, при што против сторителите е спроведена соодветна постапка. Најголем дел од случаите се откриени од мобилните тимови кои при контроли извршени на граничните премини и во внатрешноста на државата открија и спречија повеќе прекршочни дела: - 40 штеки цигари и 17 парфеми, се откриени на Меѓуградската автобуска станица при контрола на автобус со турски регистарски таблички кој сообраќал на редовната линија Истанбул-Гостивар, извршена на Меѓуградската автобуска станица Скопје. Непријавените производи биле пронајдени на повеќе места во внатрешноста на автобусот - фиоката над возачот, позади возачкото седиште, во фиоката над предните скали, под и на претпоследните седишта и во просторот за одмор на возачите. - Пет грама опојна дрога марихуана е откриена при контрола на патнички кампер со швајцарски регистарски таблички со кој француски државјанин се пријавил за влез во државата на граничниот премин Блаце. - При претрес на возач на автобус на граничниот премин Табановце, откриени се непријавени 9.500 евра. На лицето, македонски државјанин, согласно законските прописи му се вратени две илјади евра, а останатите 7.500 евра се запленети. - Во друг случај на граничниот премин Табановце, мобилен тим при контрола на камион со скенер, откри разна стока која не била пријавена меѓу која и опрема за уредување на домот. - При контрола на минибус на влез во државата на граничниот премин Блаце се откриени дури 2.700 ќесички со суплементи Arabesca Genitals и Arabesca Slim Mix, кои биле скриени на различни места во возилото. Возачот на минибусот, изјавил дека пронајдената стока е пратка која требало да ја достави на лице во Скопје. - Вкупно 600 пакувања со вештачки трепки, се пронајдени при контрола на патните торби на италијанска државјанка кој допатувала на Меѓународниот аеродром Скопје со лет од Рим. - При контрола на стока со потекло од Турција наменета за фирма од Гостивар, пријавена за увозно царинење во царинската испостава Скопје 4 се запленети 120 пара чорапи со ознаки на заштитена трговска марка поради основано сомневање дека повредуваат права од интелектуална сопственост. Во други случаи царински службеници на граничните премини Дојран и Табановце, открија прекршочни дела при што се запленети употребувана пумпа, 35 литри алкохолни пијалоци, 117 парчиња облека и разна друга стока. Агенцијата за аудио и аудиовизуелни медиумски услуги го одржа третиот јавен состанок за оваа година, на кој директорот д-р Зоран Трајчевски направи пресек на реализираните активности согласно Годишната програма за работа во изминатите три месеци. Присутните имаа можност да слушнат за активностите поврзани со мониторингот на известувањето на радиодифузерите за Локалните избори 2025, спроведените надзори врз радиодифузерите, операторите на јавни електронски комуникациски мрежи, издавачите на печатени медиуми, изречените мерки јавна опомена, доделените дозволи за радио емитување, активностите на полето на меѓународната соработка. На состанокот беа презентирани и наодите од Анализата на пазарот на аудио и аудиовизуелни медиумски услуги за 2024 година. Анализата содржи податоци за економското работење на радиодифузерите, односно податоци за вкупните приходи, вкупните трошоци, финансискиот резултат од работењето и просечниот број на вработени. Вкупните приходи во индустријата во 2024 година изнесувале 3.219,21 милиони денари, додека вкупните трошоци 2.994,12 милиони денари. Вкупните приходи на МРТ биле значително повисоки отколку во претходните години и изнесувале 1.365,55 милиони денари, додека вкупните трошоци изнесувале 1.266,52 милиони денари. Јавниот сервис работел со добивка во износ од 87,81 милион денари, што е најдобар финансиски резултат остварен во последните шест години. Приходите што ги оствариле сите комерцијални телевизии заедно изнесувале 1.607,39 милиони денари, додека вкупните трошоци изнесувале 1.503,13 милиони денари. Вкупните приходи на пазарот на радијата изнесувале 246,27 милиони денари, а трошоците на радиостаниците изнесувале 224,47 милиони денари. Просечниот број вработени лица во редовен работен однос во 36-те комерцијални телевизии изнесувал 887 лица, додека кај радиостаниците изнесувал 186 лица. 
