Министерот за транспорт, Александар Николоски, оствари работна средба со претставници на меѓународната туристичка групација „Корендон“, една од најголемите во Европа. Во фокусот на разговорите беа можностите за продлабочување на соработката во областа на авиосообраќајот, привлекувањето странски туристи и потенцијалните инвестиции во домашната туристичка инфраструктура.
За време на средбата, вицепремиерот Николоски ги истакна потенцијалите на земјава како атрактивна дестинација, нагласувајќи дека Македонија бележи раст од 40 проценти на патници во доаѓање во авиосообраќајот и преку 20 проценти зголемување на бројот на странски туристи.
Тој посочи дека веќе се договорени 28 нови дестинации и дека целта на Владата е овој позитивен тренд да се претвори во нови директни авиолинии, поголем прилив на гости и нови странски вложувања. Подобрата авиоповрзаност и отворањето на нови пазари беа посочени како клучни фактори за понатамошниот развој на домашниот туризам.
Групацијата „Корендон“ е меѓу трите водечки туроператори во Холандија и Белгија и нуди пакет-патувања до повеќе од 50 дестинации низ светот. Покрај туроператорските услуги, компанијата располага со сопствена флота од над 40 авиони кои летаат под знамињата на Холандија, Малта и Турција.
На годишно ниво нивните туроператорски услуги ги користат околу 850.000 клиенти, додека авиокомпанијата „Корендон ерлајнс“ превезува меѓу 6 и 10 милиони патници. На средбата беше заклучено дека постои реален простор за идна соработка преку воспоставување нови воздушни врски и носење туристи од Западна Европа во Македонија. Според најновите официјални статистички податоци, во јуни во државава се евидентирани вкупно 113.436 туристи кои оствариле 221.608 ноќевања. Околу 77,2 проценти од вкупниот број туристи се од странство, додека домашните посетители учествувале со 22,8 проценти.
Слична е состојбата и кај престојот, каде што од вкупните 221.608 ноќевања во јуни, 70,8 проценти се остварени од странски туристи, а останатите 29,2 проценти се домашни гости.
Анализата на земјите од каде што пристигнале странските гости покажува дека Турција е на првото место со 24.570 туристи. По неа следува Србија од каде што дошле 8.522 посетители, потоа Германија со 4.396 туристи и Бугарија со 3.207 остварени посети.
Вкупниот број на туристи во првите шест месеци во споредба со истиот период лани е намален за 0,5 проценти. Притоа, кај домашните туристи е забележан пад од 3,1 процент, додека кај странските туристи има благ раст од 0,3 проценти.
Кај вкупниот број ноќевања во периодот јануари-јуни 2026 година е евидентирано намалување од 1,5 проценти во споредба со истиот период лани. Во овој сегмент падот кај домашните туристи изнесува 3,3 проценти, додека кај странските гости намалувањето на ноќевањата е незначително и изнесува 0,7 проценти. Вкупната вредност на извозот на стоки од Македонија во периодот јануари-јуни 2026 година достигна 4,36 милијарди евра, што претставува раст од 8% во споредба со истиот период минатата година. Во истиот шестмесечен интервал, вредноста на увезената стока во земјата изнесува 6,11 милијарди евра, со што е забележано зголемување од 7,69% во однос на првите шест месеци лани.
Во структурата на македонскиот извоз и понатаму доминираат производите со висока додадена вредност од автомобилската и хемиската индустрија. Најголемо учество во извозните активности имаат катализаторите на носачи со благородни метали или нивни соединенија, како и останатите типови катализатори. Веднаш зад нив следуваат сетовите на проводници за палење кои се користат за возила, авиони или бродови, како и деловите за седишта, што уште еднаш ја потврдува клучната улога на капацитетите во технолошките индустриски развојни зони за домашната економија.
На страната на увозот, најголемо учество заземаат суровините за преработувачката индустрија и енергентите. Најмногу се увезувале платина и легури на платина во необработена форма или во прав, заедно со останатите метали од платинската група. Покрај благородните метали кои главно се користат како репроматеријали за домашните извозни капацитети, значаен удел во увозната структура имаат нафтените масла и маслата добиени од битуменозни минерали, како и моторните возила за превоз на патници.
Географската распределба на надворешнотрговската размена покажува силна концентрираност кон традиционалните европски и регионални пазари. Во периодот јануари-јуни, најголем обем на трговска размена е остварен со Германија, Велика Британија, Кина, Грција и Србија. Овие пет земји заедно учествуваат со 50% во вкупната надворешнотрговска размена на државата. Дополнително, земјите членки на Европската Унија и понатаму се најважниот стратешки пазар, заземајќи 58,5% од вкупната трговска размена на Македонија со странство. Домашниот електроенергетски систем во Македонија е целосно стабилен и подготвен, а ниските водостои во Европа во моментов не претставуваат никаков ризик за сигурноста на домашното производство на електрична енергија, соопштија од Министерството за енергетика, рударство и минерални суровини.
Стабилни акумулации и раст на производството на струја од хидроелектраните
Вкупната исполнетост на домашните акумулации во моментов изнесува околу 70 проценти, што овозможува сигурно и непречено управување со хидропотенцијалот за покривање на актуелните потреби на граѓаните и стопанството.
Податоците на Државниот завод за статистика покажуваат дека во мај годинава во земјава се произведени 462.653 MWh електрична енергија, со што се покриени дури 96,5 проценти од домашната потрошувачка. Според АД ЕСМ, регистрирано е драстично зголемување на производството од хидроелектраните за 76 проценти во споредба со истиот период лани, додека ветерните електрани бележат раст од околу 10 проценти.
Инвестиции во обновливи извори и батериски системи
Од Министерството истакнуваат дека во тек се значајни инвестиции за диверзификација на изворите на енергија. Активно се работи на втората фаза од ветерниот парк „Богданци“ за достигнување капацитет од 50 MW, а започнуваат и активностите за фотонапонските централи „Битола 1“ и „Осломеј 2“, додека подготовките за „Битола 2“ и „Битола 3“ се во напредна фаза.
Паралелно со сончевите и ветерните централи, се создаваат законски и технички услови за поширока примена на батериски системи за складирање на електричната енергија, со што дополнително ќе се зајакне стабилноста на мрежата.
Македонија станува клучна транзитна точка за гас во регионот
На полето на регионалното поврзување, интензивно се реализира проектот за гасниот интерконектор со Грција, а во подготовка е и интерконекторот со Србија.
По посебната покана за приклучување кон Вертикалниот гасен коридор, Македонија станува дел од важна европска мрежа на гасоводи и терминали. Оваа иницијатива овозможува природниот гас да се движи од југ кон север на Европа преку повеќе правци, со што домашните интерконектори добиваат меѓународно стратешко значење, а државата се позиционира како важна транзитна точка за снабдување со гас во Југоисточна и Централна Европа. Бројот на работниците во македонската индустрија во јуни бележи намалување од 2,3 проценти во споредба со истиот месец од претходната година, соопшти Државниот завод за статистика.
Според официјалните податоци, најизразен пад е забележан во секторот Рударство и вадење на камен, каде што бројот на вработени се намалил за 7,7 проценти. Во Преработувачката индустрија, која ангажира најголем дел од работната сила, намалувањето изнесува 2,1 процент. Единствен сектор што бележи благо зголемување на бројот на работници е Снабдувањето со електрична енергија, гас, пареа и климатизација со раст од 0,2 проценти.
Анализирано по главни индустриски групи, сите сектори бележат пад на работната сила во јуни во споредба со истиот месец лани. Најголемо намалување има кај Нетрајните производи за широка потрошувачка за 3,5 проценти. Секторите Енергија и Интермедијарни производи, освен енергија, бележат идентичен пад од по 2,4 проценти, Капиталните производи се намалени за 1,8 проценти, додека кај Трајните производи за широка потрошувачка е регистриран пад од 1,7 проценти.
Кумулативните податоци на ДЗС покажуваат дека во целото прво полугодие, односно во периодот јануари-јуни 2026 година, вкупниот број на работници во индустријата е намален за 2,9 проценти во споредба со истиот период од 2025 година. Аеродромот „Св. Апостол Павле“ во Охрид, управуван од „ТАВ Македонија“, го забележа најуспешниот јули во својата историја, поставувајќи нов рекорд и во бројот на патници и во бројот на летови.
Во текот на јули преку охридскиот аеродром патувале 52.544 патници, што е раст од 41,21 процент во споредба со истиот месец минатата година, а биле реализирани 443 летови (раст од 34,65 проценти). Во истиот месец е урнат и дневниот рекорд, при што на 26 јули се опслужени 2.988 патници, додека на 20 јули се реализирани рекордни 22 летови во еден ден.
Во периодот јануари-јули 2026 година, преку охридскиот аеродром поминале вкупно 175.182 патници (раст од 24,24 проценти) и се реализирани 1.350 летови.
Над 2,4 милиони патници на двата аеродроми
Силен раст бележи и Меѓународниот Аеродром Скопје. Во јули се опслужени 408.925 патници (раст од 29,5 проценти) со 2.670 летови. Најфреквентен ден во Скопје бил 31 јули со 16.347 патници, додека најмногу летови во еден ден (101 операција) се регистрирани на 20 јули.
Во првите седум месеци од 2026 година, скопскиот и охридскиот аеродром заедно опслужија 2,42 милиони патници и 16.280 летови, што претставува зголемување од 28,4 проценти во патничкиот сообраќај и 8,6 проценти во бројот на операции.
Генералниот директор на „ТАВ Македонија“, Неџат Курт, истакна дека рекордните резултати се потврда за посветената работа, проширувањето на мрежата на авиолинии и заедничките активности со Владата за привлекување нови авиокомпании. Тој појасни дека и покрај тековната реконструкција на охридскиот аеродром, сообраќајот се одвива без никакви прекини.
Македонија е лидер во растот според ACI Europe
Според најновиот извештај на Меѓународниот совет на аеродроми - Европа за првата половина од 2026 година, Македонија е лидер меѓу земјите кои не се членки на ЕУ во однос на растот на патничкиот сообраќај, со скок од 27,9 проценти. Земјава се наоѓа пред Молдавија (+21%), Албанија (+17,2%), Узбекистан (+15,7%), Ерменија (+11%) и Црна Гора (+10,4%).
Дополнително, ACI Europe го рангираше Меѓународниот Аеродром Скопје меѓу најбрзорастечките средни аеродроми во Европа, со забележан пораст на патничкиот сообраќај од 28,6 проценти. Словенечката инженерска и технолошка компанија „ИНЕА“ разгледува можност за нова потенцијална инвестиција во технолошко-индустриските развојни зони во Македонија, вредна најмалку 15 милиони евра. Проектот предвидува отворање на најмалку 100 нови работни места.
За можностите и условите за реализација на оваа инвестиција, директорот на Дирекцијата за ТИРЗ, Гоце Димовски, оствари работна средба со генералниот директор на компанијата од Љубљана, Алесандро Лупис.
За време на средбата, директорот Димовски ги претстави поволностите кои ги нудат ТИР зоните во соработка со Владата, акцентирајќи ги стратешката локација, современата инфраструктура, стручната работна сила и пакетот мерки за поддршка. Тој потенцираше дека ДТИРЗ обезбедува континуирана поддршка за инвеститорите во сите фази од процесот. Генералниот директор на „ИНЕА“, Алесандро Лупис, изрази задоволство од средбата и најави продолжување на комуникацијата за разгледување на сите детали околу потенцијалната инвестиција.
ИНЕА е компанија специјализирана за индустриска автоматизација, дигитализација на производствените процеси, роботика и енергетски менаџмент, која со своите решенија им помага на компаниите да ја зголемат ефикасноста, продуктивноста и конкурентноста. Компанијата има реализирано бројни проекти на меѓународно ниво и претставува пример за високотехнолошки развој и иновации. Со повеќе од 35 години искуство и над 3.000 реализирани проекти во повеќе од 30 земји, ИНЕА е препознаена како партнер за развој и имплементација на современи решенија во индустриската автоматизација, дигитализацијата и управувањето со енергија.
Компанијата соработува со водечки глобални технолошки компании, меѓу кои AVEVA, Siemens, Rockwell Automation и Dassault Systèmes, придонесувајќи кон унапредување на производствените процеси и воведување на иновативни технологии. 
