Економија

Анализа на АВМУ: Колкави се приходите во телевизиите и радијата?

Агенцијата за аудио и аудиовизуелни медиумски услуги го одржа третиот јавен состанок за оваа година, на кој директорот д-р Зоран Трајчевски направи пресек на реализираните активности согласно Годишната програма за работа во изминатите три месеци. Присутните имаа можност да слушнат за активностите поврзани со мониторингот на известувањето на радиодифузерите за Локалните избори 2025, спроведените надзори врз радиодифузерите, операторите на јавни електронски комуникациски мрежи, издавачите на печатени медиуми, изречените мерки јавна опомена, доделените дозволи за радио емитување, активностите на полето на меѓународната соработка. На состанокот беа презентирани и наодите од Анализата на пазарот на аудио и аудиовизуелни медиумски услуги за 2024 година. Анализата содржи податоци за економското работење на радиодифузерите, односно податоци за вкупните приходи, вкупните трошоци, финансискиот резултат од работењето и просечниот број на вработени. Вкупните приходи во индустријата во 2024 година изнесувале 3.219,21 милиони денари, додека вкупните трошоци 2.994,12 милиони денари. Вкупните приходи на МРТ биле значително повисоки отколку во претходните години и изнесувале 1.365,55 милиони денари, додека вкупните трошоци изнесувале 1.266,52 милиони денари. Јавниот сервис работел со добивка во износ од 87,81 милион денари, што е најдобар финансиски резултат остварен во последните шест години. Приходите што ги оствариле сите комерцијални телевизии заедно изнесувале 1.607,39 милиони денари, додека вкупните трошоци изнесувале 1.503,13 милиони денари. Вкупните приходи на пазарот на радијата изнесувале 246,27 милиони денари, а трошоците на радиостаниците изнесувале 224,47 милиони денари. Просечниот број вработени лица во редовен работен однос во 36-те комерцијални телевизии изнесувал 887 лица, додека кај радиостаниците изнесувал 186 лица.

Средба на Николоски и Казидакис, во фокусот е изградбата на брза пруга на коридорот 10

Заменик претседателот на Владата и министер за транспорт Александар Николоски денеска во Атина оствари работна средба со вицепремиерот на Владата на Грција, Костис Казидакис. Ова е прва средба на двајцата вицепремиери со која се истакна важноста и промоцијата на економската соработка и регионалните инфраструктурни проекти. На средбата беа потврдени заложбите на двете земји за подобра регионална соработка во делот на инфраструктурата, транспортот и услугите. Беа презентирани стратешките приоритети на Владата во инфраструктурата и се потенцира важноста од поефикасно регионално поврзување како предуслов за забрзан економски развој на регионот. Се истакна силната одлучност на двете Влади за изградба на брзата пруга на коридорот 10, регионален проект кој ќе овозможи развој на трговијата, зголемување на размената меѓу двете држави и брза врска на пристаништата во Грција со пазарите во Централна Европа. На средбата се презентираа усовите за инвестирање во земјата како и можноста за поголема економска и трговска соработка меѓу бизнис заедницата на двете земји. На средбата заклучија дека соработката и реализацијата на проектите од регионално значење ќе продолжи во следниот период во насока на зголемување на ефикасноста на транспорот и меѓуграничната соработка.

Владата потпиша договор за соработка со Обединетото Кралство за модернизација на железничката инфраструктура

Министерот за транспорт Александар Николоски најави важен чекор напред во развојот на железничката инфраструктура во земјава. На редовна седница на Владата е разгледана и усвоена информацијата за склучување на договор за соработка помеѓу Јавното претпријатие за железничка инфраструктура – Скопје и Јавното тело на Министерството за транспорт на Владата на Обединетото Кралство, Кросрејл Интернешнал Лимитед (Crossrail International Limited - CIL). Овој договор за соработка претставува значаен потег за модернизација на македонската железничка мрежа, со посебен фокус на развојот на брзата железница и товарниот железнички сообраќај. Како дел од договорот, двете страни ќе соработуваат преку споделување на експертиза, искуства, добра практика и научени поуки во областите како што се сигнални и контролни системи, надградба на инфраструктурата, модернизација на депоата и железничкиот возен парк. "Овој договор е продолжување на веќе успешната соработка помеѓу нашата влада и владата на Обединетото Кралство, која започна во контекст на партнерството за реализација на приоритетни инфраструктурни проекти," изјави министерот Николоски. "Со оваа соработка, ќе имаме можност да ја унапредиме нашата железничка инфраструктура и да го зајакнеме транспортниот сектор во Македонија." Договорот е важечки пет години, со можност за продолжување на уште пет години, и ќе има значајно влијание врз развојот на железничката инфраструктура и економскиот раст на земјата.

Американски Wabtec ќе испорача 300 локомотиви на Казакстан во вредност од 4,2 милијарди евра

Министерството за трговија на САД го објави потпишувањето на историскиот трговски договор во транспортниот сектор помеѓу американската компанија Wabtec и Владата на Казахстан, во рамки на свечена церемонија која се одржа за време на 80. Генерално собрание на Обединетите нации во Њујорк. Според договорот, вреден 4,2 милијарди долари, Wabtec ќе испорача 300 локомотиви на казахстанските железници во следната деценија, што е најголем договор за железничка опрема во историјата. Локомотивите од серијата Evolution ES44Aci, кои ќе бидат испорачани како монтажни комплети, се наменети за тешки товарни услуги и ќе се произведуваат во САД, со што се очекува да се поддржат повеќе од 11.000 добро платени американски работни места.

Мицкоски оствари средба со претседателот на Стопанската комора на Дубаи

Денес во Владата се одржа работна средба на која присуствуваше претседателот на Владата, Христијан Мицкоски, претставници од бизнис заедницата и Мохамед Али Рашед Лута, претседател и главен извршен директор на Стопанската комора на Дубаи. На средбата премиерот Мицкоски информираше дека приоритет на Владата е економската стабилизација на земјата, односно како што рече тој да донесеме што е можно повеќе странски, директни инвестиции и секако да ги подржи домашните директни инвеститори. Мохамед Али Рашед Лута претседател и главен извршен директор на Стопанска комора на Дубаи на средбата истакна: „Растечката соработка меѓу Дубаи и Северна Македонија ја одразува нашата заедничка амбиција да изградиме отпорни економии и да поттикнеме одржлив развој. Трговијата меѓу нашите пазари достигна вкупно 495 милиони американски долари во текот на изминатите пет години, нагласувајќи го долгорочниот тренд на позитивен ангажман и растечки можности. Овој моментум се одразува и во растечкото присуство на македонските компании во Дубаи во различни сектори.“ Мохамед Али Рашед Лута додаде: „Стопанската комора на Дубаи останува посветена на зајакнување на врските меѓу нашите деловни заедници и промовирање на инвестициски текови што ги унапредуваат нашите заеднички приоритети. Гледаме значаен потенцијал во ова партнерство и сме решени да осигуриме дека ќе донесе опипливи резултати преку проширена трговија и подлабока соработка за обликување на долгорочен просперитет на двата пазара.“

РКЕ ја зголеми цената на дизелот и мазутот, новите цени стапуваат на сила од полноќ

Регулаторната комисија за енергетика, водни услуги и услуги за управување со комунален отпад (РКЕ) донесе одлука за зголемување на малопродажните цени на нафтените деривати во просек за 0,26% во однос на претходната пресметка од 15.09.2025 година. Оваа промена ќе се одрази на цените на дизелот, екстра лесното масло и мазутот, додека цените на бензините остануваат непроменети. Според последната пресметка, референтните цени на нафтените деривати на светскиот пазар покажуваат мешан тренд. Бензините поевтинуваат за 0,368%, додека цените на дизелот, екстра лесното масло и мазутот се зголемуваат. Така, дизелот бележи зголемување од 2,18%, екстра лесното масло за 1,48%, а мазутот за 1,69%. Дополнително, ослабувањето на курсот на денарот во однос на доларот за 0,6675% има влијание врз цените на нафтените деривати. Од 23 септември 2025 година, од 00:01 часот, максималните малопродажни цени на нафтените деривати ќе бидат: - Моторен бензин ЕУРОСУПЕР БС-95 – 75,50 денари/литар. - Моторен бензин ЕУРОСУПЕР БС-98 – 77,50 денари/литар. - Дизел гориво ЕУРОДИЗЕЛ БС (Д-Е V) – 69,50 денари/литар. - Масло за горење Екстра лесно (ЕЛ-1) – 69,00 денари/литар. - Мазут М-1 НС – 36,947 денари/кг. Сите други нафтени деривати, освен дизелот и мазутот, ќе останат на исти цени. Малопродажната цена на дизелот ќе се зголеми за 0,50 ден/лит, додека мазутот ќе поскапе за 0,207 ден/кг. РКЕ нагласува дека овие цени претставуваат максимални износи и дека трговците на големо и мало со нафтени деривати и горива за транспорт имаат право да ги формираат цените и пониско од утврдените максимуми.

Брако испорача 50 возила за чистење во главниот град на Саудиска Арабија

Над 50 возила за чистење Грин Машинс произведени во фабриката БРАКО од Велес се продадени во главниот град на Саудиска Арабија, Ријад. Со тоа, македонскиот инженерски производ се најде во служба на еден од најголемите урбани проекти на Блискиот Исток. Од производствените хали на БРАКО во Велес, директно на улиците на Ријад – над 50 специјализирани возила GM636 се веќе испорачани и активно се користат за одржување на хигиената во главниот град на Саудиска Арабија. Се работи за голема и комплексна испорака, во рамки на една од најобемните јавни програми за чистење во тој регион, каде што повеќе изведувачи беа ангажирани за чистење на различни делови од градот. 50 возила од брендот Грин Машинс на БРАКО се вклучени во тој проект. За потребите на проектот во Ријад, тимот на БРАКО дополнително го зајакна моделот, прилагодувајќи го за работа во специфични климатски услови и за ефикасно справување со песочни наноси на улиците и јавните површини. Испораките за Саудиска Арабија не завршуваат тука – фабриката во Велес очекува нови нарачки за возила за чистење и во други саудиски урбани центри.

Југоисточниот регион со најголемо учество во бруто додадената вредност во земјоделството

Според податоците од Државниот завод за статистика, Југоисточниот регион на Македонија има најголемо учество во креирањето на бруто-додадената вредност во земјоделството за 2023 година, со учество од 31.6%. Следен по важност е Пелагонискиот регион, кој придонесува со 27.8% во оваа вредност, додека најмало учество има Југозападниот регион со само 2.0%. Во поглед на структурата на земјоделското производство, Југоисточниот регион исто така доминира во создавањето на вредноста на растителното производство со учество од 32.8%, додека Пелагонискиот регион има најголемо учество во добиточното производство со 20.8%.

МВР објави тендер за нови униформи за полицијата

Министерството за внатрешни работи објави тендер за нови униформи и за замена на старите, непрактични и нефункционални униформи со нови, модерни, квалитетни и функционални по терк на европските полиции. Министерството оствари технички дијалог со 13 заинтересирани компании при што беа земени во предвид сите сугестии и предлози. Министерството апелира на тендерот да се јават сите заинтересирани компании и во утврдените рокови, да може да се промовира новата, модерна, квалитетна и функционална униформа за оние кои се грижат за безбедноста на македонските граѓани. Новата униформа во себе ќе содржи елементи како виндјакна, теренска јакна, летни и зимски теренски панталони, кошули со кратки и долги ракави, капи, маички, чевли со потенок и подебел ѓон и високи зимски и летни тактички чизми. Тендерот е објавен на електронскиот систем за е-набавки и на него можат да учествуваат сите заинтересирани компании.

Трамп најави трговски и воени договори со Турција

Претседателот на САД, Доналд Трамп, преку објава на социјалната мрежа TruthSocial, потврди дека на 25 септември во Белата Куќа ќе го пречека претседателот на Турција, Реџеп Тајип Ердоган. Трамп изрази задоволство од продолжената соработка меѓу двете земји, особено во сферата на трговијата и одбраната. „Работиме на многу трговски и воени договори со претседателот Ердоган, вклучувајќи и голема набавка на авиони Боинг, значаен договор за Ф-16 и продолжување на преговорите за Ф-35, кои очекуваме да завршат позитивно“, напиша Трамп. Претседателот на САД изрази уверување дека односите меѓу него и Ердоган се одлични и дека со нетрпение го очекува состанокот.