Министерот за култура, Зоран Љутков, денес пред јавноста го презентираше визуелното решение за изградбата на новата Универзална сала. Проектот кој се очекува да чини 20 милиони евра, има за цел да го врати значењето на оваа култна локација и да ѝ даде нова енергија на културната сцена во Скопје. Според министерот, клучна карактеристика на новиот објект е тоа што ќе ја задржи постоечката, препознатлива форма, како почит кон колективната меморија. Сепак, сала ќе биде целосно модерна и функционална. Планираниот капацитет е 1.200 седишта, а салата ќе биде опремена со најнова технологија за врвна акустика, како и современа сценска техника, LED осветлување и аудио-видео системи. Покрај тоа, новиот објект ќе биде енергетски ефикасен, а за неговата изградба ќе се користат нови, современи материјали. Проектот вклучува и модерно партерно и хортикултурно уредување на околниот простор, со цел да се создаде атрактивна и пријатна околина за посетителите. Министерството очекува дека постапката за избор на изведувач и надзор ќе биде завршена на почетокот на октомври, со што веднаш потоа би започнала изградбата по систем „клуч на рака“. Планирано е градежните активности да се завршат до крајот на 2027 година, за да може Универзалната сала гордо да биде дел од програмата „Скопје - Европска престолнина на културата“ во 2028 година. Градоначалникот на Струмица, Костадин Костадинов, денеска соопшти дека е пуштена во сообраќај првата делница од новиот булевар што ги поврзува Струмица и Дабиле. Проектот, како што истакна Костадинов, е заедничка инвестиција на Јавното претпријатие за државни патишта (ЈПДП) и Општина Струмица, со средства обезбедени од буџетот. Градоначалникот потенцираше дека реализацијата на овој важен инфраструктурен проект е резултат на соработката на повеќе лица. Тој посочи дека проектот е започнат во времето на директорот на ЈПДП, Зоран Китанов, а партнерскиот договор е потпишан од негова страна заедно со тогашниот директор Ејуп Рустеми. Првата делница е завршена во соработка со сегашниот директор Коце Трајановски, на кои Костадинов им се заблагодари за придонесот. Костадинов посебно му се заблагодари на својот општински тим за нивните напори во надминувањето на бројните имотно-правни проблеми кои го одложуваа завршувањето на првата делница. Тој ја призна нервозата кај граѓаните поради пролонгирањето на изградбата, но објасни дека причината се сложените законски процедури. Според градоначалникот, важноста на овој булевар е огромна. Тој не само што ќе го растовари сообраќајот на една од најфреквентните делници, туку и ќе овозможи подобра поврзаност на голем дел од околните села. Со булеварската врска, Дабиле ќе добие третман на градска населба, со директен пристап до центарот на Струмица, две индустриски зони и врска кон Република Бугарија. Денес, по иницијатива и залагање на министерката за енергетика, рударство и минерални суровини Сања Божиновска, започна сериозен институционален процес за заштита на македонскиот рубин – геолошки уникат што се наоѓа единствено во Прилеп и Мариово и е единствениот рубин во Европа кој природно се вади и обработува. На состанокот меѓу Министерството за енергетика, рударство и минерални суровини, Геолошкиот завод и Заводот за индустриска сопственост беа дефинирани конкретни чекори за да се обезбеди официјален статус на македонскиот рубин како заштитено национално минерално наследство. Геолошкиот завод ги запозна присутните со веќе изработената анализа за правната заштита, која ќе биде надополнета согласно новите податоци, а дополнително беше истакната и потребата од поширока институционална координација. На средбата присуствуваше и долгогодишниот промотор на македонскиот рубин, Деко, кој ја пренесе историјата и значењето на секој примерок изработен со овој исклучителен камен. „Македонскиот рубин, единствен по своето потекло и својства, заслужува институционална заштита и признавање како национално богатство. Ова е само почеток на поголем процес на заштита, вреднување и меѓународна промоција на македонското минерално богатство – како дел од националниот идентитет и нашата природна гордост.“ порача министерката Божиновска. Рубинот што се вади во Македонија е геолошки и естетски уникат: познат е како корунд со карактеристична малиново-розева боја, која се јавува поради присуството на хром во неговата кристална структура. Се наоѓа исклучиво во околината на Прилеп и во планините на Мариово, што го прави единствен природен рубин во копнената Европа кој се обработува локално. Покрај својата естетска и колекционерска вредност, тој претставува дел од културното и историското наследство на земјата – симбол на природната убавина и националната гордост. Извршниот одбор на Народната банка усвои нова Одлука за макропрудентните мерки поврзани со макропрудентните инструменти за квалитетот на кредитната побарувачка од физичките лица. Со оваа одлука се регулираат основните показатели со кои се оценува кредитоспособноста на физичките лица, кога тие бараат кредити од банките и од штедилниците. Мерките ќе се применуваат од 1 декември 2025 година. Гувернерот д-р Трајко Славески на конференцијата за печатот објасни дека со новата одлука се олеснува кредитирањето за купување или градење прво живеалиште, односно стан или куќа наменети за сопствено живеење. Но, имајќи ги предвид условите на пазарот на недвижности, особено во главниот град, што водат кон забрзан раст на цените на становите, поради што стануваат недостапни за помладите генерации, се врши и затегнување на условите за користење кредит за станбен објект којшто не претставува примарно живеалиште за кредитобарателите. „За сите лица со нерешено станбено прашање, коишто навистина немаат стан/куќа на свое име каде што би живееле, а се очекува дека тоа ќе бидат претежно млади лица и млади брачни парови, со новата одлука се дозволува, без да се наруши пристапот на прудентност, тие да добијат станбен кредит и со учество од 10% од вкупната вредност на објектот за живеење. Наспроти ова, за сите останати случаи, минималното сопствено учество се зголемува од постојните 15% на 25% од вредноста на станот. Исто така, за корисниците на станбени кредити наменети за купување или градење прво живеалиште, ќе останат во важност досегашните лимити на показателот ДСТИ, коишто изнесуваат 55% за изложеноста во денари и 50% за изложеноста со валутна компонента. За сите останати баратели на кредити се предвидуваат пониски нивоа за овие показатели, и тоа од 50% за изложеноста во денари и 45% за изложеноста со валутна компонента.“ - изјави Славески. Имено, олеснувањето при купување прв стан се однесува на лицата коишто навистина немаат стан или куќа на свое име и планираат да купат или да изградат дом за сопствено живеење, за што треба да исполнат одредени критериуми, а се воспоставуваат соодветни механизми за проверка и следење, коишто се детално образложени во Одлуката. „Промените во макропрудентните мерки имаат превентивен карактер и нивната цел е да нѐ заштитат сите нас од прекумерна задолженост, што може да се одрази понатаму на способноста за редовно отплаќање на обврските, како и на вкупната стабилност на финансискиот систем. Истовремено, со овие промени внимаваме да не „ги погодиме“ оние лица кои имаат потреба да го решат своето животно, станбено прашање, овозможувајќи им поповолни критериуми и полесен пристап до кредити, во однос на останатите корисници на кредити“, посочи гувернерот Славески. Со ваквиот пристап, Народната банка се усогласува со практиката на голем број други централни банки во светот. Регулаторната комисија за енергетика, донесе Одлука со која се врши намалување на малопродажните цени на нафтените деривати во просек за 0,62 % во однос на одлуката од 9.09.2025 година. Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 0,075%, кај дизелот за 0,414%, кај екстра лесното масло за 0,058% и кај мазутот намалувањето е за 1,145%. Курсот на денарот во однос на доларот во изминатиот период по кој беа формирани цените со претходната пресметка е понизок за 0,3613%. Од 16.9.2025 година од 00:01 часот максималните цени на нафтените деривати ќе изнесуваат: - Моторен бензин ЕУРОСУПЕР БС - 95 – 75,50 денари за литар. - Моторен бензин ЕУРОСУПЕР БС - 98 – 77,50 денари за литар. - Дизел гориво ЕУРОДИЗЕЛ БС (Д-Е V) – 69,00 денари за литар. - Маслото за горење Екстра лесно 1 (ЕЛ-1) – 69,00 денари за литар. - Мазут М-1 НС – 36,740 денари за литар. Малопродажните цени на бензините ЕУРОСУПЕР БС-95 и ЕУРОСУПЕР БС-98, како и на ЕУРОДИЗЕЛ (Д-Е V) се намалуваат за 0,50 ден/лит. Малопродажната цена на Екстра лесното масло за домаќинство на (ЕЛ-1) не се менува. Малопродажната цена на Мазутот М-1 НС се намалува за 0,408 ден/кг и сега ќе изнесува 36,740 ден/кг. Од РКЕ истакнуваат дека намалувањето е резултат на пад на референтните цени на нафтените деривати на светскиот пазар, како и на понискиот курс на денарот во однос на американскиот долар. 
