Македонија

Намалени цените на горивата, бензините и дизелот поевтини за 0,5 денари

Регулаторната комисија за енергетика, донесе Одлука со која се врши намалување на малопродажните цени на нафтените деривати во просек за 0,62 % во однос на одлуката од 9.09.2025 година. Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 0,075%, кај дизелот за 0,414%, кај екстра лесното масло за 0,058% и кај мазутот намалувањето е за 1,145%. Курсот на денарот во однос на доларот во изминатиот период по кој беа формирани цените со претходната пресметка е понизок за 0,3613%. Од 16.9.2025 година од 00:01 часот максималните цени на нафтените деривати ќе изнесуваат: - Моторен бензин ЕУРОСУПЕР БС - 95 – 75,50 денари за литар. - Моторен бензин ЕУРОСУПЕР БС - 98 – 77,50 денари за литар. - Дизел гориво ЕУРОДИЗЕЛ БС (Д-Е V) – 69,00 денари за литар. - Маслото за горење Екстра лесно 1 (ЕЛ-1) – 69,00 денари за литар. - Мазут М-1 НС – 36,740 денари за литар. Малопродажните цени на бензините ЕУРОСУПЕР БС-95 и ЕУРОСУПЕР БС-98, како и на ЕУРОДИЗЕЛ (Д-Е V) се намалуваат за 0,50 ден/лит. Малопродажната цена на Екстра лесното масло за домаќинство на (ЕЛ-1) не се менува. Малопродажната цена на Мазутот М-1 НС се намалува за 0,408 ден/кг и сега ќе изнесува 36,740 ден/кг. Од РКЕ истакнуваат дека намалувањето е резултат на пад на референтните цени на нафтените деривати на светскиот пазар, како и на понискиот курс на денарот во однос на американскиот долар.

Запленети 204 колекционерски банкноти и монети на аеродромот во Скопје

Царинската управа денеска информираше за заплена на 204 колекционерски банкноти и монети, чија проценета вредност достигнува 700 илјади денари. Случајот е откриен на Меѓународниот Аеродром Скопје, при контрола на патник, државјанин на САД. Според објавата на Царинската управа, патникот се упатил кон зелениот канал, иако со себе носел голема количина вредносни предмети. Царинските службеници, поради сомневање, го селектирале за детален претрес. При контролата, во двата куфери и во личните торби на патникот биле пронајдени банкнотите и монетите. Против патникот е поведена соодветна постапка пред надлежниот суд. Царинската управа уште еднаш апелира до сите граѓани и патници дека е законска обврска да се пријават сите вредносни предмети при влез и излез од државата, со цел да се избегнат вакви ситуации.

Запленети околу 1000 електронски цигари со непозната материја на Табановце

На граничниот премин Табановце, полицијата заплени голема пратка од 971 електронска цигара исполнета со непозната материја и уапси холандски државјанин. Инцидентот се случил на 12 септември 2025 година, околу 14:30 часот, кога полициски службеници при редовна контрола на влез во земјата го запреле патничкото возило „опел“ со германски таблички, управувано од 19-годишниот А.А.Р. од Холандија. При деталната проверка на автомобилот, во 37 ќеси се пронајдени и одземени речиси 1.000 електронски цигари. Поради сериозноста на прекршокот, младиот холандски државјанин е приведен во полициска станица. Според Министерството за внатрешни работи, по целосното документирање на случајот, против него ќе биде поднесена соодветна кривична пријава. Запленетата материја ќе биде испратена на вештачење за да се утврди нејзиниот точен состав.

Кривична пријава против тројца грчки државјани, извршиле кражба во продажен објект во хотел на ГП Богородица

СВР Струмица-ОВР Гевгелија, до Основното јавно обвинителство Гевгелија, поднесе кривична пријава против грчките државјани В.Б.(43), К.Б.(35) и П.Б.(44) поради сомнение за сторено кривично дело „тешка кражба“ на дрзок начин. Тие се сомничат дека на 12.09.2025 во периодот од 10:40 до 11:15 часот од продажен објект во состав на хотел на ГП Богородица одзеле повеќе парфеми. По преземени мерки, полициски службеници од СВР Струмица - ОВР Гевгелија утврдија дека тројцата заминале од местото со возило „тојота“, кое го управувал В.Б., а другите двајца биле сопатници. Во 21.30 часот на Граничен премин „Богородица“ е запрено возилото и при контрола во него се пронајдени одземените предмети. Лицата се лишени од слобода и задржани во Полициската станица Гевгелија, а во текот на денот ќе бидат изведени пред судија од Основен суд Гевгелија.

Јавно обвинителство: Тројца работници загинаа во тешка сообраќајна несреќа на експресниот пат Штип-Радовиш, истрагата е во тек

Тројца работници загинаа, а две лица се повредени во тешка сообраќајна несреќа што се случи денеска на експресниот пат Штип-Радовиш. Комбе со петмина патници излетало од патот и паднало од мостот во коритото на Балталичка река. Основното јавно обвинителство Штип изврши увид на местото на несреќата. Според првичните информации, во комбето се превезувале работници ангажирани од фирма од Струмица. Загинатите се двајца државјани на Бангладеш и еден од Непал. Еден од патниците се здобил со тешки телесни повреди, додека возачот е со полесни повреди. Јавното обвинителство презема активности за утврдување на точните причини за несреќата. Истрагата е во тек.

Меѓународниот аеродром Скопје доби престижна награда: Најпријатно аеродромско искуство во Европа

Меѓународниот аеродром Скопје уште еднаш е прогласен за еден од најдобрите во Европа, освојувајќи ја престижната награда за „Најпријатно аеродромско искуство во Европа“ (Easiest Airport Journey in Europe). Наградата, која е дел од програмата Airport Service Quality (ASQ), беше доделена на свечена гала-церемонија во Гуангжу, Кина. Ова е десетти пат како ТАВ Македонија, компанијата што раководи со аеродромот, го добива ова признание од страна на Меѓународниот совет на аеродроми (ACI). Наградата се доделува врз основа на анкети спроведени меѓу самите патници, кои го оценуваат квалитетот на аеродромските услуги. Неџат Курт, генерален менаџер на ТАВ Македонија, изјави: „Ова е повеќе од чест – тоа е потврда дека упорноста, посветеноста и љубовта кон нашата работа носат резултати. Ова признание е за целиот аеродромски тим и за сите патници кои секојдневно ни ја укажуваат својата доверба“. Наградата ја потврдува континуираната посветеност на аеродромот да ги подобрува своите услуги. Во минатото, аеродромот веќе беше наградуван како „Најдобар аеродром во Европа“ во категоријата до 2 милиони патници (2012, 2013, 2015, 2018), а потоа и во поголемата категорија од 2 до 5 милиони патници (2019, 2020, 2021, 2022, 2023, 2024).

ССМ: Еден газда зема плата колку за 817 работници на минималец

Во време кога над 73% од македонските работници примаат плата под просекот, фрапантни се податоците за платите на најбогатите, алармира претседателот на Сојузот на синдикати на Македонија (ССМ), Слободан Трендафилов. Во јули највисоката исплатена нето-плата во земјава изнесувала над 320.000 евра, ССМ побара одговорност и истакна дека оваа плата е еквивалентна на платите на 817 работници со минималец. Трите највисоки плати заедно надминуваат 700.000 евра, што е плата за 1790 работници со минимална плата за еден месец. „Но, уште позагрижувачки се податоците дека во мај има 0 (нула) работници кои примиле минимална плата и 0 (нула) кои примиле просечна плата, што фрла дополнителен сомнеж на состојбите со платите во Македонија“, изјави Трендафилов. Синдикатот посочува на големата неправда и дискриминација во даночниот систем. Според нив, додека работниците со минимални и просечни плати плаќаат 38% придонеси, газдите со милионски примања над највисоката основица од 16 просечни бруто-плати, плаќаат само 10% персонален данок.

Полициска акција во Тетово: Уапсена жена осомничена за посредување во проституција

Полицијата вчера спровела координирана акција во неколку објекти во Тетово, при што е уапсена 41-годишна жена од скопското село Бојане, под сомнение за посредување во проституција. Акцијата се одвивала од 12:00 до 14:00 часот, а била спроведена од полициски службеници од СВР Тетово, во содејство со Државната пазарна инспекција, Управата за јавни приходи и Државната трудова инспекција. При контролата на угостителски објект на улицата „Јане Сандански“, во 14:00 часот, лишена од слобода е Г.Ш.(41) од скопското село Бојане. Таа била затекната во објектот, а постои основано сомнение дека сторила кривично дело по член 191 од Кривичниот законик. Во објектот бил затекнат и управителот Г.Н.(59) од Тетово. Од двајцата се одземени мобилни телефони. Г.Ш. е задржана во полициска станица, а по целосно документирање на случајот, против неа ќе биде поднесена соодветна пријава.

Кривична пријава против двајца скопјани, одгледувале канабис во нивните дворови

Одделот за сузбивање на организиран и сериозен криминал - Сектор за криминалистички истраги - Единица за недозволена трговија со дрога, до Основното јавно обвинителство Скопје, поднесе кривична пријава против Б.А.(42) и Б.А.(40), двајцата од Скопје, поради постоење основи на сомнение за сторено кривично дело „неовластено производство и пуштање во промет на наркотични дроги, психотропни супстанци и прекурзори”. Во периодот од 2020 до 2025 година, пријавените набавувале семки од растението канабис и во дворовите од нивните куќи во с.Огњанци, скопско, одгледувале стебла, кои ги береле, сушеле, а потоа ги пакувале во зипер ќеси и ги продавале на уживатели на подрачјето на град Скопје по цена од 500 денари за една зипер ќеса. На 06.09.2025, со судска наредба, полициски службеници извршија претреси во домовите на пријавените. Притоа, во домот и дворот на Б.А.(42) се пронајдени и одземени марихуана и осум стебла од растението канабис. Додека, во домот и дворот на Б.А.(40) се пронајдени и одземени марихуана, амфетамин, дробилка и четири стебла од растението канабис.

Тендерот со јавно наддавање за трет мобилен оператор е завршен, само еден понудувач

Агенцијата за електронски комуникации (АЕК) објави дека ја завршува постапката по јавниот тендер за доделување на дозволи за користење на радиофреквенциските опсези 700 MHz, 1800 MHz и 3.х GHz. Одлуката за завршување на постапката е донесена од страна на Директорот на АЕК, врз основа на извештај од Комисијата за спроведување на јавниот тендер. Според објавениот документ, Комисијата за јавниот тендер, по спроведеното отворање на понудите на 22 август 2025 година, доставила извештај до Директорот на АЕК на 27 август 2025 година. Во извештајот е констатирано дека за овој тендер се пријавил само еден понудувач. Врз основа на оваа информација и согласно член 140 став 4 од Законот за електронските комуникации, Директорот на АЕК донесе Одлука за завршување на постапката по јавниот тендер со јавно наддавање. Одлуката влегува во сила со денот на нејзиното донесување. Законот за електронските комуникации, на кој се повикува АЕК, ги регулира процедурите за доделување на дозволи за користење на електронски комуникациски мрежи и услуги, вклучително и радиофреквенциските опсези кои се клучен ресурс за развојот на телекомуникацискиот сектор.