Најнови

Влезните трошоци во земјоделството пораснале за 8,8 проценти во септември

Цените во земјоделството во септември бележат зголемување и во делот на влезните трошоци (инпут) и кај финалните производи (аутпут) во споредба со истиот месец од претходната година, соопшти Државниот завод за статистика (ДЗС). Според објавените податоци, најизразито зголемување од 8,8 проценти е регистрирано кај цените на инпут 1, односно кај тековно потрошените средства во земјоделското производство. Во исто време, цените на средствата наменети за инвестиции во земјоделството (инпут 2) бележат пораст од 8,6 проценти. Во делот на аутпутот, односно кај финалните земјоделски производи, забележани се спротивни движења во зависност од секторот. Цените во растителното производство во септември се зголемени за 3,9 проценти во однос на истиот месец лани. За разлика од нив, цените во добиточното производство бележат пад од 2,1 процент во истиот споредбен период.

Дневен Хороскоп (16 октомври 2026)

Нов современ трговски и деловен комплекс „Триангла Fashion Park“ во Општина Гази Баба

Со свечена церемонија вечерва во 18:00 часот официјално се отвора новиот современ трговски и деловен комплекс „Triangla Fashion Park“ во Општина Гази Баба. Станува збор за значајна локална инвестиција вредна 10 милиони евра, која носи нова економска енергија и современ урбан изглед во оваа скопска општина. Комплексот се протега на вкупна површина од 15.000 квадратни метри, од кои 6.500 квадратни метри се наменети за трговски содржини и изнајмување. Во рамките на современо уредениот простор се интегрирани и деловен центар и хотел на површина од 5.000 квадратни метри, како и простран подземен паркинг со капацитет од над 200 паркинг-места, што целосно ги задоволува потребите на идните посетители и бизнис-партнери. Градоначалникот на Општина Гази Баба, Бобан Стефковски, ја истакна важноста на овој проект, нагласувајќи дека новата инвестиција претставува капитален чекор во унапредувањето на локалната економија. „Овој комплекс создава услови за отворање нови работни места, привлекува нови бизниси, го проширува спектарот на трговски и услужни дејности и значајно ја зголемува економската активност во општината“, истакна Стефковски, додавајќи дека ваквите проекти ја зголемуваат атрактивноста на Гази Баба за идни домашни и странски инвеститори. „Triangla Fashion Park“ е замислен како мултифункционален центар кој на граѓаните им нуди нови содржини, а на локалната економија ѝ обезбедува дополнителен потенцијал за одржлив раст и развој.

„Кромберг и Шуберт“ отвора 2.000 нови работни места во Битола за производство на компоненти за „Ауди“

Германската компанија „Кромберг и Шуберт“ започнува нов инвестициски циклус во својот капацитет во индустриската зона Жабени во Битола. Проектот предвидува отворање на нови 2.000 работни места во следните четири години, каде што ќе се произведуваат електрични инсталации и кабли за најновите модели на автомобилскиот бренд „Ауди“. Оваа вест денеска на прес-конференција ја соопшти претседателот на Владата, Христијан Мицкоски, кој истакна дека новата инвестиција претставува силен развоен импулс за Битола, Пелагонискиот Регион и целата домашна економија. Со реализацијата на овој проект, вкупниот број на вработени во фабриките на „Кромберг и Шуберт“ во Битола и Скопје се очекува да достигне до 10.000 лица. Во рамките на новиот производствен циклус е предвидено дневно производство на над 3.000 кабелски снопови за новите модели на „Ауди“. Како што најавија од менаџментот, новиот проект ќе донесе и технолошка модернизација на погоните во Жабени, со воведување системи за автоматизација и вештачка интелигенција (ВИ), како што се автоматски камери за контрола на квалитетот и следење на деловите. Комерцијалниот директор на „Кромберг и Шуберт“, Ѓорѓи Тренковски, потенцираше дека проектниот менаџмент на компанијата целосно се префрла во Битола. Планот на компанијата е сите досегашни странски менаџерски позиции постепено да бидат заменети со домашни стручњаци, при што ќе се оствари и засилена соработка со македонските универзитети за регрутирање на нови инженери и оператори. Според владините проценки и очекувањата на менаџментот, идната година извозот од сите капацитети на „Кромберг и Шуберт“ во земјава се очекува да го надмине прагот од 400 милиони евра, при што просечните плати за висококвалификуваниот инженерски кадар се за над 80 проценти повисоки од државниот просек.

Над 33 милиони денари поддршка за зелена нафта за земјоделците од кумановскиот регион

Заменик-министерот за земјоделство, шумарство и водостопанство, Албрим Хоџа, оствари работна посета на Подрачната единица на Министерството во Куманово, каде што се сретна со вработените и со локални земјоделци од регионот. Во рамките на посетата беа свечено доделени првите картички за зелена нафта, кои се реализираат преку мерката 10 од Програмата за финансиска поддршка во земјоделството за 2026 година. За подрачјето што го покрива оваа единицa, во кое влегуваат и општините Липково и Старо Нагоричане, предвидени се вкупно 3.641 картичка, со вкупна финансиска вредност од 33.227.969 денари. На државно ниво, за мерката за зелена нафта се обезбедени вкупно 564 милиони денари за 48.037 корисници. Висината на поддршката директно се утврдува врз основа на пријавените земјоделски површини и видот на културите, со износи што се движат од 3.200 до 12.000 денари по хектар. За време на средбата, заменик-министерот Хоџа ја нагласи важноста од ваквите мерки во услови на зголемени производствени трошоци. „Свесни сме дека трошоците во земјоделството се високи, затоа преку мерката зелена нафта настојуваме да им олесниме дел од производствените трошоци на нашите земјоделци. Им благодарам за нивниот секојдневен труд и посветеност, бидејќи домашното производство се темели токму на нивната работа“, истакна Хоџа, упатувајќи благодарност и до вработените во подрачната единица за нивниот професионален ангажман.

Од март се воспоставува директна авиолинија Скопје-Дубаи трипати неделно

Авиокомпанијата „ФлајДубаи“ од март следната година повторно ќе воспостави директна авионска линија на релација Дубаи-Скопје, со три лета неделно. Ова беше официјално потврдено за време на работната посета на Обединетите Арапски Емирати (ОАЕ) од страна на министерот за надворешни работи и надворешна трговија, Тимчо Муцунски, кој оствари средба со главниот комерцијален директор на компанијата, Хамад Обаидала. Во рамките на разговорите се разгледани можностите што ги нуди оваа директна воздухопловна врска за интензивирање на билатералната соработка, со посебен акцент врз поттикнување на трговската размена, привлекување странски инвестиции и зајакнување на туристичката и културната размена меѓу двете држави. Министерот Муцунски посочи дека враќањето на директната авиолинија претставува конкретен резултат од засилените активности во рамките на економската дипломатија и заложбите за подобрување на меѓународната поврзаност на земјата. Притоа, истакнат е и придонесот на Амбасадата на Македонија во Обединетите Арапски Емирати, чија континуирана дипломатска ангажираност во изминатиот период имаше клучна улога во финализирањето на овој договор.

Автомобилската и машинската индустрија го зголемија растот на индустрискиот промет за 8,8 проценти

Вкупниот промет во индустријата во август бележи зголемување од 8,8 проценти во споредба со истиот месец од претходната година, покажуваат најновите податоци на Државниот завод за статистика (ДЗС). Според главните индустриски групи, најголем годишен пораст е евидентиран кај капиталните производи од 17,1 процент, кај нетрајните производи за широка потрошувачка од 6,9 проценти, како и кај интермедијарните производи (освен енергија) за 1,4 проценти. Пад од 4,2 проценти е регистриран единствено кај трајните производи за широка потрошувачка. Позитивниот резултат во август се должи пред сè на високата активност на странските пазари, каде што е остварен раст од 11,2 проценти на годишно ниво, додека прометот на домашниот пазар бележи зголемување од 4,4 проценти. Во однос на претходниот месец (јули 2026 година), вкупниот индустриски промет бележи сезонско намалување од 16,3 проценти. Во периодот јануари-август, во споредба со истиот период од 2025 година, вкупниот промет во индустријата бележи стабилен раст од 3проценти. Притоа, продажбата на домашниот пазар е зголемена за 3,9 проценти, а на странските пазари за 3,1 процент. Најголемо позитивно влијание врз зголемувањето на вкупниот промет во август имаат секторите за производство на моторни возила, приколки и полуприколки (раст од 17,4%), производството на машини и уреди (раст од 17,3%), како и производството на прехранбени производи (раст од 2,7%).

Дневен Хороскоп (15 октомври 2026)

Продoлжен е рокот за аплицирање на обуката за мехатроничари на тешки товарни возила

Од Агенцијата за вработување информираат дека рокот за аплицирање во програмата за обука на мехатроничари на камиони и тешки товарни возила е официјално продолжен до 31 декември 2026 година. Невработените лица кои се заинтересирани за доквалификација и стекнување дефицитарни вештини во овој сектор можат да ги поднесат своите пријави најдоцна до 26 октомври 2026 година. Обуките ќе се одвиваат во времетраење од шест месеци, а практичната и теоретската настава ќе ја спроведуваат сертифицирани обучувачи од Средното стручно училиште „Владо Тасевски“ во Скопје. За сите избрани учесници во обуката е обезбеден месечен надомест во износ од 12.000 денари, во кои се вклучени задолжителното осигурување и данокот на личен доход. Покрај оваа сума, за учесниците е предвиден и посебен надоместок за мобилност во износ од 5.000 денари. Сите заинтересирани граѓани можат да добијат подетални информации преку Центрите за вработување ширум државата, на телефонските броеви 02/3111-850 и 02/3122-397, на официјалната веб-страница на Агенцијата за вработување (av.gov.mk), како и преку електронската пошта на и .

Во претстојната реколта се очекува откуп на околу 28 милиони килограми тутун: Министерот за земјоделство во посета на Прилеп

Министерот за земјоделство, шумарство и водостопанство, Борче Серафимовски, денеска во Прилеп оствари работна средба со претставници на Сојузот на земјоделски здруженија на тутунопроизводители и регистрираните откупувачи на тутун, посветена на подготовките за претстојната откупна реколта. За време на состанокот се изнесени првичните проценки според кои годинава се очекува да бидат откупени околу 28 милиони килограми тутун. За време на разговорите е нагласено дека навремената координација меѓу сите засегнати страни - производителите, откупувачите и ресорното министерство е од клучна важност за ефикасно и организирано спроведение на откупниот процес, целосно почитување на договорените обврски и соодветно вреднување на трудот на тутунарите. Оваа средба е дел од континуираниот дијалог што Министерството за земјоделство, шумарство и водостопанство го одржува со сите учесници во тутунскиот сектор за да се обезбеди предвидливост и стабилност на пазарот. Од Министерството порачаа дека активно и преку теренски инспекции ќе го следат целиот тек на откупот, при што во рамките на своите законски надлежности ќе интервенираат за да се гарантира заштитата на правата на земјоделците и доследната примена на законските прописи.