Најнови

Дневен Хороскоп (7 октомври 2026)

Царинската управа разби меѓународна криминална група и спречи шверц на 79 килограми марихуана

Секторот за контрола и истраги при Царинската управа, во соработка со Основното јавно обвинителство за гонење на организиран криминал и корупција (ОЈО ГОКК), разби меѓународна криминална група за нелегална трговија со дрога. Во акцијата се приведени пет лица, против кои е поднесена кривична пријава за неовластено производство и пуштање во промет на наркотични дроги, психотропни супстанци и прекурсори. Операцијата започнала по добиена разузнавачка информација, по што мобилните тимови пресретнале обид за шверц на 79 килограми марихуана на граничниот премин Дојран, на излез од државата. Дрогата била наменета за продажба на турскиот пазар. Предистражната постапка покажала дека камионот, со кој управувал државјанин на Босна и Херцеговина, влегол во земјава натоварен со железни профили наменети за транспорт кон Грција. На однапред договорена локација во Македонија била извршена претоварка на марихуаната во камионот, по што возилото било запечатено со пломба што ја поседувал возачот. Возачот го продолжил патот кон Грција преку ГП Дојран, каде што бил сопрен од мобилните царински единици. Со оваа акција Царинската управа спречи меѓународен синџир за шверц на наркотици и ја потврди посветеноста за системско сузбивање на организираниот криминал.

Приведен 30-годишен скопјанец затекнат при разбојничка кражба во продажен објект на Бит Пазар

Полициски службеници од СВР Скопје синоќа во 21:10 часот, на подрачјето на Бит Пазар, го лишија од слобода Х.Ј. (30) од Скопје. Тој се сомничи дека во продажен објект одзел производи, по што бил забележан од вработениот кој се обидел да го спречи во намерата. При обидот за бегство, Х.Ј. физички го нападнал вработениот во објектот. По целосно документирање на случајот, Единицата за внатрешни работи Центар и Бит Пазар при СВР Скопје ќе поднесе соодветна кривична пријава против осомничениот. Пријавата ќе биде поднесена поради постоење основи на сомнение за сторено кривично дело „разбојничка кражба“ согласно член 238 од Кривичниот законик. Полицијата продолжува со преземање на сите потребни мерки за расчистување на настанот и соодветно процесирање на случајот пред надлежните правосудни органи.

Се реконструираат 1,7 километри од регионалниот пат Жилче-Лешок во Општина Јегуновце

Јавното претпријатие за државни патишта (ЈПДП), во соработка со ЈП „Македонијапат“, реализира градежни активности за унапредување на патната инфраструктура на делницата Жилче-Лешок, која е дел од регионалниот пат Р29274 Шемшево-Жилче-Лешок. Првично за овој проект беа предвидени 20 милиони денари преку Програмата за одржување на државните патишта, а за целосно завршување на планираните работи ќе бидат обезбедени дополнителни 4 милиони денари. Досега се завршени 1.250 метри од патот, каде што е извршено проширување на коловозот со тампонирање и асфалтирање со просечна ширина од 6,1 метар, при што се вградени 600 метри кубни тампон и 1.250 тони асфалт. Во следните денови градежните работи продолжуваат на дополнителни 450 метри со уште 400 тони асфалт, со што вкупно ќе бидат обновени 1.700 метри од делницата со вградени 1.650 тони асфалт. Директорот на ЈПДП, Коце Трајановски, и градоначалникот на Општина Јегуновце, Димитар Костадиноски, извршија увид на терен и се запознаа со динамиката и напредокот на градежните активности што ги изведува ЈП „Македонијапат“. Модернизацијата на оваа патна делница значително ќе ја зајакне безбедноста на сообраќајот и ќе овозможи подобра поврзаност меѓу населените места во Општина Јегуновце и поширокиот Полошки Регион.

Од гасно поврзување до нафтовод Солун-Скопје-Ниш: Божиновска учествуваше на министерски состанок за енергетика во Белград

Министерката за енергетика, рударство и минерални суровини Сања Божиновска учествуваше на вториот министерски состанок за енергетика во Белград, заедно со претставници од Србија, Грција и Бугарија. Главниот фокус на разговорите беше ставен врз регионалната соработка, диверзификацијата на изворите за снабдување и развојот на регионот како клучен енергетски коридор кон Европа. На состанокот беше поздравено вклучувањето на Македонија и Србија во „Вертикалниот гасен коридор“, како и претстојниот почеток на изградбата на гасната интерконекција меѓу двете земји. Овој проект ќе се поврзе со гасоводот Македонија-Грција, чиј грчки дел се очекува да заврши до крајот на 2026 година, а македонскиот во 2027 година. Преку оваа инфраструктура и терминалот во Александруполис, земјата ќе обезбеди нов правец за снабдување со течен природен гас, со можност гасоводите во иднина да се користат и за транспорт на водород. Во однос на електроенергетскиот сектор, министрите дискутираа за подготвеноста на преносните системи пред претстојната зимска сезона, развојот на обновливите извори, батериските системи и реверзибилните централи. По посебен акцент беше ставен на интеграцијата на пазарите на електрична енергија од Енергетската заедница со оние на Европската Унија, со цел овозможување поголема флексибилност и стабилност во снабдувањето. Дополнително, на средбата беше разгледана можноста за развој на југоисточниот крак на нафтоводот по трасата Солун-Скопје-Ниш, како и прашања поврзани со Механизмот за јаглеродно гранично прилагодување (CBAM). Во рамки на посетата, каде учествуваа и претставници од МЕМО, МЕПСО и НОМАГАС, министерката Божиновска оствари и билатерална средба со бугарската министерка за енергетика Ива Петрова.

Цените на угостителските услуги во септември се зголемени за 3,8% во споредба со истиот месец лани

Според последните податоци на Државниот завод за статистика, цените на угостителските услуги во септември забележаа благ раст од 0,1% во споредба со претходниот месец, август. Споредено со истиот месец од претходната година, цените во угостителскиот сектор во септември бележат зголемување од 3,8%. Во периодот јануари-септември во однос на истиот период од минатата година, угостителските услуги се поскапи за 3,1%, додека во споредба со декември 2025 година зголемувањето изнесува 1,5%. Анализирано по одделни групи услуги, месечното зголемување на цените во септември во однос на август е резултат единствено на растот на цените во групата Храна, кој изнесува 0,1%. Кај останатите категории, односно кај групите Алкохолни пијалаци, Безалкохолни пијалаци и Ноќевања, во септември 2026 година не се забележани ценовни промени.

Дневен Хороскоп (6 октомври 2026)

Општина Кисела Вода додели признанија за 18 најуспешни наставници по повод Светскиот ден на учителот

По повод 5 Октомври, Светскиот ден на учителот, Општина Кисела Вода организираше неформален настан на кој беа доделени признанија за 18 најуспешни просветни работници од сите основни училишта на нејзината територија. Наградите се доделуваат како признание за нивниот труд, стручност и посветеност во образовниот процес и работата со младите генерации. Изборот на најдобрите наставници се спроведе транспарентно преку јавен оглас и стручна комисија, а клучни критериуми беа постигнатите успеси на учениците на државните натпревари, како и сертификатите за континуирано стручно усовршување на наставниците. На настанот беше истакнато дека Општина Кисела Вода продолжува да го вреднува квалитетот во образованието и да обезбедува подобри услови за работа на наставниот кадар. Признанието „Најдобар наставник за 2026 година“ го добија: Гордана Арсовска од ООУ „Круме Кепески“, потоа Елизабета Митревска, Мимоза Митиќ, Маја Михаиловска и Велика Миленковска од ООУ „Кирил Пејчиновиќ“, како и Сашка Стефановска Морски, Марија Велковска и Благоја Кечовски од ООУ „Кузман Шапкарев“. Меѓу наградените се и Гордана Ристеска Лукрис од ООУ „Кузман Јосифовски Питу“, Маја Трајковиќ, Тања Калинска и Тони Патровски од ООУ „Невена Георгиева Дуња“, Магдалена Бадарова и Маја Грнчиштанова од ООУ „Рајко Жинзифов“, како и Виолета Трпевска, Наташа Старделова, Јасмина Лакинска и Валентина Кикеркова од ООУ „Св. Климент Охридски“.

УЈП предупредува за лажни SMS пораки и обиди за измама кај граѓаните

Управата за јавни приходи (УЈП) упати итно предупредување до граѓаните поради појава на лажни SMS пораки кои се испраќаат во име на институцијата. Во пораките лажно се наведува дека статусот на сметката за социјално осигурување е „абнормален“ и се бара итно решавање на проблемот преку приложен линк. Од УЈП апелираат до сите кои ќе добијат ваква порака воопшто да не го отвораат линкот и да не внесуваат лични, банкарски или други чувствителни податоци, со оглед на тоа што станува збор за фишинг обид за измама и злоупотреба на финансиските податоци на граѓаните. Управата ги повикува граѓаните сите информации и услуги поврзани со данските и социјалните сметки да ги проверуваат единствено преку официјалната веб-страница ujp.gov.mk, преку официјалните е-услуги или преку Инфо центарот на броевите 0800 33 000 и 02 3253 200. Институцијата повторно нагласува дека не треба да се клика на линкови од сомнителни SMS пораки и препорачува известувањето да се сподели со блиските со цел да се спречат дополнителни злоупотреби.

Започнува распределбата на картичките за зелена нафта: Обезбедени се 584 милиони денари за земјоделците

Министерот за земјоделство, шумарство и водостопанство Борче Серафимовски на прес-конференција соопшти дека оваа недела започнува распределбата на првите картички за зелена нафта. За оваа мерка се обезбедени 584 милиони денари, што претставува зголемување на поддршката за 12,3 проценти, со цел намалување на трошоците за гориво при претстојната есенска обработка на земјоделските површини. Дополнително, најавена е исплата на околу 150 милиони денари наменети за јаболкопроизводителите, односно поддршка од по два денари за килограм произведено и предадено јаболко од бербата во 2024 година, реализирана заклучно со 30 јуни 2025 година. Заедно со директорот на Државниот инспекторат за земјоделство, Ивица Ангеловски, беа претставени и резултатите од спроведените контроли врз откупот на земјоделските производи. Со цел надминување на слабостите во системот, изготвен е нов Предлог-закон за уредување на пазарите со земјоделски производи. Новото законско решение предвидува задолжително склучување писмени договори пред испораката, однапред дефинирани услови за откуп и прецизни рокови за плаќање, со што се гарантира поголема сигурност за пласманот. Министерот ги повика сите земјоделци и здруженија кои протестираат да ги достават своите предлози преку ЕНЕР или подрачните единици на министерството.