Најнови

МВР санкционираше 138 возачи за непрописно затемнети стакла со фолија

Министерството за внатрешни работи (МВР) објави дека во текот на месец октомври се изречени вкупно 138 санкции за возачи кои управувале возила со непрописно затемнети стакла, односно со вградени фолии кои не ги исполнуваат пропишаните услови. Секторот за сообраќајни работи при МВР во периодот од 1 до 31 октомври 2025 година спровел засилени сообраќајни контроли на територијата на цела држава со цел санкционирање на овој вид прекршоци. На сите 138 учесници во сообраќајот кои не ги почитувале законските одредби за затемнување на стаклата им се изготвени соодветни поднесоци. Од МВР нагласуваат дека сообраќајните контроли за оваа проблематика ќе продолжат и во наредните денови. Истовремено, упатуваат апел до сите учесници во сообраќајот доследно да ги почитуваат сообраќајните правила и прописи со цел заеднички придонес за побезбедни патишта.

Во септември е намален бројот на работници во индустријата за 2,8%

Државниот завод за статистика (ДЗС) објави податоци кои покажуваат намалување на бројот на работниците во индустријата за 2,8% во септември 2025 година во однос на истиот месец минатата година. Според секторите, најголемо намалување бележи Преработувачката индустрија со пад од 2,9%. Намалување е регистрирано и во секторот Рударство и вадење на камен за 2,0%, како и во секторот Снабдување со електрична енергија, гас, пареа и климатизација за 0,6%. Анализирано според главните индустриски групи, најголем пад на работници е забележан во групата Капитални производи, со значително намалување од 6,4%. Намалување има и во групите Нетрајни производи за широка потрошувачка (2,8%) и Енергија (1,8%). ДЗС регистрира зголемување на бројот на работници во две групи: Трајни производи за широка потрошувачка со раст од 4,8% и Интермедијарни производи, освен енергија, со мал раст од 0,2%. Тренд на намалување се забележува и кумулативно, при што во периодот јануари-септември 2025 година, бројот на работници во индустријата се намалил за 3,7% во споредба со истиот период претходната година.

Поскапуваат бензините и дизелот - Нови цени на горивата од полноќ

Регулаторната комисија за енергетика, водни услуги и услуги за управување со комунален отпад (РКЕ) донесе Одлука со која се врши зголемување на малопродажните цени на нафтените деривати во просек за 1,03% во однос на одлуката од 30.10.2025 година. Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 2,849%, кај дизелот за 2,319%, кај екстра лесното масло има намалување е 0,05% и кај мазутот има зголемување за 3,433%. Курсот на денарот во однос на доларот во изминатиот период по кој беа формирани цените со претходната пресметка е понизок за 0,0034%. Од 4.11.2025 година од 00:01 часот максималните цени на нафтените деривати ќе изнесуваат: - Моторен бензин (ЕУРОСУПЕР БС-95) - 74,00 (денари/литар). - Моторен бензин (ЕУРОСУПЕР БС-98) - 76,00 (денари/литар). - Дизел гориво (ЕУРОДИЗЕЛ БС Д-Е V) - 71,00 (денари/литар). - Масло за горење (Екстра лесно 1) - 69,50 (денари/литар). - Мазут (М-1 НС) - 36,913 (денари/килограм). Малопродажните цени на бензините ЕУРОСУПЕР БС-95 и ЕУРОСУПЕР БС-98 се зголемуваат за 0,50 ден/лит. Малопродажната цена на ЕУРОДИЗЕЛ (Д-Е V) се зголемува за 1,00 ден/лит. Малопродажната цена на Мазутот М-1 НС се зголемува за 0,856 ден/кг и сега ќе изнесува 36,913 ден/кг. Од РКЕ напоменуваат дека ова се максималните цени на нафтените деривати од 00:01 часот на 4.11.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.

Приходите на Реплек се зголемија на 26 милиони евра, добивката порасна на 3,9 милиони евра

Фармацевтската компанија „Реплек“ АД објави континуиран раст и исклучително стабилни деловни резултати за периодот јануари – септември 2025 година, потврдувајќи ја одржливоста на својот бизнис модел. Компанијата оствари консолидирана нето-добивка по оданочување во износ од 239 милиони денари (3,9 милиони евра). Ова претставува раст од 77% во однос на истиот период минатата година. Главниот двигател на растот се приходите од продажба во сегментот Фармација, кои достигнаа 26 милиони евра. Овој приход е за 18% поголем во споредба со првите девет месеци од 2024 година. „Реплек“ останува силно извозно ориентирана компанија. Извозот во овој период изнесува 19,70 милиони евра, бележејќи раст од 18% на годишно ниво. Приходите од домашниот пазар исто така се зголемени за 18%, достигнувајќи 6,25 милиони евра. Со овие резултати, компанијата ја задржува стратегијата за балансирана географска распределба, при што 75% од приходите доаѓаат од извоз, а 25% од домашниот пазар.

Витаминка ги зголеми приходите на над 48 милиони евра - Добивката порасна за 5% во првите девет месеци

Прехранбената компанија „Витаминка“ АД Прилеп објави позитивен финансиски резултат за периодот јануари – септември 2025 година, остварувајќи раст на вкупните приходи и зголемување на добивката по оданочување. Според неревидираниот единечен Биланс на успех, компанијата оствари вкупни приходи од 3 милијарди денари (околу 49 милиони евра). Ова претставува значителен раст од 14% во споредба со приходите реализирани во истиот период од 2024 година. Вкупните расходи за првите девет месеци изнесуваат 2,9 милијарди денари (околу 48 милиони евра), што е зголемување од 21% во однос на истиот период лани. Компанијата појаснува дека висината на расходите е во корелација со обемот на работењето. И покрај зголемувањето на расходите, „Витаминка“ оствари добивка по оданочувањето во висина од 37 милиони денари (614 илјади евра). Овој резултат е за 5% поголем во споредба со добивката постигната во периодот јануари – септември 2024 година.

Индустриското производство во септември се зголеми за 2,7%

Државниот завод за статистика (ДЗС) објави дека индустриското производство во Македонија во септември 2025 година бележи раст од 2,7% во споредба со истиот месец минатата година. Клучен двигател на овој пораст е секторот Преработувачка индустрија, кадешто има зголемување од 3,1%. Најголемо влијание врз растот имаат одделите: Производство на прехранбени производи (+8,3%), Производство на електрична опрема (+8,2%) и Производство на моторни возила, приколки и полуприколки (+7,7%). Спротивно, секторот Рударство и вадење на камен бележи опаѓање од 1,7%, додека секторот Снабдување со електрична енергија, гас, пареа и климатизација е намален за 2,5%. Гледано според главните индустриски групи, забележан е пораст кај: Интермедијарни производи, освен енергија (6,0%), Капитални производи (3,0%) и Енергија (1,6%). Истовремено, опаѓање има кај Трајни производи за широка потрошувачка (5,6%) и Нетрајни производи за широка потрошувачка (0,6%). ДЗС соопшти дека кумулативното индустриско производство во периодот јануари – септември 2025 година е зголемено за 2,3% во однос на истиот период од 2024 година.

Царинската управа заплени 130 килограми марихуана на граничниот премин „Табановце“

Царинската управа спречи меѓународен канал за нелегална трговија со дрога и заплени вкупно 130 килограми марихуана на граничниот премин Табановце, на излез од државата. Како што информираше директорот на Царинската управа, Бобан Николовски, во акцијата е уапсен државјанин на Република Србија, кој е сопственик и возач на превозна компанија регистрирана во Љубљана, Словенија. Против него е поднесена кривична пријава до Основното јавно обвинителство Куманово за кривично дело „неовластено производство и пуштање во промет опојни дроги“. Запленетата дрога била откриена при детален преглед на товарното моторно возило со кое управувал српскиот државјанин. Царинските службеници забележале дека палетите во возилото се специјално прекроени и отстапуваат од стандардната форма. „Зад прекроените палети имало повеќе торби во кои беа откриени 131 пакување со вкупно 130 килограми марихуана“, појасни директорот Николовски. Тој ја истакна квалитетната реакција и зголемената ефективност на царинските службеници како клучна за успехот на акцијата.

Алкалоид АД Скопје со консолидирани продажби од 246,6 милиони евра и извоз од 160,4 милиони евра во првите девет месеци

Алкалоид АД Скопје објави импресивни резултати од работењето за периодот јануари – септември 2025 година, бележејќи рекордни консолидирани продажби, значителен извоз и континуирани инвестиции. Консолидирани продажби достигнаа 15.191.149.664 денари (246,6 милиони евра), што е раст од 7% во споредба со истиот период минатата година. Консолидираната нето-добивка е зголемена за 8%, достигнувајќи 1.487.454.694 денари (24,11 милиони евра). Компанијата истакнува дека, и покрај исклучително високата основа поставена со растот од 14% во 2024 година, тековниот умерен раст е во согласност со предвидената динамика, а реализираните продажби се за 2% поголеми од планираните за првата половина на 2025 година. Извозот изнесува 160,4 милиони евра, при што 65% од вкупните консолидирани продажби се остварени на странските пазари. Најголем пораст на извозот е забележан на пазарите во Австрија (зголемување од 6 пати), Холандија (5,5 пати), Шведска (4 пати) и Финска (3,5 пати). Позитивни трендови бележат и Германија (раст од 19%), Полска (раст од 23%) и земјите од Југоисточна Европа. На домашниот пазар е остварен раст од 17% на консолидираните продажби, делумно благодарение на активното учество на компанијата во обезбедувањето на ретки и специфични терапии. Сегментот фармација учествува со доминантни 91% во вкупните продажби, бележејќи раст од 7%. Најголем придонес имаат антибиотиците (23%), ОТЦ препаратите (18%) и невролошките препарати (13%). Сегментот хемија, козметика и билкарство учествува со 9%, при што сегментот хемија бележи раст од 20%. Алкалоид има 2.996 вработени, од кои 2.251 се во земјава. Во првите девет месеци од 2025 година во Македонија се реализирани 46 нови вработувања.

АД ЕСМ доби грант од германската КфВ банка во износ од 1,5 милиони евра за енергетска транзиција

АД ЕСМ денеска потпиша Договор за грант со германската развојна КфВ банка, со што се обезбедени 1,5 милиони евра техничка помош. Ова финансирање, обезбедено од Европската Унија, е наменето за зајакнување на внатрешните капацитети на ЕСМ и за забрзување на клучните активности во процесот на енергетска транзиција. Генералниот директор на АД ЕСМ, Лазо Узунчев, истакна дека грантот претставува стратешки камен-темелник за институционална трансформација. „За ЕСМ ова е повеќе од премин кон обновливи извори на енергија, туку сериозна посветеност да станеме модерна и комерцијално конкурентна сила на европскиот енергетски пазар. Финансирањето ќе биде алатка за зајакнување на нашите внатрешни капацитети и корпоративно управување, преку финансирање на критични иницијативи за моделирање и стратешко планирање. Овој фокус ја осигурува нашата оперативна одржливост, ја зајакнува енергетската безбедност на земјата и значително ги забрзува нашите напори за намалување на јаглеродниот отпечаток.“ изјави Узунчев. Штефан Худолин, раководител на Одделот за соработка во Делегацијата на ЕУ, нагласи дека забрзувањето на зелената транзиција е многу блиску, а земјата добива технички насоки од КфВ за да ја забрза трансформацијата на енергетскиот сектор.

Екстра лесното масло за домаќинство поскапува за два денари по литар

Регулаторната комисија за енергетика, водни услуги и услуги за управување со комунален отпад (РКЕ) донесе Одлука со која се врши зголемување на малопродажните цени на нафтените деривати во просек за 0,59% во однос на одлуката од 29.10.2025 година. Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 3,480%, кај дизелот за 1,760%, кај екстра лесното масло за 5,965% и кај мазутот зголемувањето е за 3,830%. Курсот на денарот во однос на доларот во изминатиот период по кој беа формирани цените со претходната пресметка е понизок за 0,0496%. Од 31.10.2025 година од 00:01 часот максималните цени на нафтените деривати ќе изнесуваат: - Моторен бензин (ЕУРОСУПЕР БС-95) - 73,50 (денари/литар). - Моторен бензин (ЕУРОСУПЕР БС-98) - 75,50 (денари/литар). - Дизел гориво (ЕУРОДИЗЕЛ БС Д-Е V) - 70,00 (денари/литар). - Масло за горење (Екстра лесно 1) - 69,50 (денари/литар). - Мазут (М-1 НС) - 36,057 (денари/килограм). Малопродажната цена на Екстра лесното масло за домаќинство на (ЕЛ-1) се зголемува за 2,00 ден/лит. Малопродажните цени на бензините ЕУРОСУПЕР БС-95 и ЕУРОСУПЕР БС-98, како и на ЕУРОДИЗЕЛ (Д-Е V) и на Мазутот М-1 НС не се менуваат. Од РКЕ напоменуваат дека ова се максималните цени на нафтените деривати од 00:01 часот на 31.10.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.