Најнови

Кој доход од странство се оданочува: Плати, фриленс, закуп преку Airbnb и Booking, добивки од криптовалути, дивиденди и игри на среќа

Управата за јавни приходи (УЈП) ги информира граѓаните дека започна со детален увид и проверка на податоците добиени од деловните банки во државата за остварени приливи од странство на физички лица - резиденти во текот на 2021 година. Во оваа фаза од постапката, УЈП веќе достави персонализирани известувања до сите граѓани за кои располага со податоци дека оствариле ваков вид доход, со прецизно дефиниран рок во кој треба доброволно да ги исполнат законските обврски. Од даночната управа предупредуваат дека доколку граѓаните не ги подмират обврските во предвидениот рок, УЈП ќе ги преземе сите законски мерки за службено утврдување на данокот и за покренување на соодветни постапки. Истовремено, од УЈП појаснуваат дека сите добиени приливи не подлежат автоматски на оданочување и дека секој граѓанин кој добил известување нема априори обврска да поднесува пресметка. Законската обврска за пријавување се однесува на физичките лица кои оствариле оданочив доход од странство согласно Законот за данокот на личен доход. Во оваа категорија спаѓаат приходите остварени од работа како што се плати, хонорари, интелектуални услуги и фриленс ангажмани, потоа приходи од издавање закуп вклучително и преку платформи како Airbnb и Booking.com, капитални добивки од продажба на имот, криптовалути и хартии од вредност, доход од капитал како дивиденди и камати, авторски права, добивки од игри на среќа, како и други видови оданочив доход. Од друга страна, приливите добиени по основ на подарок, семејна поддршка, позајмица или трансфери реализирани преку сервисите за брз трансфер на пари како Western Union, Ria или MoneyGram, не претставуваат автоматски оданочив доход. Даночниот третман зависи исклучиво од вистинскиот основ на приливот, па доколку е потребно, физичкото лице ќе треба да приложи соодветен доказ за потеклото на средствата. УЈП упатува апел до сите граѓани кои оствариле приливи од странство навремено да ги проверат своите даночни обврски и доколку подлежат на оданочување, да поднесат електронска пресметка (е-ППД) и да го уплатат данокот за да избегнат прекршочни и даночни постапки.

Дневен Хороскоп (24 октомври 2026)

Исплатени 2,4 милиони евра на над 1.900 овоштари за произведено и предадено јаболко

Министерството за земјоделство, шумарство и водостопанство (МЗШВ) информира дека е реализирана финансиска поддршка за произведено и предадено јаболко во вкупен износ од 149.482.644 денари, односно околу 2,43 милиони евра. Со оваа исплата се опфатени вкупно 1.934 производители на јаболка низ државата. Средствата се целосно префрлени преку Агенцијата за финансиска поддршка во земјоделството и руралниот развој, а исплатата е реализирана согласно Мерката 1.7 од Програмата за финансиска поддршка во земјоделството за 2025 година. Оваа поддршка има за цел да овозможи непречено одвивање на производството, поддршка на ликвидноста на земјоделците и поттикнување на организиран пласман на македонското јаболко на домашните и странските пазари.

Уапсени две лица од Куманово: Нападнале и ограбиле повозрасен маж, па го принудувале да земе брз кредит

Полициски службеници од Секторот за внатрешни работи Куманово лишија од слобода две лица од истиот град, 45-годишната С.Б. и 52-годишниот Р.Т., поради сомнение за извршено физичко насилство, разбојништво и обид за принуда над 64-годишен сограѓанин. Според пријавата во полицијата, Осомничената С.Б. со измама го повикала оштетениот во својот дом под изговор дека ѝ е потребна помош за купување мобилен телефон. По пристигнувањето во дворот од куќата, Р.Т. физички го нападнал 64-годишниот маж, додека С.Б. насилно му ги одзела парите и мобилниот телефон. По физичкиот напад и грабежот, двајцата напаѓачи со принуда го одвеле оштетениот во просториите на локално финансиско друштво со цел тој да подигне брз паричен кредит за нивни потреби. За време на постапката за аплицирање, оштетениот успеал дискретно да ѝ сигнализира на вработената дека е жртва на принуда и дека постапува под закана. По примениот сигнал, вработената веднаш алармирала во полиција, по што екипи на СВР Куманово брзо интервенирале на лице место и ги лишиле од слобода двајцата осомничени. По целосно документирање на настанот, против С.Б. и Р.Т. ќе бидат поднесени соодветни кривични пријави до надлежното обвинителство.

Дневен Хороскоп (23 октомври 2026)

Николоски: На Коридорот 10 ќе се гради брза пруга каде патничките возови ќе се движат со брзина од 160 до 200 километри на час

Паневропските коридори 8 и 10 се од клучно значење за обезбедување на економскиот напредок и за зацврстување на политичката стабилност на Македонија во услови на сложени геополитички случувања. Ова го истакна заменик-претседателот на Владата и министер за транспорт, Александар Николоски, за време на своето обраќање на панел-дискусијата организирана од Фондацијата Конрад Аденауер на тема „Стратешка сигурност и стабилност - ЕУ и Македонија во новата геополитичка реалност“. Во својот говор, вицепремиерот Николоски ја нагласи специфичната географска положба на државата и нејзината силна економска поврзаност со Европската Унија. Тој посочи дека 76 проценти од македонскиот извоз е наменет за земјите членки на Унијата, додека 46 проценти од вкупниот увоз доаѓа токму од пазарите на ЕУ, што ја прави модернизацијата на транспортната инфраструктура примарен стратешки приоритет за Владата. Во делот на Коридорот 10, со поддршка на ЕУ се подготвуваат пет закони за интелигентни транспортни системи и се планира изградба на брза пруга со брзина од 160 до 200 километри на час за патнички и 120 километри на час за карго-сообраќај. На Коридорот 8 активно се градат автопатските делници меѓу Охрид и Кичево, Букојчани, Гостивар и Тетово, додека на источниот крак, по делот од Страцин до Крива Паланка, следи реконструкција на потегот од Страцин до Куманово, односно Романовце. Паралелно, во соработка со Светска банка и ЕУ се подготвува модернизација и проширување на граничните премини Ќафасан и Деве Баир за поголем проток на стока и патници. На овие коридори се лоцирани и двата аеродрома во државата, за кои Николоски најави дека уште во текот на 2026 година ќе надминат историска бројка од 4 милиони патници, што претставува исклучителен резултат за земја со 1,8 милиони жители.

АДИНГ оствари приход од над 9 милиони евра за девет месеци, добивката достигна 1,2 милиони евра

Во периодот од 1 јануари до 30 септември 2026 година, АДИНГ АД Скопје оствари вкупен приход во износ од околу 9,06 милиони евра, што претставува зголемување за 10,4 проценти, односно за над 856 илјади евра во споредба со истиот период минатата година. Од реализираната продажба, 60,4 проценти се остварени на домашниот пазар, додека 39,6 проценти се приходи од пласман на странски пазари. Во структурата на извозот најголемо учество има пазарот во Србија со 46,4 проценти, по што следуваат Бугарија со 21,7 проценти, Украина со 9,6 проценти, Босна и Херцеговина со 8,8 проценти, Црна Гора со 7,7 проценти, Косово со 3,6 проценти, Грција со 1,6 проценти и Либија со 0,6 проценти. Движењето на вкупните приходи по квартали покажува остварување од околу 2,1 милион евра во првиот квартал, над 3,55 милиони евра во вториот квартал и околу 3,4 милиони евра во третиот квартал од годината. Компанијата оствари позитивен финансиски резултат, односно добивка пред оданочување во износ од над 1,2 милиони евра, што претставува раст од 9 проценти во споредба со минатогодишната добивка од околу 1,1 милион евра. Овој остварен резултат е за дури 106,5 проценти повисок од првично планираната добивка од околу 583,6 илјади евра. Движењето на финансискиот резултат забележа континуиран раст, започнувајќи со околу 284,7 илјади евра во првиот квартал, зголемувајќи се за дополнителни околу 516,2 илјади евра во вториот квартал, за во третиот квартал да достигне раст од уште околу 404,3 илјади евра. Вкупните расходи во периодот јануари - септември 2026 година изнесуваат околу 7,58 милиони евра и се повисоки за 6,3 проценти на годишно ниво. По квартали, расходите изнесуваа околу 2 милиони евра во првиот, над 2,8 милиони евра во вториот и околу 2,78 милиони евра во третиот квартал. Во однос на останатите финансиски показатели, кредитната задолженост е зголемена за околу 206,5 илјади евра, реализирани се капитални инвестиции во износ од околу 305,4 илјади евра, додека залихите на готови производи се намалени за околу 268 илјади евра. Компанијата изврши и исплата на дивиденда во износ од околу 234,9 илјади евра. Трендот на натфрлање на бизнис-планот продолжи низ сите три квартали од 2026 година, со надминување од 12,7 проценти во првиот, 43,3 проценти во вториот и 44,3 проценти во третиот квартал, потврдувајќи ја силната оперативна стабилност и високата ефективност на компанијата.

УЈП: До 26 октомври е рокот за поднесување на ДДВ-04 пријавите и плаќање на обврските

Управата за јавни приходи (УЈП) упати потсетник до сите даночни обврзници дека крајниот рок за поднесување на ДДВ-04 пријавите и за плаќање на даночниот долг за месец септември, како и за третиот квартал од 2026 година, е понеделник, 26 октомври. По поместувањето доаѓа бидејќи редовниот законски рок, 25 октомври, паѓа во недела. Во овој даночен период се поднесуваат и месечните и тримесечните ДДВ-04 пријави. Од даночната управа апелираат до сите деловни субјекти да не го чекаат последниот ден за исполнување на обврските со цел да се избегне преоптоварување на електронскиот систем и евентуални технички пречки при поднесувањето. Од УЈП нагласуваат дека редовното и навремено исполнување на даночните обврски директно придонесува за финансиската стабилност на деловните субјекти и за нивна целосна усогласеност со даночната регулатива. За сите дополнителни прашања и поддршка, даночните обврзници можат да се обратат до Управата за јавни приходи преку електронската пошта или на телефонските броеви 0800 33 000 за повици од фиксна линија и 02 3253 200 за повици од мобилен телефон.

Објавени јавни повици за ангажирање стручни лица за хидросистемот „Злетовица“

Министерството за земјоделство, шумарство и водостопанство (МЗШВ) ги повика сите заинтересирани квалификувани стручњаци да аплицираат на четирите отворени јавни повици во рамките на подготовката на проектот „Злетовица - продуктивност преку наводнување и обновлива енергија“, кој се реализира со поддршка од Светска банка. Овој значаен капитален проект предвидува подготовка на инвестиции во наводнувањето и во хидроенергетските капацитети на хидросистемот „Злетовица“, со цел поефикасно користење на водните ресурси, директна поддршка за земјоделството и развој на обновливите извори на енергија во државата. Отворените позиции ги опфаќаат следните профили со соодветни рокови за поднесување на апликациите: За позициите локален специјалист за животна средина и социјални аспекти и локален инженер за хидроенергија, рокот за пријавување е до 27 октомври 2026 година, до 12:00 часот. За позициите локален специјалист за наводнување (градежен инженер) и локален хидромашински инженер, кандидатите можат да ги достават своите апликации најдоцна до 30 октомври 2026 година, исто така до 12:00 часот. Пријавите можат да се достават електронски на мејл-адресата , како и лично или по пошта на адресата на Министерството за земјоделство, шумарство и водостопанство на улица „Ленинова“ број 2 во Скопје, со соодветна назнака за проектот PIREP. Деталните услови, потребните квалификации и критериумите за избор се достапни на официјалната веб-страница на МЗШВ и на специјализираниот портал за набавки.

Просечната нето-плата во август достигна 48.733 денари, годишен раст од 7,6 проценти

Просечната месечна исплатена нето-плата во август достигна 48.733 денари, што претставува зголемување од 7,6 проценти во споредба со истиот месец од претходната година. Најизразено годишно зголемување на нето-платата е забележано во секторот Снабдување со вода, отстранување на отпадни води, управување со отпад и дејности за санација на околината каде што растот изнесува 11,9 проценти. Потоа следуваат Административните и помошните услужни дејности со раст од 10,7 проценти, како и Преработувачката индустрија со зголемување од 9 проценти. На месечно ниво, односно во споредба со јули, најголем скок на просечната нето-плата е евидентиран во секторот Снабдување со електрична енергија, гас, пареа и климатизација за 5,4 проценти, Уметност, забава и рекреација за 5 проценти, како и во Административните и помошните услужни дејности за 4,2 проценти. Во истиот период, просечната месечна исплатена бруто-плата по вработен во август достигна 73.336 денари, бележејќи идентичен годишен раст од 7,6 проценти во споредба со август минатата година. Зголемувањето на бруто-примањата на годишно ниво најмногу е поттикнато од растот во секторот Снабдување со вода и управување со отпад од 12,1 процент, Административните и помошните услужни дејности со 10,8 проценти и Преработувачката индустрија со 9,1 процент. Кај месечните движења на бруто-платата, највисок раст забележаа Снабдувањето со електрична енергија и гас за 5,5 проценти, Уметноста, забавата и рекреацијата за 5,3 проценти и Административните дејности за 4,3 проценти.