Финансии

Исплатени 461,5 милиони денари на 23 илјади полјоделци

Министерството за земјоделство, шумарство и водостопанство информира дека Агенцијата за финансиска поддршка во земјоделството и руралниот развој денеска реализираше исплата од 461.492.542 денари, наменети за 23.874 полјоделци. Средствата се исплатени согласно Програмата за финансиска поддршка во земјоделството за 2025 година, а се однесуваат на директните плаќања по обработлива земјоделска површина за полјоделски култури, лековити, ароматични и зачински растенија, како и за цвеќе. Корисници на оваа финансиска поддршка се земјоделските стопанства кои во производната 2024/2025 година имаат засеани и ожнеани површини со низа полјоделски култури. Помошта ги опфаќа производителите на пченица, јачмен, пченка, ориз, ’рж, овес, тритикале, хељда, соја, сончоглед, тутун, маслодајна и добиточна репка, афион, шеќерна репка, памук, како и низа други житни, индустриски и фуражни култури.

Општина Прилеп доделува по 3.000 денари финансиска поддршка за секое прваче

Градоначалникот на Прилеп, Дејан Проданоски, објави дека Општина Прилеп за првпат овозможува еднократна финансиска помош во износ од 3.000 денари за секое дете запишано во прво одделение во основните училишта на територијата на општината. Целта на оваа нова мерка е директно да им се помогне на семејствата и да им се олеснат првичните трошоци на самите почетоци од образованието на најмладите. Родителите и старателите на првачињата можат да ги поднесуваат своите барања почнувајќи од денес, 2 септември, а рокот за аплицирање трае до 18 септември 2026 година. Целиот јавен повик, заедно со потребната документација, условите за остварување на правото, начинот на поднесување и соодветните обрасци за аплицирање, се веќе достапни на официјалната веб-страница на Општина Прилеп (prilep.gov.mk).

Се укинува правилото за најниска цена, ќе се бара најдобар сооднос меѓу цената и квалитетот при избор на најповолна понуда во јавните набавки

Владата го усвои Предлог-законот за изменување и дополнување на Законот за јавните набавки, со кој се спроведуваат клучни реформи предвидени во Реформската агенда и Планот за раст на Европската Унија за Западен Балкан. Овие измени имаат за цел модернизација на системот, зголемување на конкуренцијата и подобрување на транспарентноста при трошењето на јавните средства. Една од најзначајните новини е задолжителната примена на критериумот „најдобар сооднос помеѓу цена и квалитет“ при изборот на најповолна понуда. Со ова се укинува практиката институциите автоматски да ја избираат најниската цена, овозможувајќи проценка на квалитетот, долгорочната оправданост и вистинската вредност на понудите. Законските измени предвидуваат и сериозно зајакнување на дигитализацијата во јавните набавки. Бирото за јавни набавки добива проширени надлежности за користење дигитални алатки со кои ќе се следат постапките, ќе се препознаваат ризиците и ќе се спречуваат злоупотребите и корупцијата. Воедно, се воспоставуваат веб-сервиси за автоматска размена на податоци меѓу институциите. Дополнително, се унапредува Електронскиот пазар на набавки од мала вредност, а се менува и системот за кадар: наместо досегашната периодична ресертификација со повторно полагање испит, за службениците за јавни набавки се воведува модел на континуирано професионално усовршување.

Со 92,7 милиони денари од Министерството за финансии ќе се реконструира Клиниката за физикална медицина во Скопје

Започнува комплетната реконструкција на ЈЗУ Универзитетска клиника за физикална медицина и рехабилитација во Скопје. Станува збор за инвестиција вредна 92,7 милиони денари без ДДВ, реализирана преку грант-средства од Светската банка и Инвестициската рамка за Западен Балкан (WBIF). Договорот за грант веќе го потпишаа Министерството за финансии и Министерството за здравство, а проектот ќе се спроведува преку Проектната единица при Министерството за финансии. Оваа инвестиција има за цел темелно подобрување на условите за пациентите и медицинскиот кадар, како и постигнување висок степен на енергетска ефикасност. Реконструкцијата ќе опфати осум меѓусебно поврзани објекти со вкупна грејна површина од 7.247 квадратни метри. Предвидените градежни зафати вклучуваат поставување термичка изолација на фасадите и крововите, замена на дотраената столарија со нова енергетски ефикасна, санација на санитарните јазли и вградување современо LED-осветлување. Клучна промена е модернизацијата на системот за греење и ладење. Со инсталирање високоефикасни топлински пумпи и вентилаторски конвектори, досегашното загревање на мазут целосно се исфрла од употреба. Со ова значително ќе се намалат трошоците за енергија, ќе се олесни функционирањето на клиниката и ќе се елиминира негативното влијание врз животната средина, овозможувајќи посовремени и пофункционални услови за престој и лекување.

Народна банка: Од 1 ноември ИБАН станува задолжителен за сите плаќања

Советот на Народната банка ги разгледа најновите макроекономски показатели кои потврдуваат дека домашната економија покажува отпорност во услови на неповолно и неизвесно надворешно окружување. Според банката, економската активност во вториот квартал забележува забрзување, најмногу благодарение на силниот раст во градежништвото, подобрувањето во индустриското производство и зголемениот реален промет во угостителството. Инфлацијата се движи во рамките на очекувањата и продолжува да забавува, додека девизните резерви на крајот на јуни изнесуваат околу 5 милијарди евра, со што се одржуваат во сигурната зона. Исто така, банкарскиот сектор бележи солиден раст на депозитите и кредитирањето, коешто се одвива со посилна динамика од првично предвидената. На седницата беше донесена и нова Одлука за водечкиот број на давателите на платежни услуги и стандардите за конструкција на платежните сметки. Со овие измени регулативата целосно се хармонизира со стандардите на Единствената област за плаќања во евра (СЕПА). Главната новина за сите граѓани и компании е воведувањето на стандардот ИБАН како единствена задолжителна ознака за платежна сметка при извршување на сите национални платежни трансакции, почнувајќи од 1 ноември 2026 година. Со ова се обезбедува целосна стандардизација на сметките во домашниот и во прекуграничниот платен промет.

Големо олеснување за земјоделците: Се укинува условот од 30% предадено производство за субвенции

По низата непосредни средби со земјоделците и сточарите ширум земјата, Борче Серафимовски најави значајни измени во системот за директни плаќања. Поради екстремните временски услови, појавата на болести кај сточниот фонд и отежнатите пазарни услови за пласман, критериумите за добивање субвенции ќе се приспособат на реалните состојби на терен. На негов предлог, од Уредбата целосно се укинува обврската висината на субвенциите да зависи од остварен минимум од 30 проценти продадено или предадено производство. Министерството за земјоделство, шумарство и водостопанство веќе ја подготви новата Уредба за изменување на Уредбата за поблиските критериуми за директните плаќања, корисниците на средствата, максималните износи и начинот на директните плаќања за 2026 година. Со овие измени директно се олеснува пристапот до државната поддршка за производителите на житни, индустриски, лозови, овошни и градинарски култури, како и за одгледувачите на јагниња. Серафимовски истакна дека се очекува изменетата Уредба да биде изгласана на следната седница на Владата.

Построга контрола врз јавните пари: Димитриеска-Кочоска најави национален испит за овластени ревизори

Министерката за финансии, Гордана Димитриеска-Кочоска, најави два клучни чекори за зајакнување на контролата и ревизијата при управувањето со јавните средства. Според неа, силните институции и транспарентното трошење се темелот врз кој се гради довербата на граѓаните во системот. Овие реформски чекори директно придонесуваат за исполнување на обврските од Поглавјето 32 - Финансиска контрола и реализација на Реформската агенда за приближување кон европските стандарди. Првиот значаен чекор е унапредувањето на институционалната соработка со Државниот завод за ревизија преку потпишување Меморандум за соработка. Со ова се воспоставува цврста основа за заедничка борба против неправилности, измами и коруптивни дејствија во јавниот сектор. Партнерството предвидува засилена координација, размена на податоци и искуства, како и примена на европските стандарди со цел поефикасна заштита на државниот буџет. Како втор чекор, министерката го најави организирањето на првиот национален испит за стекнување уверение за овластен внатрешен ревизор во јавниот сектор. Со ова за првпат во земјава се воспоставува национална сертификација на внатрешните ревизори. Димитриеска-Кочоска истакна дека секој денар од домашниот буџет и секое евро од европските фондови се средства на граѓаните, поради што зајакнувањето на човечкиот капитал и професионализацијата на кадрите остануваат основен приоритет.

Оилко на 31 август започнува со исплата на дивиденда, секој акционер ќе добие 600 денари по единечна акција

Компанијата „ОИЛКО КДА Скопје“ преку Македонската берза ја извести јавноста за почетокот на исплатата на дивидендата за 2025 година. Според донесената одлука на Собранието на акционери, исплатата на средствата официјално започнува на 31 август 2026 година. Вкупниот бруто-износ предвиден за распределба на акционерите изнесува 141.543.000 денари. Со оваа одлука, секој акционер на компанијата ќе добие бруто-дивиденда од 600 денари по единечна акција. Исплатата се врши врз основа на Одлуката бр. 0201-38/2-3, која е донесена за време на 21-вата седница на Собранието на акционери на Друштвото, одржана на 27 мај 2026 година.

Макпетрол на 31 август започнува со исплата на дивиденда: Ќе исплаќа по 4.620 денари за акција

Макпетрол АД Скопје“ преку Македонска берза ја извести јавноста и акционерите за исплата на дивидендата по Годишната сметка за 2025 година. Според утврдениот дивиденден календар и одлуката донесена на последното Годишно собрание на акционери, исплатата официјално започнува на 31 август 2026 година. Вкупниот бруто-износ предвиден за распределба на дивиденда изнесува 467.285.280 денари. Со оваа одлука, акционерите на компанијата ќе добијат бруто-дивиденда во износ од 4.620 денари по единечна акција. Исплатата се врши врз основа на донесената Одлука број 0201-36/2-4 од 26 мај 2026 година, изгласана за време на триесеттото Годишно собрание на акционери на Друштвото.

Исплатени над 15 милиони денари субвенции на земјоделци кои се занимаваат со органско производство

Министерството за земјоделство, шумарство и водостопанство информираше дека преку Агенцијата за финансиска поддршка во земјоделството и руралниот развој е реализирана финансиска поддршка од вкупно 15.372.229 денари. Средствата се исплатени на сметките на 987 корисници од Програмата за органско производство за 2024 година. Овие финансиски средства имаат за цел поддршка и поттикнување на одржливото земјоделско производство и помош за земјоделците кои применуваат еколошки стандарди. Според структурата на исплатените средства, најголемиот износ е одвоен за процесот на сертификација, каде што се исплатени 9.589.057 денари на 808 земјоделци. За поддршка на органските овошни насади, реализирана е исплата од 4.606.441 денар на 155 корисници. Покрај ова, средства се распределени и за анализа на почвата, каде 26.830 денари се префрлени на пет корисници. Со исплатата се опфатени и субјектите кои се занимаваат со финалниот пласман на органските производи. За трговија со органски производи се исплатени 963.997 денари на 16 корисници, додека за преработка на органски производи се отпределени 185.904 денари на три корисници. Од Министерството посочуваат дека поддршката за целиот синџир, од обработка на почвата и сертификација до преработка и пласман е клучна за развојот на органското земјоделство во државата.