Министерството за финансии го донесе новиот Правилник за утврдување на репутацијата, интегритетот и потеклото на средствата за приредување игри на среќа. Овој подзаконски акт директно произлегува од новиот Закон за игри на среќа кој беше изгласан во јуни оваа година со цел воспоставување појасна, современа и поефикасна регулатива во оваа дејност.
Со новиот правилник се дефинира деталната документација што мора да ја приложат сите правни и физички лица кои поднесуваат барања за добивање лиценци за казина, обложувалници, автомат клубови или затворени томболи.
Апликантите се должни да достават комплетна документација со која потврдуваат дека ги исполнуваат условите за деловна репутација и интегритет. Ова опфаќа докази дека на лицата не им се изречени санкции за забрана за вршење професија, дејност или должност, како и потврди дека немаат казна за забрана за приредување игри на среќа.
Проверката на репутацијата се однесува на содружниците и соработниците во компаниите, но и на членовите на органите на управување и надзор во трговските друштва за игри на среќа каде што државата се јавува како единствен акционер.
Правилникот воспоставува детална контрола врз потеклото на средствата кои се вложуваат во основната главнина на компаниите. Министерството за финансии преку банкарски извештаи, договори и финансиски биланси ќе ја проверува целосната трага на парите од нивниот првичен извор до уплатата во друштвото.
Покрај тоа, прецизно се регулираат и постапките за какви било идни промени во сопственичката структура, промени на капитал или именување нови членови во управните органи. Сите овие механизми се воведени како клучен фактор во борбата против спречувањето перење пари и финансирањето тероризам. Министерството за финансии префрли нов трансфер во износ од 176,5 милиони денари, односно 2,9 милиони евра, од централниот Буџет кон Развојната банка за директна поддршка на инвестициски проекти во домашните компании.
Со оваа најнова уплата, вкупната владина поддршка наменета за домашниот бизнис-сектор достигна 14,7 милијарди денари или околу 239 милиони евра. Во државниот Буџет за оваа намена се планирани вкупно 250 милиони евра, кои треба да послужат како силен поттик за нов инвестициски циклус во приватниот сектор.
Овие финансиски средства се обезбедени преку договорот што Владата го склучи со унгарската Експорт-импорт банка. Парите се пласираат до крајните корисници и домашните компании преку Развојната банка и мрежата на деловните банки во земјава.
За домашните бизниси се обезбедени исклучително поволни услови за кредитирање. Финансиската поддршка се доделува со фиксна каматна стапка од 1,95 проценти, рок на отплата до 15 години и вклучен грејс-период до 3 години, што овозможува олеснето планирање и реализација на долгорочни капитални инвестиции. Владата, на предлог на Министерството за финансии и Комитетот за јавни инвестиции, ја усвои Првата конечна приоритетна листа на предлог-проекти за јавни инвестиции. Листата содржи вкупно 41 проектна идеја, кои претходно поминаа низ детална филтрација и оценка на нивната подготвеност, стратешка релевантност и одржливост. Со ова се воведува нов, посистематски и потранспарентен пристап во планирањето на капиталните проекти со средна и голема вредност, односно за сите инвестиции кои надминуваат 5 милиони евра.
На новата приоритетна листа се наоѓаат проекти насочени кон развој на неколку витални области, како што се инфраструктурата, образованието, здравството, енергетиката, дигитализацијата, земјоделството и водостопанството. Сите предлог-идеи беа подготвени од самите матични институции, по што Министерството за финансии изврши детална проверка на документацијата и финансиската изводливост, за на крај Комитетот за јавни инвестиции да ги достави до Владата за финално одобрување.
Оваа листа ќе послужи како клучна основа при дефинирањето на новите капитални инвестиции во буџетскиот процес за 2027 година, како и за инвестициските програми на јавните претпријатија и државните акционерски друштва. Од Министерството за финансии нагласуваат дека самиот престој на проектот на оваа листа не значи автоматска обврска за негово финансирање ниту конечна одлука за реализација. Крајната одлука ќе се носи во рамките на расположливите средства во буџетот, во зависност од зрелоста на самиот проект и владините приоритети за соодветната фискална година.
Целиот процес е усогласен со Реформската агенда 2024-2027 и произлегува од новата Уредба за управување со јавни инвестиции донесена врз основа на Законот за буџети. Листата е веќе јавно достапна на веб-страницата на Министерството за финансии. Инфлацијата во Македонија забележа минимален раст во минатиот месец. Според најновите податоци на Државниот завод за статистика (ДЗС), инфлацијата мерена преку индексот на трошоците на животот во јули, во однос на јуни, изнесува 0,1 процент.
На годишно ниво, односно во споредба со јули 2025 година, трошоците на животот бележат зголемување од 2,3 проценти, додека индексот на цените на мало е зголемен за 1,8 проценти. Индексот на цените на мало во јули споредено со јуни изнесува 101,3.
Најголем скок кај транспортот, храната со пад на цените
Анализата по групи покажува дека најголем влијателен фактор за месечниот раст на трошоците биле транспортот и летните одмори. Во групата транспорт е забележано зголемување од 4,4 проценти, а кај рекреацијата, спортот и културата растот изнесува 2,6 проценти. Помал раст е забележан и кај домувањето, водата, струјата и гасот за 0,9 проценти, рестораните и сместувањето за 0,7 проценти, образованието за 0,3 проценти, како и кај алкохолните пијалаци и тутунот за 0,1 процент.
Од друга страна, зачувувањето на стабилноста на инфлацијата во јули главно се должи на падот на цените на основните прехранбени производи. Трошоците во групата храна и безалкохолни пијалаци бележат намалување од 1,1 процент. Пад на цените има и кај покуќнината и опремата за домаќинства за 1,4 проценти, облеката и обувките за 0,2 проценти, а кај комуникациите и здравствената заштита е забележано намалување од по 0,1 процент. Трошоците за финансиски услуги и лична нега останаа на исто ниво. Компанијата „Фабрика Карпош“ АД Скопје оствари позитивен финансиски резултат со бруто-добивка од околу 710 илјади евра во периодот од 1 јануари до 30 јуни, покажува неревидираниот Биланс на успех.
Во првите шест месеци од годинава, компанијата оствари вкупни приходи во износ од околу 10 милиони евра. Најголемо учество во нив имаат оперативните приходи, кои сочинуваат над 98 проценти од вкупните приходи и речиси целосно се реализирани на домашниот пазар. Финансиските приходи учествуваат со незначителен удел во вкупната структура.
Вкупните расходи во првото полугодие изнесуваат околу 9 милиони евра. Најзначаен дел од оперативните расходи се трошоците за кооперантски услуги, кои достигнаа околу 3,9 милиони евра, додека финансиските расходи бележат умерен пораст поради користење кредити за инвестиции.
Компанијата продолжи со модернизација и набавка на нова опрема, машини и транспортни средства, како и со доизградба и опремување на новиот производствен погон во индустриската зона Илинден, со цел зголемување на капацитетите и ефикасноста.
Заклучно со 30 јуни, вкупните обврски по основ на кредити и лизинг изнесуваат околу 2,17 милиони евра и покажуваат тренд на намалување. Кредитите заземаат мало учество во вкупната пасива, што укажува на ниско ниво на задолженост.
Во текот на 2026 година не е донесена одлука за исплата на дивиденда на акционерите. Раководството најавува дека во второто полугодие фокусот ќе биде ставен на интензивирање на договорите и зголемување на обемот на продажба. Царинската управа постави нов историски рекорд во месечната наплата на приходите, остварувајќи вкупно 229,89 милиони евра (над 14 милијарди денари) во текот на јули, информираше директорот Бобан Николовски. Ова е веќе четврти пат во последните две години институцијата да ги собори досегашните рекорди, бележејќи значителен скок од јули 2024 година кога наплатата изнесуваше над 12 милијарди денари.
Според раководството на Царинската управа, високиот финансиски резултат е директен показател за ефикасноста на реформите што се спроведуваат во изминатиот период. Континуираната модернизација на царинските процеси, дигитализацијата на услугите, прецизното таргетирање на ризиците и унапредувањето на професионалниот однос на царинските службеници кон стопанството овозможија побрз проток на стоки и поефикасна наплата на давачките.
Главните фактори кои придонесоа за рекордниот прилив на средства во државниот буџет за минатиот месец се зголемениот обем на набавки на опрема за потребите на Министерството за одбрана, како и забележителниот раст на увозот на нафта, нафтени деривати, тутун и тутунски производи.
Од Царинската управа истакнуваат дека остануваат посветени на градењето модерна и професионална институција која обезбедува стабилен прилив на средства во буџетот. Собраните приходи директно придонесуваат за подобрување на економската кондиција на државата и поддршка на јавните финансии. Цените на угостителските услуги во јули бележат зголемување од 1,1 процент во споредба со претходниот месец, соопшти Државниот завод за статистика (ДЗС).
Според официјалните податоци, најголем фактор за овој месечен раст се цените на ноќевањата, кои во јули пораснале за 5,6 проценти во однос на јуни. Во истиот период, цената на храната забележаа благо зголемување од 0,2 проценти, додека цените на алкохолните и безалкохолните пијалаци останаа непроменети.
Споредено со истиот месец од претходната година, угостителските услуги во јули се поскапи за 3,2 проценти.
За периодот јануари-јули цените во угостителството пораснале за 2,9 проценти во споредба со истиот период од лани. Дополнително, споредено со декември 2025 година, вкупното зголемување на цените во овој сектор изнесува 1,1 процент. 
