Заедничка акција на ренџерската служба од Националниот парк „Пелистер“ и полициски службеници од СВР Битола заврши со лоцирање и приведување на вооружени лица кои влегле длабоко во заштитената зона на планината. Акцијата започнала на 12 август по 19:00 часот, врз основа на претходно прибрани информации од теренот.
Во потрагата учествувале две патроли на паркот, предводени од директорот Иванчо Тошевски, заедно со полициски екипи, кои се движеле независно една од друга по исклучително тежок и непристапен терен на надморска височина од над 2.000 метри.
Едната патрола пристапувала од правец на селото Велушина, додека другата се движела од кај Инфоцентарот за да ги опколат лицата од повеќе страни. По повеќе од три часа пешачење во ноќни услови, околу 23:30 часот вооружените лица биле лоцирани во близина на локацијата Голема Грива, во зоната на строга заштита.
По нивното лоцирање, раководењето со акцијата го презеле полициските службеници. Целата операција завршила во раните утрински часови, околу 04:00 часот на 13 август, кога лицата биле спроведени во полициска станица.
Од ЈУНП „Пелистер“ упатија јавна благодарност до СВР Битола за високата професионалност и континуираната поддршка во заштитата на природното богатство. Од установата посочуваат дека овој дел од планината е тежок за редовна контрола бидејќи шумските патишта, кои се клучни за противпожарна заштита и патролирање, со години биле оставени да пропаѓаат.
Управата на паркот информира дека обновувањето на овие патни правци е високо на нивната агенда и веќе се работи на нивна санација, за подобро да се спречат идни обиди за незаконски активности во најзаштитените зони. Градоначалникот на Град Скопје, Орце Ѓорѓиевски, информираше дека официјално започна поставувањето на првиот слој асфалт на булеварот „Борис Трајковски“, со што се става крај на долгогодишните сообраќајни метежи за над 100.000 граѓани кои секојдневно транзитираат низ овој дел од градот.
Проектот се реализира со силно темпо, откако за нешто повеќе од три месеци беа надминати сите пречки што со години го кочеа неговото завршување.
Клучниот чекор за ослободување на трасата е успешното решавање на деценискиот проблем со имплементацијата и експропријацијата на земјиштето. Градоначалникот упати благодарност до стопанствениците за нивниот коректен и домаќински пристап, со чија соработка се создадоа услови за непречена работа на градежната механизација.
Според планот за градба, по завршувањето и асфалтирањето на едната страна, сообраќајот ќе биде пренасочен, по што веднаш ќе започне целосната реконструкција и поставувањето нов асфалт и на другиот дел од коловозот.
Покрај површинското асфалтирање, на целата траса паралелно е изградена и соодветна нова атмосферска канализација. Со ова подземно решение се обезбедува правилно одведување на атмосферските води, поголема безбедност во сообраќајот за време на врнежи и долготрајност на новиот булевар за наредните децении. Градот Скопје доби нов и значаен социјален сервис. Градоначалникот Орце Ѓорѓиевски, заедно со министерот за социјална политика, демографија и млади, Ѓоко Велковски, во просториите на Младинскиот културен центар (МКЦ) официјално го отворија Центарот за дневен престој за лица со попреченост од 14 години и нагоре.
Овој центар претставува значаен чекор напред кон градење на вистинска еднаквост и инклузивност во општеството, обезбедувајќи простор за сигурност, грижа и стручна поддршка за лицата на кои им е најпотребна.
Во новиот Центар, корисниците ќе имаат можност да добиваат континуирана психолошка и професионална поддршка. Содржините опфаќаат учество во разни едукативни, креативни и рекреативни активности, преку кои лицата со попреченост ќе развиваат практични и животни вештини за зголемување на нивната самостојност и самодоверба.
Покрај директната поддршка за корисниците, објектот има важна улога и за нивните семејства, родители и старатели. Центарот овозможува сигурно место каде што нивните најблиски се згрижени, почитувани и поттикнати да ги развиваат сопствените потенцијали и таленти.
За време на отворањето беше истакнато дека главната цел на проектот е фокусот да се стави врз можностите и способностите на секој поединец, а не врз ограничувањата. Скопје треба да биде град каде што различностите не се пречка, туку мотив за поголема хуманост и меѓусебна поддршка.
Овој дневен центар е замислен да функционира како повеќе од обичен простор за престој, односно да прерасне во место за учење, социјализација, градење нови пријателства и целосна интеграција во заедницата. 
