Министерот Азир Алиу денеска објави дека Министерството за здравство за прв пат започна со детална анализа на човечките ресурси во јавните и приватните здравствени установи низ државата, трансформирајќи ја креацијата на здравствени политики во процес базиран на точни и ажурирани податоци. Анализата произлезе од институционален процес на вкрстување на податоци добиени од повеќе клучни институции, вклучувајќи ги Централен регистар, Агенцијата за вработување, сите стручни комори (Лекарска, Стоматолошка, Фармацевтска), Управата за електронско здравство и Фондот за здравствено осигурување. Според добиените податоци, вкупниот број на здравствени установи во државата е 3.779, од кои 2.942 се во мрежата на здравствени установи. Бројот на вработени во јавниот и приватниот сектор изнесува 32.383, од кои 18.536 се вработени во Јавните здравствени установи (ЈЗУ), а 13.847 во приватниот сектор. Во јавното здравство, лекари и медицински соработници на секундарно и терциерно ниво се 4.746, а медицински сестри се 7.003. Министерот, кој е по професија информатичар, нагласи дека овој процес е воден како инженерски проект на вкрстување на податоци од сите нивоа на здравствена заштита – примарно, секундарно и терциерно – со анализа на дистрибуцијата во сите општини и региони. Ова е почеток на воспоставување динамичен регистар на работници во здравството кој ќе овозможи податоците да се гледаат во реално време, следејќи го движењето на човечките ресурси од пензионирања до нови вработувања и специјализации. Како директна придобивка за граѓаните, Алиу посочи дека новите вработувања и зајакнувањето на здравствената заштита, особено во примарното здравство во општините, ќе бидат одговор на конкретни потреби базирани на точни податоци, со што ќе се спречат дисбаланси во бројот на лекари по жител. Универзитетската клиника за хируршки болести „Св. Наум Охридски“ доби нов апарат за магнетна резонанца, кој значително ќе ги унапреди дијагностичките процедури и ќе го скрати времето на чекање за пациентите. Клиниката денеска ја посетија министерот за здравство, Азир Алиу и премиерот Христијан Мицкоски. Министерот Алиу истакна дека ова е дел од континуираните напори на Владата и Министерството за здравство за унапредување на дијагностичките процедури, со цел овозможување здравствени услуги во реално време и со повисок квалитет. Директорот на клиниката, Небојша Настов, посочи дека новиот апарат е дел од инвестиција во најсовремена медицинска опрема во вкупна вредност од 90 милиони денари, обезбедена минатата година. Настов појасни дека новата генерација на апарати за магнетна резонанца директно ќе влијае на бројот на прегледи и нивното времетраење. Со претходниот апарат, кој бил стар 16 години, годишно се извршувале околу 4.000 магнетни резонанци, додека со новиот апарат, очекувањата се за најмалку 5.000 снимања годишно, со истовремено скратување на времето на самите прегледи. Покрај апаратот за МР, директорот информираше дека во клиниката се обезбедени и два нови лапароскопски столба и инструменти за трауматологија. Имплементацијата на оваа опрема се очекува да го намали притисокот врз дијагностичкиот сектор и да обезбеди побрз пристап до квалитетна здравствена нега за пациентите. Секторот за внатрешни работи (СВР) Струмица откри и разби група од четири лица, вклучувајќи и вработен во обезбедување, кои се сомничат за кражба на предмети од рудникот „Бучим“ во Радовиш и нивна понатамошна продажба на нелегален отпад. Акцијата започнала на 18.11.2025 година во 09:00 часот, на стариот магистрален пат Струмица-Радовиш, во близина на село Владевци. Полициски службеници од СВР Струмица ги лишиле од слобода А.Д.(31) и К.И.(19), двајцата од Струмица, откако при преглед на товарно возило „форд“ со струмички регистарски ознаки, пронашле делови од генератор. Истиот ден, во 12:30 часот во близина на село Воиславци, радовишко, лишен од слобода е и Е.У.(45) од Струмица, кој управувал друго товарно возило „форд“, во кое биле пронајдени генератор, алат и други украдени предмети. Врз основа на судска наредба, извршен е претрес во домот на А.Ш., при што во негова близина е пронајдена голема количина складиран отпад и стари возила. Инспектор за животна средина утврдил дека А.Ш. и Е.Д. неовластено тргуваат со овој отпад, со што извршиле кривично дело „загрозување на животната средина и природата со отпад“ по член 230 од Кривичниот законик. Во врска со настанот, од слобода е лишен и В.А.(32) од Радовиш, вработен во агенција за обезбедување на рудникот. Тој се сомничи дека за одреден паричен надомест им дозволувал на крадците преку спореден влез да влегуваат во кругот на рудникот и да ги одземаат предметите. Лицата се задржани во полициските станици во Струмица и Радовиш, а за случајот е запознаен јавен обвинител. По целосно документирање на случајот, против сите лица ќе биде поднесена соодветна кривична пријава. Царинската управа соопшти дека вчера на граничниот премин Табановце, царинските инспектори од мобилните тимови на Секторот за контрола и истраги спречиле обид за нелегално изнесување на голема сума девизи од државата и привремено заплениле 84.000 евра. Во текот на деталната контрола, извршена врз возило управувано од српски државјанин, царинските службеници пронашле вкупно 94.000 евра за кои патникот не поседувал соодветен документ за потекло и не ги пријавил, иако при претходната изјава навел дека со себе носи помалку од 1.000 евра. Поради сомневање во изјавата на патникот, царинските инспектори пристапиле кон детален претрес на возилото. Притоа, на совозачкото седиште, под машка јакна во црна рачна торбичка, биле пронајдени 44.000 евра, а во багажниот простор на возилото, во црна кожна ташна, биле пронајдени дополнителни 50.000 евра. Вкупната непријавена сума изнесувала 94.000 евра. Согласно Законот за девизно работење, на нерезидентот му е вратена дозволената сума од 10.000 евра која може да се изнесе од државата без пријавување. Останатиот износ од 84.000 евра е привремено одземен. Против српскиот државјанин ќе биде поднесена соодветна пријава за сторен девизен прекршок. Царинската управа апелира до граѓаните да ги почитуваат законските одредби за прекуграничен промет на парични средства и задолжително да ги пријават износите кои ја надминуваат законски дозволената граница. Мобилните тимови на Царинската управа во текот на изминатите две недели открија повеќе обиди за криумчарење и привремено задржаа широк спектар на стока, меѓу кои дрога, цигари, технолошка опрема, автоделови, облека и фалсификувани производи. - 2 употребувани фотоапарати SONY и CANON со објективи од 50мм кои при контрола на автобус кој сообраќал на редовна линија Брисел-Скопје, пријавен за влез во државата на граничниот премин Табановце, биле пронајдени сокриени во ќеса над првите седишта. Вредноста на апаратите е проценета на 87.300 денари, а избегнатите давачки се во износ од 20.864 денари. - При контрола на стока со потекло од Кина наменета за фирма од Скопје, а пријавена за увозно царинење во царинската испостава Гевгелија, откриени се 662.4м2, керамички плочки кои не биле опфатени со царинските документи. - Во друг случај, во делот за товар на возило пикап кој бил запрен за контрола во близина на граничниот премин Блаце, биле пронајдени 20 употребувани делови за BMW X5 (хауба, браник, поткрила, полуосовини, зглобови, амортизери, врата, халогенки, фар, воздушно пернилче и друго). - Автобус со турски регистарски таблици е запрен на наплатната рампа Петровец и однесен до царинската испостава Скопје 4 со цел да се изрши детална контрола. Притоа е откриено дека внатрешноста на компресорот за климатизација е празна и прилагодена за криумчарење стока. - При личен претрес на сопатничка во автомобил на влез во државата на граничниот премин Табановце, пронајдени се 2 грама кокаин завиткани во најлонска кесичка. - 1.632 играчки со ознаки на заштитена трговска марка, биле пронајдени при контрола на стока со потекло од Кина сместена во јавен царински склад и пријавена за увозно царинење. Играчките се задржани поради сомневање дека повредуваат права од интелектуална сопственост. - 39 парчиња облека и 3 женски чанти се пронајдени во две кутии кои биле сместени на седиштата на патничко комбе кое се пријавило за влез во државата на граничниот премин Табановце. Вредноста на производите изнесува 137.000 денари а избегнатите давачки се во износ од 52.773 денари. - Царински инспектори од Службата за мобилни скенери на влез во државата на граничниот премин Богородица откриле непријавени 11 штеки цигари без акцизни маркички под возачкото седиште, на задното седиште и во багажникот на автомобил. Вредноста на цигарите изнесува 12.262 денари, а избегнатите давачки се во износ од 21.830 денари. Во два одвоени случаи од страна на царински службеници на граничниот премин Ново Село се откриени: - 45 М-ТАГ апарати за плаќање патарина кои биле сокриени во багажникот на автомобил пријавен за влез во државата. Вредноста на апаратите изнесува 69.255 денари а избегнатите давачки се во износ од 9.676 денари. - 1 турбина марка BorgWarner 14G25-0037 е пронајдена во багажникот на автомобил пријавен за влез во државата. Вредноста на турбината изнесува 69.255 денари, а избегнатите давачки се во износ од 15.436 денари. На граничниот премин Богородица во два одвоени случаи откриение се 240 пара патики со ознаки на заштитена трговска марка и 59 машки џемпери. - Во првиот случај, при контрола на камион кој бил пријавен за влез во државата, пронајдени се 240 пара патики со ознаки на заштитена трговска марка. Стоката е задржана поради сомневање дека повредува права од интелектуална сопственост. - Во вториот случај, во внатрешноста и во багажникот на автомобил, пријавен за влез во државата, биле пронајдени непријавени 59 машки џемпери. Царински службеници на влез во државата на граничниот премин Дојран, открија 134 текстилни производи и 232 парчиња бижутерија. Стоката била пронајдена во ќеси кои биле сместени на задните седишта и во багажникот на автомобил. Вредноста на непријавените производи изнесува 47.270 денари, а избегнатите давачки се во износ од 17.882 денари. На граничниот премин Табановце пронајдени се 57 парчиња облека во две патни торби кои биле сместени во багажникот на автомобил пријавен за влез во државата. Вредноста на непријавената стока изнесува 98.500 денари, а избегнатите давачки се во износ од 35.946 денари. Министерството за внатрешни работи (МВР) денеска информираше за успешна координирана полициска операција, спроведена на 16.11.2025 година, со која беше сузбиена криминална група инволвирана во криумчарење мигранти и изнуда. Под раководство на јавен обвинител од Основното јавно обвинителство за гонење на организиран криминал и корупција (ОЈО ГОКК), Националната единица за сузбивање на криумчарење мигранти и трговија со луѓе, во содејство со Одделот за специјални и посебни операции и Одделот за криминалистичка полиција, ја спровеле акцијата врз основа на претходно добиени оперативни сознанија. При преземањето на мерките, во местото викано Ресуљка, во близина на граничната линија со Република Србија, беа откриени два импровизирани кампови. Во нив се пронајдени вкупно осум илегални мигранти, од кои двајца државјани на Пакистан и шестмина од Авганистан, меѓу кои и две деца. Националната единица за сузбивање на криумчарење мигранти и трговија со луѓе, до ОЈО ГОКК поднесе кривична пријава против пет лица, сите државјани на Авганистан: З.Х.(20), Џ.Д.(31), В.Х.(34), А.Ш.(37) и едно 15-годишно лице. Тие се осомничени за сторено кривично дело „Криумчарење мигранти“ по членовите 418-а и 418-б од Кривичниот законик. Според полициските информации, пријавените во повеќе наврати ги прифаќале и илегално пренесувале мигранти од Грција до импровизираните кампови, дејствувајќи како водичи. Откако ги засолнувале, осомничените З.Х. и Џ.Д. со употреба на сила и закана, од мигрантите изнудувале парични средства за да им овозможат понатамошно префрлање на територија на Србија, а со крајна дестинација земјите од Европската унија. Премиерот Мицкоски денеска објави дека успешно е извршена првата трансплантација на рожница во државата, со што Македонија се вбројува меѓу ретките земји во регионот кои спроведуваат вакви сложени офталмолошки интервенции. „Ова претставува исклучително значаен и долгоочекуван чекор напред за нашата држава, за здравството и пред се за пациентите кои имаат потреба од ваков вид високо-специјализиран третман“, изјави премиерот Мицкоски. Операциите се изведени од врвни доктори од Duke University (САД), еден од највисоко рангираните универзитети за клиничка медицина во светот. Американскиот тим, составен од докторите Лојд Вилијамс, Николас Гарсон и Шина Сонг, работеше заедно со тим на македонски офталмолози. Целокупниот процес беше координиран од Проф. д-р Билјана Кузмановска, Национален координатор за трансплантација, и Доц. Д-р Наташа Трпевска Шекеринов, директор на Универзитетската клиника за очни болести во Скопје. 
