Најнови

Поставени фотоволтаици на 12 јавни установи во Кавадарци: Вкупната инсталирана моќност достигна 355 киловати

Општина Кавадарци ги заврши активностите за поставување фотоволтаични системи на сите 12 предвидени јавни установи во градот, со што вкупната инсталирана моќност достигна 355 киловати. Градоначалникот Митко Јанчев објави дека овие вложувања во енергетска ефикасност ќе овозможат значително намалување на сметките за електрична енергија и заштеда на буџетски средства во јавниот сектор. Фотоволтаичните модули се обезбедени преку донација од компанијата „Пиксел гроуп“ во вредност од 4,5 милиони денари. Системите за производство на соларна енергија се веќе ставени во функција на зградата на локалната самоуправа, основното училиште „Димката Ангелов Габерот“, средното училиште „Ќиро Спанџов Брко“, сите пет објекти на детската градинка, ЈЗУ Општа болница со проширена дејност, Домот на културата „Иван Мазов Климе“, библиотеката „Феткин“ и Основниот суд во Кавадарци, додека во тек се градежните работи за поставување систем од 35 киловати и на објектот на Основното јавно обвинителство. Со овој чекор, Кавадарци го продолжува проектот започнат пред четири години, кога стана првата општина во државата со поставени 200 киловати соларни панели на општинските објекти. Ослободените финансиски средства од заштедите на електрична енергија ќе бидат пренасочени за финансирање на други капитални проекти и потреби на граѓаните.

Со воведување на системот „Безбеден Град“: За осум месеци 34 помалку загинати лица во сообраќајки

Податоците од евиденциите на Министерството за внатрешни работи за првите осум месеци од 2026 година покажуваат значително подобрување на безбедносната состојба во патниот сообраќај. Во периодот јануари-август животот го загубиле 62 лица, што е намалување за 35,42 проценти во споредба со истиот период од 2025 година кога имало 96 жртви, односно регистрирани се 34 загинати лица помалку. Вкупниот број настрадани лица е намален за 18,24 проценти, спаѓајќи од 4.731 на 3.868 лица. Воедно, вкупниот број сообраќајни незгоди забележа пад од 11,76 проценти, односно од 5.485 на 4.840 случаи. Намалување е евидентирано и кај сообраќајките со смртни последици за 34,15 проценти, кај оние со тешки телесни повреди за 11,11 проценти, додека несреќите со материјална штета се намалени за 6,20 проценти. Ова подобрување доаѓа по подолг период во кој бројот на жртви во сообраќајот се одржуваше на високо ниво, каде во периодот од 2010 до 2025 година годишно загинувале меѓу 116 и 198 лица. Од МВР посочуваат дека позитивниот тренд во 2026 година е директен резултат на интегрираниот пристап кој вклучува законски измени, засилени полициски контроли и континуирани превентивни активности. Клучен фактор во овој процес е функционирањето на системот „Безбеден град“, кој започна со автоматско санкционирање на 1 февруари оваа година. Преку автоматското детектирање на прекршоците, електронската обработка на предметите и известувањето преку СМС и електронска пошта, воспоставен е модел на континуирано и неселективно постапување. Од МВР најавуваат натамошно проширување на овој систем со цел дополнително намалување на сообраќајните несреќи и зачувување на човечките животи.

Дневен Хороскоп (24 септември 2026)

Божиновска: Соларната енергија е сегашноста, но следниот чекор е ред, план и силна мрежа

Министерката за енергетика, рударство и минерални суровини, Сања Божиновска, ја отвори петтата Годишна соларна конференција во организација на Македонската соларна асоцијација - Солар Македонија. Пред присутните компании, инвеститори и експерти од секторот, Божиновска порача дека соларната енергија е веќе реалност во домашниот енергетски сектор, но дека во следната фаза е потребен подобро планиран и подлабок системски пристап. Министерката подвлече дека изградбата на нови капацитети од обновливи извори мора да биде усогласена со капацитетот на дистрибутивната и преносната мрежа, со цел да се обезбеди долгорочна стабилност и функционалност на целиот енергетски систем. Со новата законска рамка за енергетика и обновливи извори се воведуваат годишни планови за развој на инфраструктурата кои однапред ќе дефинираат каде и под кои услови ќе можат да се градат нови енергетски капацитети. Покрај ова, Министерството става акцент врз модернизацијата и дигитализацијата на мрежата, како и врз развојот на системи за батериско складирање на енергијата. Паралелно се вршат подготовки и за идно користење на нови технологии, меѓу кои е изготвувањето на првата сеопфатна Водородна студија, додека новиот гасен интерконектор со Грција се проектира да овозможи и иден транспорт на зелен водород. Божиновска им порача на инвеститорите дека државата нуди отворена врата и сигурност, но исклучиво преку јасни, еднакви и предвидливи правила за сите учесници на пазарот.

Поставен камен-темелник на вториот маркет на „Лидл“ во Битола

Компанијата „Лидл“ официјално го означи почетокот на изградбата на својот втор продажен објект во Битола со свечено поставување на камен-темелник. Додека првиот маркет на компанијата во градот е во финална фаза од изградбата, со овој нов проект Битола станува еден од клучните центри во кои трговскиот синџир ја развива својата продажна мрежа во Македонија. Новиот маркет се гради според високи стандарди за енергетска ефикасност и еколошка одржливост. Објектот ќе се протега на површина од 5.288 квадратни метри, со современо уредена продажна сала од 1.546 квадратни метри, 108 обезбедени паркинг-места, додека над 20 проценти од парцелата се предвидени за зеленило и хортикултурно уредување. Директорката за недвижности во „Лидл“ Северна Македонија, Катарина Зориќ, истакна дека компанијата инвестира во изградба на сопствени објекти од самиот почеток со цел да создаде широка и функционална мрежа со највисоко ниво на квалитет и енергетска ефикасност. Градоначалникот на Битола, Тони Коњановски, изрази задоволство од почетокот на градбата и нагласи дека инвестицијата носи значајна додадена вредност за локалната економија. Тој подвлече дека проектот ќе овозможи отворање нови работни места, квалитетна понуда за потрошувачите и можности за деловни партнерства со домашните компании.

„Гентерм“ одбележа 10 години јубилеј во ТИРЗ Прилеп

Директорот на Дирекцијата за технолошки индустриски развојни зони (ДТИРЗ), Гоце Димовски, присуствуваше на одбележувањето на 10-годишниот јубилеј од отворањето на фабриката „Гентерм“ во ТИРЗ Прилеп. Присуството на јубилејот ја потврди континуираната соработка меѓу институциите и компаниите во зоните, со фокус врз создавањето стабилна, предвидлива и конкурентна деловна средина. Во своето обраќање, Димовски упати честитки до менаџментот и вработените, истакнувајќи дека десетгодишното присуство на оваа мултинационална компанија во Прилеп е доказ за значењето на партнерскиот однос меѓу државата и странските инвеститори. Димовски подвлече дека инвестициите од овој тип имаат многу пошироко економско значење преку отворањето нови работни места, зголемувањето на извозот, развојот на домашната економија и трансферот на нови знаења и вештини. „Одлуката на една мултинационална компанија да инвестира во Македонија е важен чекор. Но, уште поважно е таа компанија да продолжи да работи, да се развива, да инвестира во луѓето и да ја гледа земјата како дел од својата долгорочна стратегија. Тоа е вредноста на континуитетот. И токму тоа го одбележуваме денес. За нашата земја, присуството на компании како Гентерм има значење што ги надминува рамките на една инвестиција“, изјави Димовски. Тој ја истакна и посветеноста на Владата предводена од премиерот Христијан Мицкоски за унапредување на инвестициската клима, обезбедување стабилно деловно опкружување и континуиран дијалог со бизнис-секторот со цел отворање нови економски можности за граѓаните.

Исплатени 61,2 милиони денари за органско производство за 2024 година

Агенцијата за финансиска поддршка во земјоделството и руралниот развој денеска реализираше исплата од 61.261.085 денари на сметките на 1.049 земјоделски стопанства за органско производство за 2024 година, соопшти Министерството за земјоделство, шумарство и водостопанство. Финансиските средства се исплатени преку програмите за дополнителни директни плаќања, а висината на поддршката е пресметана според пријавената обработувана површина и одгледуваната бројност на грла добиток. Оваа директна поддршка има за цел да го олесни работењето на земјоделците кои применуваат сертифицирани органски практики, истовремено поттикнувајќи го одржливото земјоделско производство и зголемувањето на понудата на квалитетна домашна храна.

Димитриеска-Кочоска од Њујорк: Економскиот раст мора да се заснова врз продуктивност и енергетска независност

Министерката за финансии Гордана Димитриеска-Кочоска учествуваше на работната сесија „Поттикнување на растот во новата економија“, што се одржа во рамки на Состаноците за влијанието врз одржливиот развој 2026 во организација на Светскиот економски форум во Њујорк. На форумот, кој собра високи претставници на влади, меѓународни институции и бизнис-секторот, фокусот беше ставен врз воспоставувањето рамнотежа меѓу економскиот раст, енергетската транзиција и одржливоста. За време на дискусиите беше подвлечено дека зачувувањето на долгорочната конкурентност бара насочување на капиталните инвестиции кон проекти што гарантираат сигурно, пристапно и одржливо снабдување со енергија. Министерката Димитриеска-Кочоска истакна дека современите економски политики мора да се фокусираат на долгорочен раст заснован на продуктивност, создавање нови работни места со висока додадена вредност и целосна енергетска стабилност. „Економиите треба да се насочат на долгорочен раст, кој што ќе се заснова исклучиво на продуктивност. Понатаму, во рамки на дискусијата беше исто така заклучено дека на секоја економија ѝ е потребна што е поголема диверсификација по којашто ќе има и поголема додадена вредност. Исто така беше посочено дека треба да се креира што е можно повеќе високопродуктивни работни места и последно, но секако најзначајно, е тоа дека и понатаму треба да работиме на што е можна поголема енергетска независност, поголема одржливост и поголема стабилност во снабдувањето со енергенси“, истакна министерката Димитриеска-Кочоска. За Македонија, учеството на овој глобален форум претставува можност за креирање политики што ќе ја зголемат конкурентноста на домашните компании, преку обезбедување стабилни услови за инвестиции и одржливо снабдување со енергија.

Спречен обид за шверц на граничниот премин Табановце: Унгарски државјанин во повеќе торби сокрил 200.000 евра

Царинските службеници на граничниот премин Табановце спречија обид за нелегален внес на непријавени девизни средства во износ од 200.000 евра. Непријавените пари биле откриени кај унгарски државјанин кој се пријавил за влез во државата, а кој претходно не ги пријавил средствата кај царинските органи согласно законските прописи. Поради постоење сомнеж, возилото било селектирано за контрола, при што бил извршен детален преглед. При деталната контрола на возилото се откриени девизни средства распределени во повеќе црни торбички сокриени на неколку локации. Помеѓу менувачот во ташна била пронајдена торбичка со 65.000 евра. Во ранец на задното седиште, покриена со компјутер, се откриени 37.650 евра, додека во куфер со гардероба била пронајдена уште една торбичка со 97.350 евра. Согласно Законот за девизно работење, на патникот му се вратени 10.000 евра, додека останатите 190.000 евра се привремено задржани со Потврда за задржани средства. Против сторителот е поднесена соодветна прекршочна пријава.

Дневен Хороскоп (23 септември 2026)