Градоначалникот на Општина Штип, Иван Јорданов, најави значително збогатување на животинскиот свет во ЗОО паркот „Бриони“. Во пресрет на велигденските празници, семејството на паркот се проширува со нови жители, меѓу кои се бодликави и виетнамски прасиња, волк, коати, како и егзотичните ему, лемури и лебеди.
За потребите на новите животни веќе се подготвуваат нови и современи живеалишта. Со овој зафат значително се прошируваат капацитетите на паркот и се подобруваат условите за престој, што е дел од континуираните напори за модернизација на ова омилено место за рекреација.
Според градоначалникот Јорданов, овие новитети носат нова енергија и дополнителна атрактивност за посетителите. Тој потенцираше дека ЗОО паркот прераснува во вистинско катче за прошетка, дружење и едукација на најмладите, со што Штип се позиционира како центар на Источна Македонија. Со ваквите содржини, градот нуди нови доживувања и незаборавни спомени за сите генерации. Градоначалникот на општина Бутел, Дарко Костовски, денеска го потпиша договорот со економскиот оператор за изградба на нова и модерна поликлиника, со што започнува реализацијата на ветената капитална инвестиција за жителите на оваа општина.
Носител на овој мега проект е самата општина Бутел, додека Министерството за здравство ќе учествува како партнер во неговото спроведување. Градоначалникот упати посебна благодарност до премиерот Христијан Мицкоски за поддршката на овој значаен проект кој се очекува суштински да ја подобри примарната здравствена заштита во регионот.
Новата поликлиника ќе биде лоцирана на местото на старата амбуланта, согласно Деталниот урбанистички план донесен во февруари 2024 година. Со оваа современа здравствена установа, граѓаните на Бутел ќе добијат пристап до широк спектар на услуги на едно место.
Објектот ќе располага со РТГ кабинет опремен со ехо апарат, сопствена лабораторија и аптека, а за потребите на жителите ќе биде достапен и пункт за итна медицинска помош заедно со ноќна служба.
Изградбата на објектот се очекува да започне наскоро, а градоначалникот Костовски истакна дека со нетрпение го очекува денот на поставување на камен-темелникот. Според него, ова е историски момент кој ќе овозможи подобри услови и квалитетна здравствена заштита во модерна средина, исполнувајќи го долгогодишното ветување дадено пред граѓаните на општина Бутел. Дирекцијата за заштита и спасување (ДЗС) го зголеми својот капацитет за справување со пожари на отворено, откако уште двајца пилоти успешно ја завршија специјализираната обука во Шпанија.
Со ова, Дирекцијата сега располага со вкупно пет пилоти оспособени за управување со противпожарните авиони од типот „ер трактор“.
На предлог на директорот Стојанче Ангелов, на тринеделна преобука во престижниот европски тренинг центар „Титан“ во Шпанија беа испратени искусните воздухопловци Роберт Малезански и Горан Блажески. Двајцата пилоти, кои зад себе имаат богати летачки биографии, веќе се стекнаа со светски признати сертификати за летање во сите услови за гаснење пожари.
Со нивното синоќешно враќање во земјава, Дирекцијата сега располага со вкупно пет пилоти оспособени да управуваат со противпожарните авиони „ер трактор“. Станува збор за специфични летала од типот амфибија, кои имаат можност да полнат вода директно од езерата, што е од клучно значење за брза реакција при гаснење на големи шумски пожари.
Овие двајца вработени во ДЗС со богати летачки биографии сега се оспособени за летање во сите услови за гаснење пожари на отворено. Со овој чекор, Дирекцијата навремено ги исполни неопходните услови за ефикасно дејствување и ја зголеми подготвеноста на државата пред претстојната летна сезона, кога опасноста од пожари е најизразена. Државниот завод за статистика ги објави најновите податоци за јануари 2026 година, според кои просечната месечна исплатена нето-плата по вработен изнесува 46.617 денари.
Во споредба со истиот месец минатата година, забележан е пораст на платите од 8,3%. Истовремено, просечната бруто-плата во државата се искачи на ниво од 70.066 денари.
Овој значителен годишен раст во голема мера е резултат на зголемувањето на платите во неколку клучни сектори. Најголем скок кај нето-примањата е забележан кај административните и помошните услужни дејности со пораст од 12,9%. По нив следуваат секторот трговија на големо и мало и поправка на моторни возила со зголемување од 11,1%, како и преработувачката индустрија каде платите пораснале за 10,5%. Слична тенденција на раст е евидентирана и кај бруто-исплатите во истите дејности.
Сепак, статистиката бележи и одредено намалување на платите на месечно ниво, односно во однос на декември 2025 година. Најизразен пад на нето-платата има во секторот транспорт и складирање, каде примањата се намалени за 7,4%. Пад е забележан и кај градежништвото со 5,3%, како и во финансиските дејности и дејностите на осигурување, каде платите во јануари биле пониски за 3,8% во споредба со претходниот месец. Фармацевтската компанија „Алкалоид“ АД Скопје ја заокружи 2025 година со одлични деловни резултати, остварувајќи рекордни консолидирани продажби во износ од 339,3 милиони евра. Ова претставува зголемување од 10 % во споредба со претходната година, додека кај единечните продажби растот изнесува 3%. Компанијата продолжува цврсто да се позиционира на меѓународните пазари, каде што се остварени дури 65% од вкупните продажби, додека преостанатите 35% се реализирани на домашниот пазар. Извозот на компанијата достигна вредност од 221,6 милиони евра, при што продажбите во Шведска и Австрија се зголемени за четири пати, додека во Холандија бележат трикратен раст. Значаен напредок од два пати е остварен и во Јужна Африка и Казахстан. Високи стапки на раст се забележани и во Финска (53%), Ирска (35%), Португалија (32%), Грција (23%), Ерменија (22%), Полска (18%) и Германија (14%). На домашниот пазар, компанијата оствари раст од 20%, потврдувајќи ја својата улога како клучен партнер на јавното здравство. Во однос на производното портфолио, доминантен сегмент останува фармацијата со учество од 91%, каде предничат антибиотиците и ОТЦ-препаратите. Успешното работење се рефлектира и преку финансиските показатели, па така консолидираната нето-добивка бележи раст од 7% и надмина 29 милиони евра, додека оперативната добивка пред камати, даноци и амортизација (EBITDA) порасна за 20% и надмина 32 милиони евра. Годината ја обележаа и интензивни инвестициски активности во износ од 18 милиони евра. Покрај проширувањето на производствените погони, во 2025 година беше пуштена во употреба и нова микробиолошка лабораторија за контрола на квалитет, опремена по највисоки стандарди. Се со цел да се спречи индустриско нелегално производство на медицински канабис и пласман кон нелегалниот домашен и меѓународен пазар, Владата на денешната 149 седница ја разгледа информацијата во врска со лиценци за производство на канабис за медицински цели, ги донесе следните заклучоци: - Владата ги задолжи институциите во рамките на своите надлежности да ги преземат сите законски утврдените мерки и активности и да извршат вонредни контроли на сите правни лица, кои имаат одобрение за одгледување и производство на канабис за медицински цели на цела територија на Македонија и во рок од 45 дена да достават извештај до Владата. - Исто така, Владата ќе ги именува членовите на меѓуресорската државна комисија за борба против недозволено производство, трговија и злоупотреба на дроги и дека од 2017-тата година откако е формирана комисијата, истата воопшто не била активна и нема резултат. За таа цел, Владата во иднина ќе бара редовни извештаи. Владата исто така донесе одлука за конечно решавање на паркирањето во Клиничкиот кампус „Мајка Тереза" со која се затвораат административните прашања што со децении го попречуваа уредувањето на паркирањето во Клиничкиот кампус Мајка Тереза. Со оваа одлука се создава правна основа за потпишување договор меѓу Министерството за здравство и Градот Скопје. Министерството за здравство, во рок од три месеци, го заврши процесот на регистрација на парцелите во Катастар и изработка на соодветните елаборати, со што се отвора патот за изградба на модерен и функционален паркинг, вклучително и катни гаражи, како и воведување софтверско решение за ефикасно управување. Проектот ќе обезбеди подобри услови за пациентите, здравствените работници и граѓаните кои ги користат услугите на кампусот. На владината седница се усвои предлог законот за Советот на Јавни Обвинители, кој заедно со предлог законот на Јавно обвинителство доби позитивно мислење од Венецијалната комисија. Усвојувањето на овие два закони од страна на Собрание значи исполнување на чекорот од Реформската агенда. Државниот завод за статистика објави дека во декември 2025 година се регистрирани над 59 илјади туристи кои реализирале 112 илјади ноќевања. Бројот на ноќевањата го сочинуваат странските туристи со 57,6%, а 42,4% се домашни туристи. Во периодот јануари-декември 2025 година, во однос на истиот период од претходната година, вкупниот број на туристи е зголемен за 6,0%, односно кај домашните туристи има намалување за 2,2%, а кај странските има зголемување за 10,3%. Во периодот јануари-декември 2025 година, во однос на истиот период од претходната година, вкупниот број на ноќевања е зголемен за 0,8% така што кај домашните туристи има намалување за 4,1%, а кај странските има зголемување за 6,4%. Листата на земји од каде доаѓаат најбројните гости во декември ја предводи Турција со 7.303 туристи, по што следуваат соседните земји Бугарија со 5.214, Србија со 4.736 и Грција со 3.438 посетители. Министерот за внатрешни работи Панче Тошковски и претседателот на Владата Христијан Мицкоски денеска присуствуваа на промоцијата на 120 нови службени возила од брендот „Peugeot 408“ наменети за потребите на македонската полиција. Оваа набавка, која доаѓа по пауза од една и пол деценија е чекор во напорите за модернизација и унапредување на материјално-техничките капацитети на Министерството за внатрешни работи. Новите возила ќе бидат распределени во полициските единици низ целата држава, со што се очекува значително да се зголеми ефикасноста на терен и присуството на полицијата таму каде што граѓаните имаат најголема потреба. Министерот Тошковски истакна дека станува збор за модерни и моќни возила опремени со најсовремена технологија, вклучувајќи ги „Тетра“ системите. Овие системи ќе им овозможат на полициските службеници на лице место да вршат проверки на евиденции и анализи на податоци, со што македонската полиција се изедначува со европските стандарди во поглед на опременоста и пристапот до информации. Вкупната вредност на набавката изнесува 202 милиони денари, при што се остварени заштеди од над 30 милиони денари кои ќе бидат пренасочени за набавка на дополнителна опрема. Дополнителна предност е обезбедената петгодишна гаранција за редовен сервис, што значително ќе ги намали трошоците за одржување во иднина. Премиерот Христијан Мицкоски го поздрави успехот на проектот, истакнувајќи дека Владата останува фокусирана на борбата против криминалот и корупцијата како врвен приоритет. Според него, подобрата мобилност на припадниците на МВР директно води кон намалување на стапката на криминал и поголема сигурност за сите граѓани. Од МВР посочуваат дека оваа набавка е само дел од поширок процес за професионализација на службата. Покрај возилата, планот за модернизација вклучува и дигитализација на процесите, набавка на нова лична опрема за службениците и системски реформи кои треба да создадат современа и ефикасна полиција која ќе одговори на сите безбедносни предизвици. Компанијата „Интекар Глобал“, која е веќе етаблиран производител во индустриската зона Дуброво во Неготино, разгледува можности за нов инвестициски циклус вреден најмалку 20 милиони евра. Ова беше потврдено на денешната средба меѓу директорот на Дирекцијата за ТИРЗ, Гоце Димовски, и генералниот менаџер на компанијата, Махмутхан Келеш. Денешните разговори се надоврзуваат на дијалогот започнат во ноември годинава, со фокус на конкретни можности за проширување на производните капацитети. Директорот Димовски ги претстави владините приоритети и ја истакна целосната подготвеност за поддршка на компании кои реализираат проекти со висока додадена вредност. Тој потенцираше дека државата останува посветена на создавање предвидлив деловен амбиент за сите инвеститори кои придонесуваат кон економскиот раст. Генералниот менаџер Махмутхан Келеш ги презентираше досегашните резултати на „Интекар Глобал“ и ја образложи визијата за иден развој. Тој нагласи дека интересот за дополнително инвестирање се должи на потребата од продлабочување на соработката, но и на важноста од стабилна деловна средина и институционална поддршка за реализација на долгорочните планови. Компанијата „Интекар Глобал“ е еден од водечките производители во индустријата за кабли, со широк спектар на производи кои вклучуваат нисконапонски, среднонапонски, соларни и специјални кабли. Нивното работење е препознатливо по високите стандарди за квалитет, енергетската ефикасност и силниот акцент на технолошкиот развој. Оваа средба е дел од новиот концепт за активна комуникација со инвеститорите, со кој Дирекцијата за технолошки индустриски развојни зони преку партнерски однос цели кон отворање нови работни места и одржлив економски напредок на земјата. 
