Најнови

Дневен Хороскоп (6 септември 2026)

Македонската економија со раст од 4,3% во вториот квартал, инвестициите скокнаа за 16,5%

Македонската економија во вториот квартал од 2026 година забележа реален раст од 4,3%, покажуваат податоците на Државниот завод за статистика. Растот е еден од најдобрите квартални резултати во изминатите две и пол години, а според Министерството за финансии, позитивниот тренд е поддржан од повеќе сегменти на економијата. Министерката за финансии Гордана Димитриеска-Кочоска оцени дека континуитетот на растот покажува оти економските политики даваат резултати, при што најави продолжување на инвестициите, капиталните проекти и поддршката за приватниот сектор. Бруто-инвестициите во вториот квартал се зголемиле за 16,5%, додека извозот на стоки и услуги е повисок за 10,4%. Најизразен раст е регистриран во градежништвото, кое во вториот квартал пораснало за 21,9%. Позитивни движења има и во преработувачката индустрија, трговијата, транспортот и угостителството. Растот од 4,3% е остварен во услови на умерена економска активност во Европа, глобални неизвесности и геополитички ризици. Според податоците наведени од Министерството за финансии, македонскиот економски раст во вториот квартал е значително над просекот на Европската Унија од 1,2% и еврозоната од 1%. Димитриеска-Кочоска посочи дека економијата постепено ја зголемува динамиката на раст, но оцени дека постигнатото не е доволно и дека фокусот треба да остане на инвестициите, капиталните проекти и создавањето услови за домашни и странски инвестиции. „Од раст од 1,6% во првиот квартал од 2024 година, денес сме на 4,3%. Тоа значи дека не зборуваме за еден добар квартал, туку за континуитет, за економија која расте и постепено добива сила“, истакна министерката за финансии.

Штипската болница ќе добие медицинска опрема во вредност од 500.000 долари од Обединетата македонска дијаспора

Министерот за здравство Сашо Клековски оствари средба со Арџи Белио, претседавач на Бордот на Обединетата македонска дијаспора (UMD). На средбата е разговарано за можностите за продлабочување на соработката меѓу институциите во Македонија и македонската дијаспора, со фокус на конкретни проекти и иницијативи од заеднички интерес. На средбата се разговараше за административната и логистичката поддршка потребна за реализација на донацијата на медицинска опрема од ОМД за Клиничката болница во Штип. Вредноста на донацијата е 500.000 американски долари, а беа разгледани и чекорите за нејзина реализација. ОМД ја најави и M-Link, глобална професионална платформа чија цел е да ги поврзе Македонците ширум светот и да создаде нови можности за професионална и деловна соработка меѓу дијаспората и Македонија. Платформата треба да овозможи подобро поврзување на професионалци и бизнис-заедницата од дијаспората со луѓе и организации во земјата.

Македонија официјално се приклучи кон Вертикалниот гасен коридор

Македонија го официјализираше своето приклучување кон Вертикалниот гасен коридор, со што направи значаен исчекор кон обезбедување посигурна енергетска иднина и диверзификација на изворите за снабдување со природен гас. Според министерката за енергетика, рударство и минерални суровини Сања Божиновска, ова поврзување со нови извори и снабдувачки правци овозможува географската положба на земјата да се претвори во стратешка предност за целиот регион. Клачниот фокус на овој проект е ставен врз изградбата на гасните интерконектори со Грција и Србија. Овие нови инфраструктурни врски треба да овозможат поголема стабилност во снабдувањето и конкурентни цени за домаќинствата и за домашната индустрија. Со реализацијата на овие проекти, Македонија ја менува својата позиција од крајна корисничка точка на гасниот систем и прераснува во активен транзитен коридор и енергетска врска меѓу регионот на југ и земјите од Централна Европа. Оваа модерна инфраструктура овозможува привлекување нови инвестиции и ја зацврстува улогата на државата како сигурен и стабилен партнер на регионалниот енергетски пазар.

Дневен Хороскоп (5 септември 2026)

Димитриеска-Кочоска: Со новата еврообврзница ќе враќаме 1,5 милијарди евра стари долгови

Новата еврообврзница планирана за 2027 година е дел од навремените подготовки за обезбедување средства за враќање на старите долгови кои достасуваат следната година, изјави министерката за финансии Гордана Димитриеска-Кочоска. Одговарајќи на обвинувањата од опозицијата за ново задолжување од 1,3 милијарди евра, министерката појасни дека информацијата сè уште не е разгледана на владина седница, но дека Министерството мора однапред да ги планира обврските. Според неа, задолжувањето коешто се користи за рефинансирање на постојни обврски не значи автоматско зголемување на јавниот долг за целиот позајмен износ. Во текот на 2027 година достасуваат неколку значајни финансиски обврски што државата мора редовно да ги сервисира. Пред сè, тоа се околу 1,5 милијарди евра за стари долгови преземени од претходната Влада, како и доспевање на 12-месечни државни записи во износ од околу 1,1 милијарда евра. Истовремено, согласно Фискалната стратегија, за 2027 година е проектиран и буџетски дефицит од 3,5 проценти од БДП кој исто така бара финансирање. Димитриеска-Кочоска нагласи дека Министерството за финансии ги објавува сите податоци транспарентно. Таа оцени дека критиките се неосновани кога намерно се занемарува фактот дека новите средства се користат за отплата и рефинансирање на веќе создадени долгови.

Божиновска: Македонија станува енергетски коридор меѓу југот и Централна Европа

Министерката за енергетика, рударство и минерални суровини Сања Божиновска беше главен говорник на Шестиот самит во Солун во организација на „The Economist“. На самитот посетен од високи претставници од бизнисот и политиката во регионот, таа порача дека Македонија од пасивна крајна точка се трансформира во активен транзитен коридор на енергетската карта на Југоисточна Европа. На панелот посетен од меѓународни претставници, меѓу кои и специјалниот пратеник за енергетика на САД Џошуа Волц и министрите за енергетика на Грција и Бугарија, Ставрос Папаставру и Ива Петрова, Божиновска ја истакна важноста на приклучувањето кон Вертикалниот гасен коридор, оценувајќи го како историски чекор кон прекин на 30-годишната целосна зависност од само една гасна рута. Во однос на конкретните инфраструктурни проекти, министерката информираше за динамиката на клучните енергетски врски: Интерконектор со Грција: Проектот со вкупна должина од 123 километри (68 километри на македонска територија) напредува според планот, а неговото пуштање во функција се очекува во 2027 година. Со ова се овозможува пристап до ЛНГ терминалите во Ревитуса и Александруполис. Врска со Србија: Со паралелниот развој на гасоводната линија кон Србија се креира западнобалкански крак кој го поврзува југот со Централна и Источна Европа. Електроенергетско поврзување: Во тек се активности за комплетирање на Коридорот 8 преку интерконекцијата Битола-Елбасан, како и развој на новата интерконекција со Бугарија и надградба на постојната со Грција. Новата гасна инфраструктура се дизајнира со можност за иден транспорт на водород, што е во согласност со европските цели за декарбонизација и поддршка на инвестициите во обновливи извори на енергија.

Нов спортски објект во Општина Карпош: Започна изградбата на спортската сала во ООУ „Братство“ во Тафталиџе 2

Со поставување на камен-темелник, во Општина Карпош официјално започна изградбата на нова, современа повеќенаменска спортска сала во рамките на основното училиште „Братство“ во населбата Тафталиџе 2. На официјалниот почеток на градежните работи и увидот на терен присуствуваа премиерот Христијан Мицкоски, градоначалникот на Општина Карпош, Сотир Лукровски, како и претставници од Министерството за образование и наука. Новата сала ќе биде изградена на местото на стариот објект и ќе се протега на површина од 1.427 квадратни метри. Објектот е проектиран за разни спортски активности, меѓу кои кошарка, ракомет, мал фудбал, одбојка, тенис, гимнастика и боречки спортови, а ќе располага и со трибински простор со капацитет од 400 седишта. Вкупната вредност на оваа инвестиција изнесува 63,4 милиони денари (со вклучен ДДВ). Средствата за реализација на проектот се целосно обезбедени со финансиска поддршка од Владата преку Министерството за образование и наука. Со оваа инвестиција се очекува значително подобрување на условите за одржување на часовите по физичко образование, но и обезбедување простор за спортски школи, тренинзи и манифестации од локален карактер.

Македонија оствари извоз од над 5,1 милијарди евра во првите седум месеци од годината, Европската Унија останува најголем трговски партнер

Вкупната вредност на извозот на стоки од Македонија во периодот јануари-јули оваа година достигна над 5,1 милијарда евра, што претставува пораст од 8,4 проценти во однос на истиот период од претходната година. Според претходните податоци на Државниот завод за статистика, во истиот седуммесечен период вредноста на увезената стока изнесува над 7,1 милијарда евра, бележејќи зголемување од 7,9 проценти во споредба со периодот јануари-јули минатата година. Во структурата на извозот според Стандардната меѓународна трговска класификација, најголемо учество имаат катализаторите на носачи со благородни метали или нивни соединенија, сетовите на проводници за палење за возила, авиони или бродови, како и деловите на седишта. На страната на увозот, најзастапени се платината и легурите на платина (необработени или во прав), останатите метали од платинската група, нафтените масла и маслата добиени од битуменозни минерали, како и моторните возила за превоз на лица. Земјите членки на Европската Унија учествуваат со 58,7 проценти во вкупната надворешнотрговска размена. Според обемот на трговија, најзначајни партнери на земјава се Германија, Велика Британија, Кина, Грција и Србија, кои заедно покриваат 49,4 проценти од вкупната размена.

Приведен скопјанец за кражба на пригушници од железничката пруга

Полициски службеници од СВР Скопје го лишија од слобода 45-годишниот З.С. од Скопје, под сомнение за извршување на две тешки кражби на пригушници од железничката пруга на подрачјето на главниот град. Според информациите од Министерството за внатрешни работи, кражбите биле извршени на две различни локации, односно на подрачјата кои ги покриваат полициските станици Аеродром и Драчево. При претресот и лишувањето од слобода, украдените железнички пригушници се пронајдени и соодветно вратени на сопственикот, Јавното претпријатие „Железници на РСМ“. По целосно документирање и расчистување на сите детали од случајот, против приведеното лице ќе биде поднесена соодветна кривична пријава до надлежното обвинителство.