Во месноста Терзели, во валандовскиот регион, официјално започна овогодишната берба на маслинки. На почетокот на бербата присуствуваше Министерот за земјоделство, шумарство и водостопанство, Борче Серафимовски, кој истакна дека оваа сѐ уште недоволно застапена земјоделска култура постепено го зазема своето заслужено место во домашното аграрно производство.
Министерот Серафимовски посочи дека климатските промени и порастот на просечните температури отвораат можности за проширување на границите на традиционалното одгледување култури во Македонија. Со соодветна анализа на почвата, пристап до вода и примена на научни сознанија, постои реален простор за тестирање и садење маслинки и на нови локации низ државата.
Воведувањето и ширењето на маслиновите насади носи значаен потенцијал за развој на преработувачката индустрија, пред сѐ преку производство на македонско маслиново масло и производи со јасно дефинирано географско потекло. Според министерот Серафимовски, овој сектор нуди одлична можност за приватни претприемачки иницијативи и дополнителна заработка, со што поголем дел од додадената вредност ќе остане во рамките на домашната економија.
Идниот одржлив развој на македонското земјоделство во услови на глобални климатски промени директно ќе зависи од подготвеноста на земјоделците и институциите да се прилагодуваат и навремено да воведуваат алтернативни култури кои успешно ги поднесуваат новите временски прилики. Министерството за земјоделство, шумарство и водостопанство (МЗШВ) објави јавен повик за изразување интерес за организирање на саемот „Вкуси ја традицијата преку домашна здрава храна - Скопје“. За оваа намена, преку Програмата за финансиска поддршка на руралниот развој за 2026 година, се обезбедени 1.000.000 денари кои покриваат 100 проценти од прифатливите трошоци за организација.
Право на учество на повикот имаат регистрирани здруженија од областа на земјоделството, јавни научни и образовни установи, единици на локалната самоуправа, стопански комори и земјоделски задруги. Заинтересираните субјекти треба да достават свои предлог-проекти во затворен плик до архивата на МЗШВ во рок од 15 дена од денот на објавувањето.
Клучниот услов што организаторот мора да го исполни е обезбедување на најмалку 50 изложувачи на традиционални и домашни земјоделски производи. Дополнително, предлогот треба да содржи концепт за изложбен, едукативен и културно-промотивен дел, детален финансиски план и нотарски заверени изјави дека проектот не се финансира од други извори.
Финансиската поддршка ги покрива трошоците за закуп на простор, штандови, бина и опрема, огласување во медиумите и изработка на промотивни материјали. Во случај на повеќе пријавени кандидати кои ги исполнуваат сите критериуми, предност ќе има субјектот кој прв ја поднел документацијата во архивата на министерството. Градоначалникот на Општина Карпош, Сотир Лукровски, оствари работна средба со Министерот за транспорт, Александар Николоски, на која детално се разгледани тековните инфраструктурни проекти и можностите за нови инвестиции во општината.
Вкупната владина поддршка за Општина Карпош изнесува околу 11 милиони евра обезбедени преку двата активни повици за капитални проекти, од кои околу 5,5 милиони евра се реализираат директно преку Министерството за транспорт.
Во рамките на новиот инвестициски циклус предвидено е уредување на плоштади, изградба и реконструкција на улична мрежа, атмосферска и фекална канализација, како и унапредување на јавниот простор согласно потребите на граѓаните.
За време на средбата се дефинирани неколку конкретни приоритети за општината. Посебно внимание е посветено на плочникот на плоштадот Порта Влае, за кој е предвидена изработка на проект, по што ќе следува целосно уредување и ревитализација на просторот.
Исто така, разговарано е за санација на свлечиштата во деловите околу Козле, Трнодол и Жданец, каде што во тек е изработка на стручни проекти од страна на Градежниот факултет, по што Општината и Министерството за транспорт заеднички ќе пристапат кон нивна реализација.
Како едно од клучните прашања е истакнато и решавањето на проблемот со паркирањето во Карпош, па во соработка со Општината и Јавното претпријатие за стопанисување со станбен и деловен простор се подготвуваат решенија за изградба на катни гаражи и подземни паркиралишта со цел да се обезбедат повеќе паркинг-места и истовремено да се зачуваат зеленилото и парковите, со крајна цел во следните две до три години да се создаде сеопфатно и одржливо решение за паркирањето во општината. Претставници на Министерството за енергетика, рударство и минерални суровини учествуваа во регионална студиска посета на Република Србија, организирана со поддршка на Светската банка во рамките на иницијативата за енергетска ефикасност во зградите (ECA Energy Efficiency in Buildings Community of Practice).
Главниот фокус на оваа регионална иницијатива е размена на искуства и најдобри практики меѓу институциите од регионот, со посебен акцент на подготовката и имплементацијата на програми за енергетска ефикасност, иновативни модели за финансиска поддршка на домаќинствата, како и механизми за прецизно следење на остварените заштеди на енергија.
За време на посетата, претставниците од српското Министерство за рударство и енергетика и тимот задолжен за проектот SURCE ги презентираа своите практични искуства од спроведувањето на мерките за енергетска ефикасност. Во рамките на презентациите се анализирани моделите за поддршка на енергетски ранливите домаќинства, методологијата за спроведување на јавните повици, како и координацијата меѓу централното и локалното ниво на власт.
Од Министерството за енергетика, рударство и минерални суровини истакнуваат дека преку учеството во вакви регионални платформи се унапредува стручната соработка со меѓународните партнери, што овозможува побрзо пренесување на позитивните практики за намалување на потрошувачката на енергија и подобрување на животниот стандард на граѓаните. Министерството за земјоделство, шумарство и водостопанство (МЗШВ) распиша јавен оглас број 1/2026 за вработување на 43 овластени службени лица на неопределено време во Секторот за шумска полиција, на позицијата патролен шумски полицаец. Вработувањата се реализираат согласно Годишниот план на институцијата за 2026 година.
Заинтересираните кандидати треба да имаат завршено најмалку средно образование (IV или V А ниво на квалификации), да бидат психофизички способни и соодветни за носење оружје, како и да поседуваат потврди за положен психолошки тест и тест за интегритет. Огласот е отворен за кандидати со или без работно искуство, а избраните лица ќе имаат обврска во рок од една година од вработувањето да положат испит за шумски полицаец.
Работното место опфаќа 40-часовна работна недела организирана во три смени, вклучувајќи и денови од викендот. Месечната нето-плата за оваа позиција изнесува 36.246 денари.
Клучните обврски на патролните шумски полицајци ги опфаќаат следните активности: Заштита и чување на шумскиот фонд од бесправна сеча и кражби, спречување, легитимирање и приведување лица затечени во вршење кривични дела и штети врз шумите, контрола на сите транспортни средства што превезуваат дрво и други шумски производи, привремено одземање предмети и средства искористени за извршување прекршоци или кривични дела и спречување и навремено известување за шумски пожари, растителни болести и штетници.
Пријавите со комплетната документација се доставуваат во рок од 20 дена од објавувањето на огласот до Секторот за човечки ресурси при МЗШВ, на адреса ул. „Ленинова“ бр. 2, Скопје. Повеќе информации можете да најдете на сајтот на Министерството за земјоделство шумарство и водостопанство. Министерката за енергетика, рударство и минерални суровини, Сања Божиновска, оствари работна средба со висока делегација од Бордот на директори на Европската банка за обнова и развој (ЕБОР), предводена од директорот за Холандија, Кина, Македонија, Ерменија и Монголија, Рене ван Хел, како и претставникот на ЕБОР во земјава, Фатих Туркменоглу.
На средбата се презентирани клучните реформски чекори на Министерството насочени кон зајакнување на домашната енергетска инфраструктура и стабилизирање на сигурноста во снабдувањето. Претставниците на ЕБОР ја поздравија посветеноста на институциите, оценувајќи дека македонските реформи во енергетскиот сектор бележат напредок и се во понапредна фаза во споредба со одредени земји од поширокиот регион.
Во рамките на разговорите посебно внимание беше посветено на интеграцијата на капацитетите од обновливи извори на енергија (ОИЕ), можностите за складирање на електрична енергија, како и на неопходното зајакнување на мрежната инфраструктура во координација со МЕПСО. Исто така, истакната е важноста од диверзификацијата на производствените капацитети и практичната примена на законските решенија и подзаконските акти.
Министерката Божиновска нагласи дека постои висок интерес од страна на граѓаните и компаниите за инвестиции во зелена енергија, при што се работи и на носење на нови законски решенија, меѓу кои и Законот за јавно-приватно партнерство. На состанокот се разговараше и за проектите за регионално енергетско поврзување со соседна Грција и Србија, имплементацијата на нови паметни мерни системи (smart метри) во наредниот период, како и за значењето на сајбер-безбедноста во заштитата на енергетските мрежи. Цените во земјоделството во септември бележат зголемување и во делот на влезните трошоци (инпут) и кај финалните производи (аутпут) во споредба со истиот месец од претходната година, соопшти Државниот завод за статистика (ДЗС).
Според објавените податоци, најизразито зголемување од 8,8 проценти е регистрирано кај цените на инпут 1, односно кај тековно потрошените средства во земјоделското производство. Во исто време, цените на средствата наменети за инвестиции во земјоделството (инпут 2) бележат пораст од 8,6 проценти.
Во делот на аутпутот, односно кај финалните земјоделски производи, забележани се спротивни движења во зависност од секторот.
Цените во растителното производство во септември се зголемени за 3,9 проценти во однос на истиот месец лани. За разлика од нив, цените во добиточното производство бележат пад од 2,1 процент во истиот споредбен период. Со свечена церемонија вечерва во 18:00 часот официјално се отвора новиот современ трговски и деловен комплекс „Triangla Fashion Park“ во Општина Гази Баба. Станува збор за значајна локална инвестиција вредна 10 милиони евра, која носи нова економска енергија и современ урбан изглед во оваа скопска општина.
Комплексот се протега на вкупна површина од 15.000 квадратни метри, од кои 6.500 квадратни метри се наменети за трговски содржини и изнајмување. Во рамките на современо уредениот простор се интегрирани и деловен центар и хотел на површина од 5.000 квадратни метри, како и простран подземен паркинг со капацитет од над 200 паркинг-места, што целосно ги задоволува потребите на идните посетители и бизнис-партнери.
Градоначалникот на Општина Гази Баба, Бобан Стефковски, ја истакна важноста на овој проект, нагласувајќи дека новата инвестиција претставува капитален чекор во унапредувањето на локалната економија.
„Овој комплекс создава услови за отворање нови работни места, привлекува нови бизниси, го проширува спектарот на трговски и услужни дејности и значајно ја зголемува економската активност во општината“, истакна Стефковски, додавајќи дека ваквите проекти ја зголемуваат атрактивноста на Гази Баба за идни домашни и странски инвеститори.
„Triangla Fashion Park“ е замислен како мултифункционален центар кој на граѓаните им нуди нови содржини, а на локалната економија ѝ обезбедува дополнителен потенцијал за одржлив раст и развој. Германската компанија „Кромберг и Шуберт“ започнува нов инвестициски циклус во својот капацитет во индустриската зона Жабени во Битола. Проектот предвидува отворање на нови 2.000 работни места во следните четири години, каде што ќе се произведуваат електрични инсталации и кабли за најновите модели на автомобилскиот бренд „Ауди“.
Оваа вест денеска на прес-конференција ја соопшти претседателот на Владата, Христијан Мицкоски, кој истакна дека новата инвестиција претставува силен развоен импулс за Битола, Пелагонискиот Регион и целата домашна економија. Со реализацијата на овој проект, вкупниот број на вработени во фабриките на „Кромберг и Шуберт“ во Битола и Скопје се очекува да достигне до 10.000 лица.
Во рамките на новиот производствен циклус е предвидено дневно производство на над 3.000 кабелски снопови за новите модели на „Ауди“. Како што најавија од менаџментот, новиот проект ќе донесе и технолошка модернизација на погоните во Жабени, со воведување системи за автоматизација и вештачка интелигенција (ВИ), како што се автоматски камери за контрола на квалитетот и следење на деловите.
Комерцијалниот директор на „Кромберг и Шуберт“, Ѓорѓи Тренковски, потенцираше дека проектниот менаџмент на компанијата целосно се префрла во Битола. Планот на компанијата е сите досегашни странски менаџерски позиции постепено да бидат заменети со домашни стручњаци, при што ќе се оствари и засилена соработка со македонските универзитети за регрутирање на нови инженери и оператори.
Според владините проценки и очекувањата на менаџментот, идната година извозот од сите капацитети на „Кромберг и Шуберт“ во земјава се очекува да го надмине прагот од 400 милиони евра, при што просечните плати за висококвалификуваниот инженерски кадар се за над 80 проценти повисоки од државниот просек. 
