Бројот на работниците во индустријата е намален за 2.6% во август во однос на истиот период лани, спорред податоците објавени од Државниот завод за статистика. Бројот на работниците во август 2025 година, во однос на август 2024 година, во секторот Рударство и вадење на камен се намалил за 1.7%, во секторот Преработувачка индустрија за 2.7%, а во секторот Снабдување со електрична енергија, гас, пареа и климатизација за 0.6%. Според главните индустриски групи, бројот на работниците во индустријата во август 2025 година, во однос на август 2024 година, се намалил во групите Енергија за 1.8%, Капитални производи за 7.1% и Нетрајни производи за широка потрошувачка за 2.2%, а се зголемил во групите Трајни производи за широка потрошувачка за 7.3% и Интермедијарни производи, освен енергија за 1.0%. Бројот на работниците во индустријата во периодот јануари – август 2025 година, во однос на периодот јануари – август 2024 година, се намалил за 3.8%. Во 2024 година, ЕУ го оствари најголемиот годишен извоз на хемиски производи кон земјите надвор од ЕУ во вредност од 560 милијарди евра, што претставува раст од 7% во споредба со 2023 година, објави Евростат. Увозот од земји надвор од ЕУ на овие производи благо опадна за 1%, на 322 милијарди евра од претходните 326 милијарди евра. Петте земји членки на ЕУ со најголем извоз кон надворешни пазари се: Германија (134 милијарди евра), Ирска (82 милијарди), Белгија (62 милијарди), Франција (54 милијарди) и Холандија (50 милијарди) евра. Најголемите дестинации за извоз надвор од ЕУ се: САД (170 милијарди евра), Швајцарија (64 милијарди), Обединетото Кралство (47 милијарди), Кина (36 милијарди) и Јапонија (18 милијарди) евра. Што се однесува до увозот, најголеми увозници на хемиски производи во ЕУ се: Германија (56 милијарди евра), Белгија (45 милијарди), Холандија (43 милијарди), Италија (34 милијарди) и Словенија (29 милијарди) евра. Индустриското производство во Македонија во август бележи намалување од 3.5% во однос на истиот месец во 2024 година, покажува најновиот извештај на Државниот завод за статистика. Сепак, некои индустриски сектори покажуваат позитивни резултати. Секторот Рударство и вадење на камен забележал раст од 7.0%, додека во секторот Преработувачка индустрија има опаѓање од 1.4%. Најголем пад е забележан во секторот Снабдување со електрична енергија, гас, пареа и климатизација, кој е намален за 26.8%. Намалувањето во секторот Преработувачка индустрија е резултат, на намаленото производство во следните оддели: - Производство на прехранбени производи. - Производство на текстил. - Печатење и продукција на снимени медиуми (записи). - Производство на основни фармацевтски производи и фармацевтски препарати. - Производство на метали. - Производство на фабрикувани метални производи, освен машини и опрема. - Производство на машини и уреди, неспоменати на друго место. - Производство на мебел. Според главните индустриски групи, производството во август 2025 година, во однос на август 2024 година, бележи опаѓање кај Енергија за 23.7%, Капитални производи за 12.0%, Трајни производи за широка потрошувачка за 9.1% и Нетрајни производи за широка потрошувачка за 5.7%. Пораст е забележан кај Интермедијарни производи, освен енергија за 14.8%. Индустриското производство во периодот јануари – август 2025 година е зголемено за 2.2 % во однос на периодот јануари – август 2024 година. Lufthansa Group ја претстави својата стратегија за иднината и објави нови среднорочни финансиски цели за периодот 2028-2030 година. Компанијата потврди дека продолжува со својот план за значително зголемување на профитабилноста преку интегрирање на операциите во рамките на групата. Како дел од стратешката реорганизација, Lufthansa Group ќе изврши значителни промени во структурите на групацијата. Со цел да се зголеми ефикасноста, планирано е намалување на околу 4.000 административни работни места до 2030 година, што ќе биде резултат на дигитализацијата, автоматизацијата и интеграцијата на процесите. Ова намалување ќе биде најизразено во Германија и ќе се спроведе во консултација со синдикатите. Еден од главните аспекти на стратегијата е концентрацијата на хаб авиолиниите: Lufthansa, SWISS, Austrian Airlines, Brussels Airlines и ITA Airways. Групацијата планира уште поголема интеграција и прилагодување на организациската структура со цел да се забрзаат процесите на одлучување, да се подобри соработката и да се зголеми продуктивноста. Lufthansa Group планира да вложи значителни средства во модернизација на флотата, со повеќе од 230 нови авиони до 2030 година. Lufthansa Cargo исто така ќе продолжи да ја зголемува својата профитабилност со проширување на капацитетите и инвестирање во автоматизација и дигитализација, со цел да стане еден од трите најголеми играчи на глобалниот пазар на воздухопловен карго транспорт. Групацијата постави амбициозни цели за периодот 2028-2030, со цел зголемување на профитабилноста за 8 до 10 проценти пред оданочување. Регулаторната комисија за енергетика, водни услуги и услуги за управување со комунален отпад донесе Одлука со која се врши зголемување на малопродажните цени на нафтените деривати во просек за 0,49% во однос на одлуката од 22.09.2025 година. Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 0,678% и кај дизелот за 0,070%, додека кај екстра лесното масло има зголемување за 0,278% и кај мазутот зголемувањето е за 1,867%. Курсот на денарот во однос на доларот во изминатиот период по кој беа формирани цените со претходната пресметка е повисок за 0,5170%. Од 30.9.2025 година од 00:01 часот максималните цени на нафтените деривати ќе изнесуваат: - Моторен бензин ЕУРОСУПЕР БС 95 - 75,50 (денари/литар). - Моторен бензин ЕУРОСУПЕР БС 98 - 77,50 (денари/литар). - Дизел гориво ЕУРОДИЗЕЛ БС (Д-Е V) - 69,50 (денари/литар). - Масло за горење Екстра лесно 1 (ЕЛ-1) - 69,50 (денари/литар). - Мазут М-1 НС - 37,591 (денари/килограм). Малопродажните цени на бензините ЕУРОСУПЕР БС-95 и ЕУРОСУПЕР БС-98 како и на ЕУРОДИЗЕЛ (Д-Е V) не се менуваат. Малопродажната цена на Екстра лесното масло за домаќинство (ЕЛ-1) се зголемува за 0,50 ден/лит. Малопродажната цена на Мазутот М-1 НС се зголемува за 0,644 ден/кг и сега ќе изнесува 37,591 ден/кг. Од РКЕ напоменуваат дека ова се максималните цени на нафтените деривати од 00:01 часот на 30.9.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени. Bosch објави нови намалувања на работните места, како дел од напорите да се затвори големиот финансиски јаз. Одлуката доаѓа во време кога глобалниот автомобилски пазар продолжува да покажува забавен развој, дополнет со одложувања во прифаќањето на нови технологии, како што се електричната мобилност, автоматизираното возење и водородните решенија. Bosch веќе долго време се соочува со глобален финансиски јаз од околу 2,5 милијарди евра на годишно ниво во својот автомобилски сектор, што е резултат на големите ценовни притисоци, конкуренцијата и значителните инвестиции потребни за идни технологии. И покрај овие предизвици, компанијата е посветена на намалување на трошоците низ сите свои операции, со акцент на подобрување на продуктивноста преку користење на вештачка интелигенција, оптимизација на снабдувачките синџири и намалување на материјалните и капиталните трошоци. Меѓутоа, овие напори подразбираат неизбежни структурни и персонални прилагодувања. Bosch потврди дека околу 13.000 работни места ќе бидат укинати глобално, со посебен фокус на локациите во Германија. Локацијата во Фојербах ќе биде најтешко погодена, со предвидени намалувања на работни места од околу 3.500 до 2030 година. Ова вклучува затворање на фабриката за Power Solutions, која се соочува со проблеми поради глобалниот пад на побарувачката за дизел мотори и спорото воведување на водородни технологии. Друга погодена локација се Швибердинген, каде ќе бидат укинати околу 1.750 работни места во различни оддели како што се Power Solutions, Electrified Motion и Mobility Electronics. Дополнително, Bosch планира да го укине производството на технологија за конектори во фабриката во Вајблинген до крајот на 2028 година, што ќе влијае на околу 560 работни места. Во Билх, Bosch очекува да ги намали работните места за околу 1.550 до 2030 година, со што ќе бидат погодени одделите за продажба, набавка, администрација, како и развој и производство на електрични погонски системи. Слично на тоа, локацијата Хомбург ќе има намалување на работните места за околу 1.250 до 2030 година, при што ќе се консолидираат оперативните активности на Power Solutions одделот во источниот дел на фабриката. Турскиот национален авиопревозник, Turkish Airlines, потпиша договор со Boeing за набавка на вкупно 75 нови авиони од моделите Boeing 787-9 и 787-10, кои ќе бидат доставени помеѓу 2029 и 2034 година. Компанијата продолжува со преговори за набавка на мотори од Rolls-Royce и GE Aerospace, а по успешните преговори со CFM International, се очекува да бидат потпишани и договори за 737-8/10 MAX авионите. Како дел од својата „Vision 2033“, која ја нагласува 100-годишнината на авиокомпанијата, Turkish Airlines има за цел да ја прошири својата флота на над 800 авиони, при што ќе го зголеми уделот на авиони од следната генерација на 90% до 2033 година и на 100% до 2035 година. Ова дополнително ќе ја зајакне оперативната ефикасност, додека ќе се одржи просечен годишен раст од 6%. Новиот договор ќе помогне во понатамошното зајакнување на Истанбул како стратешки хаб за патнички и товарни летови, а истовремено ќе ги прошири можностите на Turkish Airlines за понуда на повеќе дестинации и за привлекување на туристи. Директорот на ТИРЗ, Гоце Димовски, денеска оствари работна средба со менаџментот на фабриката Баумер која работи во рамките на ТИРЗ Скопје 1. На средбата се разговараше за досегашните активности на фабриката, како и плановите за во иднина и потенцијалната нова инвестиција, по што беше реализирана и обиколка низ производствениот погон. Димовски нагласи дека дирекцијата за ТИРЗ ја поддржува секоја нова инвестиција која ќе донесе поголем економски раст за државата и ќе отвори нови работни места. „Како институција активно работиме за уште поголем развој на постоечките компании во рамки на зоните, но и за нови потенцијални инвестиции кои дополнително ќе влијаат позитивно на националната економија. Оваа Влада, уште од самиот почеток како главни цели ги постави економскиот раст, новите инвестиции и новите работни места, а со досегашните резултати по повеќе од една година, верувам дека можеме уште повеќе.“ - изјави Димовски. Директорот на фабриката, Соња Стефановска, посочи дека според резултатите кои се постигнати од страна на компанијата во изминатиот период, постојат можности за потенцијално зголемување на производните капацитети и воведување на нови технологии со што ќе се отворат и нови работни места. Швајцарската компанија Баумер произведува напредна сензорска технологија, енкодери, мерни инструменти од областа на електрониката. Компанијата е присутна со 39 подружници низ 19 земји од светот, а во Македонија е присутна од 2019 година, кога официјално го отвори производствениот капацитет во ТИРЗ Скопје 1, каде се наоѓа и истражувачкиот центар во кој работат инженери од областа на електрониката, информатиката и машинската технологија. 
