Регулаторната комисија за енергетика, водни услуги и услуги за управување со комунален отпад (РКЕ) донесе Одлука со која се врши намалување на малопродажните цени на нафтените деривати во просек за 1,1% во однос на одлуката од 27.11.2025 година. Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 1,2%, кај дизелот за 3,3%, кај екстра лесното масло за 2,3% и кај мазутот за 4,4%. Курсот на денарот во однос на доларот во изминатиот период по кој беа формирани цените со претходната пресметка е понизок за 0,0096%. Од 2.12.2025 година од 00:01 часот максималните цени на нафтените деривати ќе изнесуваат: - Моторен бензин (ЕУРОСУПЕР БС-95) - 75,00 (денари/литар). - Моторен бензин (ЕУРОСУПЕР БС-98) - 77,00 (денари/литар). - Дизел гориво (ЕУРОДИЗЕЛ БС Д-Е V) - 69,50 (денари/литар). - Масло за горење (Екстра лесно 1) - 66,50 (денари/литар). - Мазут (М-1 НС) - 33,963 (денари/килограм). Малопродажните цени на бензините ЕУРОСУПЕР БС-95 и ЕУРОСУПЕР БС-98 не се менуваат. Малопродажните цени на ЕУРОДИЗЕЛ (Д-Е V) и на Екстра лесното масло за домаќинство (ЕЛ-1) се намалуваат за 1,00 ден/лит. Малопродажната цена на Мазутот (М-1 НС) се намалува за 0,902 ден/кг и сега ќе изнесува 33,963 ден/кг. Од РКЕ напоменуваат дека ова се максималните цени на нафтените деривати од 00:01 часот на 2.12.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени. Државниот завод за статистика (ДЗС) објави дека бројот на работници во индустријата во октомври е намален за 2,8% во споредба со истиот месец лани. Овој негативен тренд е забележан во секторот Рударство и вадење на камен кадешто намалувањето изнесува 2,8%, во секторот Преработувачка индустрија има пад од 2,9%, а во секторот Снабдување со електрична енергија, гас, пареа и климатизација има намалување за 1%. Според главните индустриски групи, најголем пад во бројот на работниците во однос на октомври лани е регистриран во групата Капитални производи со намалување од 5,6%, потоа следат Нетрајни производи за широка потрошувачка со 3,1%, Енергија со 2,1% и Интермедијарни производи, освен енергија со 0,3%. Зголемување на бројот на работници има во групата Трајни производи за широка потрошувачка за 4,6%. За периодот јануари-октомври, бројот на работниците во индустријата бележи намалување од 3,6% во однос на истиот период претходната година. ТАВ Македонија во текот на 2025 година реализираше инвестиции во вкупен износ од 3,8 милиони евра на Меѓународниот Аеродром Скопје. Целта на инвестициите е значително подобрување на ефикасноста, квалитетот на услугите и зголемување на удобноста на патниците, следејќи ги највисоките светски стандарди. Повеќето од средствата се наменети за подобрување на аеродромските услуги, комерцијален развој и технолошка модернизација. Неџат Курт, генерален директор на ТАВ Македонија, истакна дека инвестициите се водени од четирите стратешки столба на матичната компанија - гостопримство, почит, дигитализација и одржливост, со цел да се создаде функционален, модерен и пријатен аеродром. ТАВ воведе многу новитети во областа на заминувањата, вклучувајќи работни катчиња со станици за полнење и бесплатен Wi-Fi, нови столици и фотељи за одмор, подобрени информативни знаци, нови големи монитори, интерактивни киосци, нов ресторан Need Stop на BTA (на 320 м²), нова бестселер продавница на ATU (на 125 м² со локални брендови), ново детско катче и станици за вода за пиење. Покрај овие подобрувања видливи за патниците, Курт ги нагласи и инвестициите во надградби на техничките системи и опремата за земјени операции, кои се клучни за оперативната ефикасност. Меѓу нив се набавка на најсовремено противпожарно возило, разна опрема за земјените операции, нови паркомати за самоплаќање, возило за брза помош и проширување и адаптација на чекалната пред пасошка контрола. ТАВ Македонија најавува продолжување на фокусот кон подобрување на услугите и на аеродромот во Охрид. Државниот завод за статистика (ДЗС) објави дека индустриското производство во октомври бележи раст од 2,8% во споредба со истиот месец лани. Позитивниот резултат е главно воден од секторот Снабдување со електрична енергија, гас, пареа и климатизација кадешто има раст од 26,5%, додека Преработувачката индустрија има мал пораст од 0,4%. Во исто време, секторот Рударство и вадење на камен забележа мало опаѓање од 0,2%. Порастот во Преработувачката индустрија е резултат на зголемено производство во одделите како што се Производство на прехранбени производи, Производство на пијалаци, Производство на тутунски производи, Печатење, Производство на основни фармацевтски производи, Производство на производи од гума и пластични маси и Производство на електрична опрема. Според главните индустриски групи, значителен пораст е забележан кај Енергија со 25,9% и кај Интермедијарни производи, освен енергија со 10,5%, додека опаѓање има кај Капитални производи со 9,2% и Трајни производи за широка потрошувачка со 17,6%. Најголемо влијание врз вкупниот пораст на индустриското производство во октомври имаат одделите Производство на пијалаци со 11,8%, Производство на електрична опрема со 12,0% и Снабдување со електрична енергија, гас, пареа и климатизација со 26,5%. Во однос на кумулативните податоци, индустриското производство во периодот јануари – октомври 2025 година е зголемено за 2,4% во однос на истиот период лани. Германската фармацевтска компанија „Гересхајмер“, официјално донесе одлука за проширување на својата инвестиција во Технолошко-индустриската развојна зона (ТИРЗ) Скопје 2. Првичната инвестиција на компанијата, која веќе ја гради својата втора фабрика во зоната, се зголемува од 126 милиони евра на 140 милиони евра. Директорот на ТИРЗ, Гоце Димовски, оствари средба со менаџментот на „Гересхајмер“ за да разговара за досегашниот напредок и плановите за проширување. Димовски истакна дека ова зголемување на инвестицијата претставува позитивен сигнал за успешноста на политиките на Дирекцијата и Владата. Тој посочи дека зголемената доверба од инвеститорите е потврда дека државата нуди стабилна, предвидлива и конкурентна бизнис клима, клучна за реализација на долгорочни високотехнолошки проекти кои ќе донесат висока додадена вредност за целата економија. Томас Мартинс, директор на фабриката на „Гересхајмер“ во Скопје, изрази големо задоволство од соработката со ДТИРЗ и Владата, нагласувајќи дека токму стабилната поддршка и отворената комуникација биле клучни фактори во одлуката за проширување. Мартинс истакна дека оваа проширена инвестиција ќе генерира пошироко индустриско и економско влијание врз регионот, вклучувајќи повисоки технолошки стандарди, зајакнати мрежи на добавувачи и очекувано зголемување на просечниот годишен раст на продажбата на локацијата, при што се очекуваат и нови високо платени работни места. Од ТИРЗ најавија дека продолжуваат активно да работат на унапредување на деловната клима, со цел привлекување нови странски директни инвестиции и поттикнување на постоечките инвеститори за проширување на своите проекти, зацврстувајќи ја позицијата на Македонија како атрактивна локација за странските инвеститори. Регулаторната комисија за енергетика, водни услуги и услуги за управување со комунален отпа (РКЕ) донесе Одлука со која се врши намалување на малопродажните цени на нафтените деривати во просек за 1,26% во однос на одлуката од 24.11.2025 година. Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 2,370%, кај дизелот за 6,738%, кај екстра лесното масло за 6,741% и кај мазутот намалувањето за 3,944%. Курсот на денарот во однос на доларот во изминатиот период по кој беа формирани цените со претходната пресметка е повисок за 0,4085%. Од 28.11.2025 година од 00:01 часот максималните цени на нафтените деривати ќе изнесуваат: - Моторен бензин ЕУРОСУПЕР (БС-95) - 75,00 (денари/литар). - Моторен бензин (ЕУРОСУПЕР БС-98) - 77,00 (денари/литар). - Дизел гориво (ЕУРОДИЗЕЛ БС Д-Е V) - 70,50 (денари/литар). - Масло за горење (Екстра лесно 1 ЕЛ-1) - 67,50 (денари/литар). - Мазут (М-1 НС) - 34,865 (денари/килограм). Малопродажната цена на ЕУРОДИЗЕЛ (Д-Е V) се намалува за 2,50 ден/лит. Малопродажната цена на Екстра лесното масло за домаќинство на (ЕЛ-1) се намалува за 2,00 ден/лит. Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Мазутот М-1 НС не се менуваат. Од РКЕ напоменуваат дека ова се максималните цени на нафтените деривати од 00:01 часот на 28.11.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени. Премиерот Христијан Мицкоски на седницата за пратенички прашања во Собранието, истакна дека капиталните инвестиции ќе бидат главниот фокус на Владата за следната година и се очекува да бидат клучен двигател на економијата. Како крајна цел е поставен реален раст на бруто домашниот производ (БДП) од над 4%. Мицкоски посочи дека Владата и оваа година покажала резултати, наведувајќи го растот на БДП од 3% на 3,4%, а за третиот квартал очекува уште повисоки бројки, со оглед на растот од над 34% во реализацијата на капиталните и приватните инвестиции само во градежништвото. „Нашата цел е да дојдеме до реален раст на БДП од 4% и повеќе во услови на ваква криза, посебно во автомобилската индустрија и во услови на геостратешките политички консталации и да дојдеме до номинален раст на БДП помеѓу 7,5% и 8%.“ - изјави Мицкоски. Тој додаде дека номиналниот раст веќе се движи во тој правец, со 7,5% во првиот и 7,8% во вториот квартал, што претставува амбиција на Владата, истовремено да ги намали јавниот и државниот долг. Премиерот истакна дека јавниот долг е помал за речиси 2,8%, а државниот за 3,5% во однос на крајот на 2024 година, со однос на додадената вредност спрема задолжувањата од 2 спрема 1. Мицкоски нагласи дека Владата е насочена кон реализација на сите капитални инвестиции. Вкупниот обем на капитални инвестиции кои се финансираат од централната влада (вклучувајќи ги и општинските проекти и програмите преку министерствата) достигнува половина милијарда евра, со очекување дека 75% до 80% од овие капитални инвестиции ќе бидат завршени. Што се однесува до патната инфраструктура, премиерот очекува автопатот Кичево-Охрид да биде завршен најдоцна до првиот квартал на 2027 година, иако постои проблем со проектирањето на косините за стабилизација на земјиштето. Мицкоски најави огромен напредок во реализацијата на Коридорите 8 и 10д и завршување на капитални проекти во други сегменти, како и отпочнување на нови. Министерството за финансии денеска го објави Проспектот за издавање на нова Граѓанска обврзница. Оваа емисија е објавена на износ од 100 милиони денари и им нуди на граѓаните можност за инвестирање со атрактивна каматна стапка. Каматната стапка на обврзницата е фиксна и изнесува 4,5%, а рочноста е две години. Минималниот износ за запишување е 10.000 денари, колку што изнесува вредноста на една обврзница. Граѓаните ќе може да доставуваат понуди за запишување на обврзници во деловните банки во земјава до 10 декември 2025 година. Аукцијата за обврзницата ќе се одржи два дена подоцна, на 12 декември. Датумот на достасување на обврзниците е 19 декември 2027 година. Исплатата на каматата ќе се врши еднаш годишно: првата исплата достасува на 19 декември 2026 година, а втората исплата на каматата заедно со главницата е на 19 декември 2027 година. Ова е трета емисија од инструментот „Граѓанска обврзница“ кој Министерството го издава со цел да им овозможи на граѓаните директно да инвестираат во државни хартии од вредност. Двете претходни емисии беа исклучително успешни, со вкупно запишан износ од 41,1 милион евра, кои веќе се исплатени заедно со каматата за двете години. Првата емисија изнесуваше 23,5 милиони евра, а втората 17,6 милиони евра. 
