Во текот на изминатата недела, во периодот од 27 јули до 2 август 2026 година, Министерството за внатрешни работи спроведе интензивни акциски контроли за сузбивање на недозволената трговија со дрога на целата територија на државата, при што се приведени и лишени од слобода над 70 лица.
При извршените претреси и контроли, кај осомничените биле пронајдени и одземени различни видови наркотични дроги, меѓу кои бела и кафеава прашкаста материја, марихуана и хашиш, како и дробилки и други предмети наменети за употреба и дистрибуција. За дел од случаите, по наредба на надлежните судови, беа извршени и претреси во домови и други простории каде што беа обезбедени дополнителни докази.
Меѓу приведените лица кои се соочуваат со соодветни пријави има и странски државјани, односно жители на Белгија, Турција и Германија.
По целосно документирање на сите поединечни случаи, МВР ќе поднесе соодветни кривични и прекршочни пријави против сите инволвирани лица. Од полицијата најавуваат дека контролите и засилените активности за зачувување на јавниот ред и безбедноста на граѓаните продолжуваат со исто темпо и во претстојниот период. Градскиот стадион во Битола вечерва ќе биде домаќин на еден од најголемите музички настани годинава, каде што регионалната легенда Здравко Чолиќ ќе одржи концерт пред рекордни над 15.000 посетители.
Информацијата ја сподели градоначалникот на Битола, Тони Коњановски, пренесувајќи ги најавите од организаторите „Avalon International Booking“. Според нивните податоци, ова е апсолутен рекорд по посетеност за еден концерт во Битола, но и пошироко во регионот, вклучувајќи го и Охрид.
Под мотото „Каде и да си, на 1 август во Битола да си“, на концертот се очекува публика од цела Македонија и соседството.
Поради огромниот интерес и рекордната бројка на фанови, од организацијата апелираат за навремено пристигнување. Вратите на стадионот ќе бидат отворени од 19:00 часот, додека официјалниот почеток на музичкиот спектакл е закажан за 21:00 часот. Единицата за финансиски криминал при МВР поднесе кривична пријава до ОЈО за гонење на организиран криминал и корупција против три лица од Битола, Гостивар и Скопје, вклучени во корупциска шема за добивање уверение за положен стручен испит на Стоматолошкиот факултет.
Пријавени се 27-годишната А.Т. од Битола за „давање награда за противзаконито влијание“, 56-годишниот С.Ч. од Гостивар за „примање награда за противзаконито влијание“ и 63-годишниот С.Е. од Скопје за „примање поткуп“.
Според информациите од полицијата, студентката А.Т. во декември 2025 година, по повеќекратна комуникација преку апликацијата „Вибер“, префрлила парични средства на трансакциска сметка на С.Ч., професор на Стоматолошкиот факултет и поранешен потпретседател на Стоматолошката комора.
Целта на уплатата била професорот да изврши противзаконито влијание кај С.Е., кој во тој период бил претседател на Комисијата за полагање стручен испит при Министерството за здравство. Благодарение на оваа интервенција, студентката на 17 декември 2025 година го положила испитот и се стекнала со уверение за здравствен работник без да го поседува потребното знаење.
При извршените претреси кај второпријавениот и третопријавениот, полициските службеници пронајдоа и одзедоа парични средства во вкупна вредност од 65.280 евра, 29.840 швајцарски франци и 161.500 денари. Во успешна акција на царинските службеници на граничниот премин Богородица, при контрола на товарно моторно возило спречен е обид за шверц на голема количина цигари. Запленети се вкупно 5.000 штеки цигари без акцизни маркички, чија вредност се проценува на девет милиони денари (околу 146.000 евра). Возачот на камионот е приведен, а против него веќе е поднесена кривична пријава.
Според официјалните информации од Царинската управа, товарното моторно возило било пријавено за транзит од Грција кон Србија. Согласно приложена документација, камионот требало да превезува единствено градежни материјали, односно камена волна.
При извршената детална контрола на возилото, царинските службеници над палетите со пријавената стока откриле 100 непријавени и необележани кутии, во кои се наоѓале по 50 штеки цигари.
Возачот на камионот, српски државјанин кој се обидел да ја прокриумчари непријавената стока, веднаш е лишен од слобода. Против него е поднесена кривична пријава за сторено кривично дело „криумчарење“ до Основното јавно обвинителство Гевгелија. Полициски службеници од СВР Битола вчера ги лишија од слобода лицата Ѓ.З. (35) и А.Ј. (29), двајцата од Битола, кои се сомничат за извршена тешка кражба во маркет. Според информациите од полицијата, тие истиот ден извршиле кражба во проданица лоцирана на улицата „Север-југ“ во Битола, од каде што одзеле околу 30 штеки со различни видови цигари.
По пријавувањето на настанот, полицијата брзо реагираше и изврши претрес во домот што го користеле осомничените. При претресот, целата количина на украдени цигари била пронајдена и веднаш вратена на сопственикот на маркетот.
При дополнителната проверка и преземените оперативни мерки, полициските службеници утврдија дека 35-годишниот Ѓ.З. бил баран со централна потерница поради бегство од Казнено-поправната установа Затвор Прилеп, каде што веќе издржувал затворска казна.
По приведувањето, тој веднаш бил спроведен назад во прилепскиот затвор за доиздржување на преостанатата затворска казна во траење од осум месеци. По комплетно документирање на случајот, против двајцата сторители ќе бидат поднесени соодветни кривични пријави. 
