Најнови

Тригодишен план за енергетска реконструкција на објектите од јавниот сектор

Министерството за енергетика, рударство и минерални суровини ја интензивира координацијата со меѓународните партнери за забрзување на процесот на енергетска реконструкција на објектите во јавниот сектор. Целта на овие активности е значајно намалување на потрошувачката на енергија и поефикасно управување со јавните ресурси. Во рамките на подготовките за спроведување на проектот PIONEER-MK, поддржан преку програмата PEEB Cool, во Министерството се одржа мисија на Француската агенција за развој (AFD). На партнерскиот состанок учествуваа претставници на AFD, Светската банка, Германското друштво за меѓународна соработка (GIZ), како и претставници од Канцеларијата на Претседателот на Владата. На средбата се детално разгледани можностите за подобрување на меѓуинституционалната координација за реализација на Планот за реконструкција на зградите што ги користат државните институции, предвиден за периодот од ноември 2025 до ноември 2028 година. Од Министерството посочуваат дека енергетската обнова на јавните објекти претставува клучна инвестиција за намалување на буџетските трошоци и подобрување на одржливоста на јавната инфраструктура. Преку синергија со меѓународните финансиски и развојни институции се овозможува поефикасно спроведување на мерките за енергетска ефикасност и исполнување на националните и европските цели за намалување на емисиите на стакленички гасови и зелена транзиција.

Герасимовски: Донирана е книгата за Тоше Проески во сите основни училишта во Општина Центар

По повод одбележувањето на 19 години од смртта на македонската музичка легенда Тоше Проески, Општина Центар започна акција за донирање на книгата посветена на неговиот живот и дело во сите основни училишта на територијата на општината. Како што истакна градоначалникот на Општина Центар, Горан Герасимовски, целта на оваа иницијатива е младите генерации и децата од основното образование да имаат можност одблиску да се запознаат со неговата приказна, огромната добрина, хуманост и љубов што Тоше ги ширеше преку својот живот и музика. Герасимовски нагласи дека споменот за Тоше Проески останува трајно врежан во македонската културна и општествена меморија, а неговото наследство ќе продолжи да се пренесува и на генерациите што доаѓаат. „Има песни што никогаш не престануваме да ги слушаме и луѓе што засекогаш ни остануваат во срцето. Тоше е меѓу нив, веќе 19 години. Денес, во негов спомен, ја донираме книгата за Тоше во сите основни училишта во Центар. За децата да го запознаат и преку неговата приказна, да прочитаат колку љубов даваше и колку срца допре со својата добрина. Неговите песни ќе продолжиме да ги пееме, а каков човек беше ќе им раскажуваме и на генерациите што доаѓаат“, порача Герасимовски.

Градоначалничката на Кисела Вода донираше прехранбени производи преку организацијата „Свети Спас“

По повод одбележувањето на Светскиот ден на борба против гладот, градоначалничката на Општина Кисела Вода, Бети Стаменкоска Трајкоска, реализираше хуманитарна донација на прехранбени производи наменети за поддршка на семејствата на кои им е најпотребна помош. Донацијата е предадена и дистрибуирана преку хуманитарната организација „Свети Спас“ од Драчево. Притоа, градоначалничката упати јавна благодарност до отец Оливер Петровски и до сите хумани луѓе кои несебично се вложуваат за да им помогнат на граѓаните на кои им е најтешко во секојдневниот живот. Градоначалничката истакна дека Општина Кисела Вода останува цврсто посветена на грижата за сите свои сограѓани, нагласувајќи дека ваквите хуманитарни активности не треба да бидат реткост или поврзани само со одредени датуми од календарот. „Хуманоста е наша заедничка одговорност. Таа се покажува со дела, со искрена грижа и со подадена рака тогаш кога е најпотребно. Како Општина Кисела Вода, остануваме посветени на грижата за нашите сограѓани. Верувам дека секоја помош значи многу, а заедно можеме да внесеме повеќе надеж и сигурност во домовите на семејствата на кои им е потребна поддршка. Хуманоста нема да ја покажуваме само на одредени денови, туку секојпат кога некој има потреба од нас“, порача Стаменкоска Трајкоска.

Дневен Хороскоп (17 октомври 2026)

Објавен е оглас за вработување на 43 патролни шумски полицајци со почетна плата од 36.246 денари

Министерството за земјоделство, шумарство и водостопанство (МЗШВ) распиша јавен оглас број 1/2026 за вработување на 43 овластени службени лица на неопределено време во Секторот за шумска полиција, на позицијата патролен шумски полицаец. Вработувањата се реализираат согласно Годишниот план на институцијата за 2026 година. Заинтересираните кандидати треба да имаат завршено најмалку средно образование (IV или V А ниво на квалификации), да бидат психофизички способни и соодветни за носење оружје, како и да поседуваат потврди за положен психолошки тест и тест за интегритет. Огласот е отворен за кандидати со или без работно искуство, а избраните лица ќе имаат обврска во рок од една година од вработувањето да положат испит за шумски полицаец. Работното место опфаќа 40-часовна работна недела организирана во три смени, вклучувајќи и денови од викендот. Месечната нето-плата за оваа позиција изнесува 36.246 денари. Клучните обврски на патролните шумски полицајци ги опфаќаат следните активности: Заштита и чување на шумскиот фонд од бесправна сеча и кражби, спречување, легитимирање и приведување лица затечени во вршење кривични дела и штети врз шумите, контрола на сите транспортни средства што превезуваат дрво и други шумски производи, привремено одземање предмети и средства искористени за извршување прекршоци или кривични дела и спречување и навремено известување за шумски пожари, растителни болести и штетници. Пријавите со комплетната документација се доставуваат во рок од 20 дена од објавувањето на огласот до Секторот за човечки ресурси при МЗШВ, на адреса ул. „Ленинова“ бр. 2, Скопје. Повеќе информации можете да најдете на сајтот на Министерството за земјоделство шумарство и водостопанство.

Над 13 милијарди денари неплатени даноци и придонеси: УЈП ја објави најновата листа на должници

Управата за јавни приходи (УЈП) ја објави најновата Листа на должници бр. 10/2026, која ги опфаќа сите даночни долгови доспеани до 30 јуни 2026 година, а кои останале неплатени до 30 септември 2026 година. Вкупниот нето-долг за даноци и придонеси за социјално осигурување објавен на оваа листа изнесува над 13 милијарди денари, а се евидентирани вкупно 4.537 должници. Според податоците од УЈП, од претходната листа бр. 09/2026 се повторуваат 4.443 должници. Кај 2.693 од нив е забележано зголемување на долгот за 269 милиони денари, 498 должници го намалиле својот долг за 259 милиони денари, додека кај 1.252 субјекти износот останал непроменет. На најновата листа се појавуваат и 94 нови должници со вкупен долг од 314 милиони денари, за кои даночната управа најави дека при следната објава ќе даде детални информации за преземените мерки за наплата. Во исто време, 797 должници од претходната листа, кои должеа вкупно 684 милиони денари, веќе не се наоѓаат на новата листа откако ги регулирале своите обврски или по друг основ им престанал долгот. Како дел од заложбите за поголема транспарентност, на оваа листа се објавени и конкретни информации за веќе преземените мерки за принудна наплата кај 462 даночни должници. Од УЈП посочуваат дека објавувањето на овие податоци е во целосна согласност со Законот за даночна постапка и не претставува даночна тајна.

Инвестиции во зелена енергија и мрежна инфраструктура: Божиновска оствари средба со раководството на ЕБОР

Министерката за енергетика, рударство и минерални суровини, Сања Божиновска, оствари работна средба со висока делегација од Бордот на директори на Европската банка за обнова и развој (ЕБОР), предводена од директорот за Холандија, Кина, Македонија, Ерменија и Монголија, Рене ван Хел, како и претставникот на ЕБОР во земјава, Фатих Туркменоглу. На средбата се презентирани клучните реформски чекори на Министерството насочени кон зајакнување на домашната енергетска инфраструктура и стабилизирање на сигурноста во снабдувањето. Претставниците на ЕБОР ја поздравија посветеноста на институциите, оценувајќи дека македонските реформи во енергетскиот сектор бележат напредок и се во понапредна фаза во споредба со одредени земји од поширокиот регион. Во рамките на разговорите посебно внимание беше посветено на интеграцијата на капацитетите од обновливи извори на енергија (ОИЕ), можностите за складирање на електрична енергија, како и на неопходното зајакнување на мрежната инфраструктура во координација со МЕПСО. Исто така, истакната е важноста од диверзификацијата на производствените капацитети и практичната примена на законските решенија и подзаконските акти. Министерката Божиновска нагласи дека постои висок интерес од страна на граѓаните и компаниите за инвестиции во зелена енергија, при што се работи и на носење на нови законски решенија, меѓу кои и Законот за јавно-приватно партнерство. На состанокот се разговараше и за проектите за регионално енергетско поврзување со соседна Грција и Србија, имплементацијата на нови паметни мерни системи (smart метри) во наредниот период, како и за значењето на сајбер-безбедноста во заштитата на енергетските мрежи.

Кривична пријава против поранешен градоначалник на Струмица за нелегална легализација во Куклиш

Секторот за внатрешни работи Струмица до Основното јавно обвинителство Струмица поднесе кривична пријава против К.К. (36) од Струмица, поранешен градоначалник на Општина Струмица, С.Р. (38), поранешна раководителка на Секторот за урбанизам, комунални работи и градежно земјиште, како и против Ј.П. (60) од Битола, поранешен управител на фирма од Битола. Пријавата е поднесена поради постоење основано сомневање за сторени кривични дела „злоупотреба на службена положба и овластување“ и „фалсификување исправа“. Според документацијата од истрагата, К.К. и С.Р. во текот на 2022 година ја злоупотребиле својата службена положба за да овозможиле легализација на бесправно изграден објект на катастарска парцела во селото Куклиш, со што овозможиле стекнување противправна имотна корист за физичкото лице Т.Ј. од истото село. За да се реализира постапката, од страна на тогашната раководителка било побарано од третопријавениот Ј.П. да изготви елаборат со невистинита содржина. Со техничкиот извештај било лажно прикажано дека на терен не постојат објекти, со цел од катастарската евиденција да се избришат постојните објекти во сопственост на Општина Струмица и да се обезбеди чист имотен лист. Врз основа на вака подготвените документи, тогашниот градоначалник донел решение за легализација на деловен простор (стовариште) со површина од 161 квадратен метар. Ова решение дополнително му овозможило на лицето Т.Ј. да изврши откуп и да отуѓи државно градежно земјиште со површина од 866,46 квадратни метри во сопственост на државата. При извршувањето на овие дејствија, пријавените службени лица свесно ги занемариле претходните правосилни одлуки на Вишиот управен суд од 2016 и 2019 година, со кои барањето за легализација на ова лице било конечно одбиено. Дополнително било игнорирано и решението од овластен градежен инспектор со кое претходно му било наредено на инвеститорот да ја отстрани дивоградбата, со што е нанесена директна материјална штета врз буџетот на Општина Струмица и државата.

Влезните трошоци во земјоделството пораснале за 8,8 проценти во септември

Цените во земјоделството во септември бележат зголемување и во делот на влезните трошоци (инпут) и кај финалните производи (аутпут) во споредба со истиот месец од претходната година, соопшти Државниот завод за статистика (ДЗС). Според објавените податоци, најизразито зголемување од 8,8 проценти е регистрирано кај цените на инпут 1, односно кај тековно потрошените средства во земјоделското производство. Во исто време, цените на средствата наменети за инвестиции во земјоделството (инпут 2) бележат пораст од 8,6 проценти. Во делот на аутпутот, односно кај финалните земјоделски производи, забележани се спротивни движења во зависност од секторот. Цените во растителното производство во септември се зголемени за 3,9 проценти во однос на истиот месец лани. За разлика од нив, цените во добиточното производство бележат пад од 2,1 процент во истиот споредбен период.

Дневен Хороскоп (16 октомври 2026)