Компанијата „Гунвор Груп“ ја повлече својата понуда за купување на меѓународните средства на рускиот енергетски гигант „Лукоил“, откако Министерството за финансии на САД јавно го блокираше договорот, нарекувајќи ја компанијата „марионета на Кремљ“. Американското Министерство за финансии, кое е клучно за издавање дозволи за трансакции поврзани со санкционирани субјекти, напиша на социјалната мрежа „X“: „Претседателот Трамп беше јасен дека војната мора да заврши веднаш. Сѐ додека Путин продолжува со бесмислените убиства, марионетата на Кремљ, Гунвор, никогаш нема да добие дозвола да оперира и да профитира.“ Од „Гунвор Груп“, чиј ко-основач во минатото беше близок соработник на Владимир Путин, реагираа веднаш, отфрлајќи ги обвинувањата: „Изјавата на Министерството за финансии на САД за Гунвор е дезинформација. Гунвор е и отсекогаш бил отворен и транспарентен во врска со своето сопствеништво и бизнис, и повеќе од една деценија активно се дистанцира од Русија, престана да тргува во согласност со санкциите, продаде руски средства и јавно ја осуди војната во Украина. Ја поздравуваме можноста да се осигураме дека ова јасно недоразбирање е исправено. Во меѓувреме, Гунвор го повлекува својот предлог за меѓународните средства на Лукоил.“ Руската компанија „Лукоил“, најголемиот приватен производител на нафта во Русија, беше цел на нови, сеопфатни американски санкции минатиот месец. Овие санкции, кои требаше да стапат на сила на 21 ноември 2025 година, во суштина го оневозможија меѓународното работење на компанијата. Поради овие рестриктивни мерки, „Лукоил“ одлучи да го продаде целиот свој имот надвор од Русија, кој вклучува: рафинерии во Европа (Бугарија и Романија), мрежа од околу 2.000 бензински пумпи низ Европа и удели во нафтени и гасни проекти во Централна Азија, Блискиот Исток, Африка и Латинска Америка. Македонија бележи значителен напредок во енергетската транзиција, вклучувајќи во просек скоро по еден нов мегават (MW) обновлива енергија секој ден во последните четири години, објави претседателот на Регулаторната комисија за енергетика (РКЕ), Марко Бислимоски, на Регионалната конференција за зелена трансформација на Западен Балкан што се одржа во Тирана. Заклучно со октомври 2025 година (сметано од октомври 2022 година), во земјата се изградени нови капацитети за производство на електрична енергија од обновливи извори со вкупен инсталиран капацитет од 1.200 MW. Иако бројките се охрабрувачки, Бислимоски посочи дека периодот што претстои е полн со предизвици, од кои најголем е балансирањето на електроенергетскиот систем поради големиот прилив на електрична енергија од обновливи извори. „Мораме во оваа фаза да делуваме и поттикнуваме инвестиции во енергетски капацитети кои ќе произведуваат базна енергија. Секако и употребата на батериите има своја улога, но неопходно е да е реализираат инвестиции со кои ќе се замени производството на струја од јаглен со гас или биомаса,“ посочи Бислимоски. На Панелот посветен на формирање зони за побрза реализација на зелените инвестиции, беше истакната потребата од дигитализација на административните процеси за добивање дозволи. Вицепремиерот и министер за транспорт Александар Николоски и вицепремиерот на Бугарија Гроздан Караџов, денеска на железничката станица во Ѓуешево, Бугарија, го потпишаа Договорот за подготовка, изградба и оперативност на меѓуграничниот железнички тунел на Коридор 8. Вицепремиерот Николоски истакна дека овој чин е „сон на многу генерации“ и претставува историски момент со стратешко, економско и геополитичко значење за целиот Балкан и Европа. Николоски потенцираше дека железничкиот Коридор 8 е исклучително важен за Македонија бидејќи ја поврзува земјата со две мориња, со што директно ќе ја зголеми конкурентноста на домашната економија. Тој нагласи дека коридорот има и огромно безбедносно значење за НАТО Алијансата, особено во контекст на актуелната војна во Украина, служејќи како помош за Алијансата. Првата фаза, од Куманово до Бељаковце, е завршена и ставена во функција оваа година и чинеше 79 милиони евра. Втората фаза, од Бељаковце до Крива Паланка, се работи во моментов со рок за изградба октомври 2026 година, со предвиден буџет од 155 милиони евра. За третата фаза, од Крива Паланка до границата, чиј буџет е околу 455 милиони евра, се очекува во тек на месец декември да се распише претквалификација за избор на изведувач и надзор, со поддршка од ЕИБ, ЕБРД и ЕУ. Дополнително, предвидени се 110 милиони евра за сигнализација и електрификација од Куманово до границата, со цел да се добие најмодерна сигнализација по завршување на целиот коридор. Вкупниот буџет за железницата од Куманово до границата изнесува најмалку околу 810 милиони евра, од кои 200 милиони евра се грант од ЕУ. Николоски изрази незадоволство од досегашната работа на изведувачите на втората фаза, најавувајќи дека ќе се бара заедничко решение со партнерите од ЕБРД. На крајот, вицепремиерот најави дека наскоро ќе го покани вицепремиерот Караџов во Македонија за завршување на втората и отпочнување на градежните работи на третата фаза. Директорот на Дирекцијата за технолошки индустриски развојни зони (ТИРЗ), Гоце Димовски, денеска оствари средба со делегација од јужнокорејската компанија Hyundai Corporation Holdings, предводена од Сунгву Хонг, генерален менаџер на претставништвото за Европа. Претставникот на Hyundai Corporation Holdings изрази особен интерес за Македонија како потенцијална дестинација за проширување на нивните производствени капацитети. Компанијата е во потрага по локации кои нудат добра инфраструктура, квалификувана работна сила и поволни услови за инвестирање. Директорот Димовски ги презентираше потенцијалите и механизмите за поддршка што ги нуди државата за странските инвеститори. Тој нагласи дека примарна цел на ТИРЗ е создавање на уште поповолна инвестициска клима со проекти кои ќе донесат висока додадена вредност. „Дирекцијата за ТИРЗ е целосно посветена на обезбедување на поддршка на странските инвеститори преку ефикасни административни процеси, стабилно и предвидливо деловно опкружување, како и олеснет пристап до современа инфраструктура и квалификувана работна сила,“ истакна Димовски. Иако брендот HYUNDAI традиционално се поврзува со автомобилската и тешката индустрија, Hyundai Corporation Holdings го прошири своето делување во сегменти како електроника, хардвер и иновативни технологии. Портфолиото на компанијата денес вклучува домашни апарати, преносни генератори, опрема за домаќинство и индустрија, осветлување и батерии, што отвора значаен потенцијал за технолошки развој и соработка во рамки на македонските зони. Средбата заврши со очекување за понатамошна соработка и конкретизирање на потенцијалната инвестиција во блиска иднина. Министерката за енергетика, рударство и минерални суровини, Сања Божиновска, по официјална покана од секретарот за енергетика на САД, Крис Рајт и грчкиот министер за енергетика, Ставрос Папаставру, ќе учествува на Шестото партнерство за трансатлантска енергетска соработка (P-TEC), што ќе се одржи во Атина. Настанот го организира Владата на САД во соработка со грчкото Министерство за енергетика, и претставува една од највлијателните платформи за енергетска соработка меѓу Европа и Северна Америка. Форумот ќе го отвори американскиот секретар за енергетика Крис Рајт, заедно со грчкиот министер за енергетика Ставрос Папастравру, а на програмата ќе учествуваат водечки личности од глобалниот енергетски сектор, претставници на меѓународни институции и енергетски компании. Во рамки на посетата, Министерката Божиновска ќе има и средба со секретарот за енергетика на САД, на која ќе се разговара за можности за продлабочување на енергетската соработка, инвестиции во регионални енергетски коридори. Во рамки на форумот, министерката Божиновска ќе присуствува и на прием организиран од Амбасадата на САД во Атина, на покана на амбасадорката Кимберли Гилфојл, во чест на американските секретари за внатрешни работи и енергетика и нивните тимови кои престојуваат во Грција како дел од програмата на P-TEC. P-TEC форумот опфаќа теми како енергетската безбедност, нуклеарната технологија, инфраструктурното финансирање, природниот гас како нова карта на енергетска поврзаност во Европа и трансформацијата на енергетските системи во ерата на вештачката интелигенција. Учеството на министерката Божиновска на овој форум е потврда за зголемениот интерес и позиционирање на Македонија во рамките на трансатлантските енергетски иницијативи, како и за континуираниот ангажман на Владата во насока на јакнење на енергетската стабилност, диверзификација на изворите и пристапот до нови технологии и инвестиции. Државниот завод за статистика (ДЗС) ги објави податоците за стоковната размена со странство за периодот јануари–септември 2025 година, кои укажуваат на натамошен раст на надворешната трговија на земјата. Во споредба со истиот период од претходната година, забележан е пораст на трговскиот дефицит. Вкупната вредност на извозот на стоки од Македонија во првите девет месеци достигна 368 милијарди денари (околу 5,9 милијарди евра), раст од 2,1% во однос на истиот период лани. Вредноста на увезената стока изнесува 523 милијарди денари (околу 8,5 милијарди евра), бележејќи раст од 3,6%. Во извозот најмногу се застапени високотехнолошки производи и компоненти за автомобилската индустрија. Најголемо учество имаат катализатори на носачи со благородни метали или нивни соединенија, сетови на проводници за палење и слично, делови на седишта и друго. Кај увозот најзастапени се нафтени масла и масла добиени од битуменозни минерали, платина и метали од платинската група, моторни возила и друго. Според вкупниот обем на надворешно-трговската размена, клучни партнери остануваат земјите од Европската Унија и регионот. Најмногу се тргувало со Германија, Велика Британија, Кина, Грција и Србија, кои заедно учествуваат со 47,7% во вкупниот обем на размена. Земјите членки на Европската Унија се најголемиот трговски партнер, со учество од 59,6% во вкупната размена со Македонија. Државниот завод за статистика (ДЗС) објави податоци кои покажуваат намалување на бројот на работниците во индустријата за 2,8% во септември 2025 година во однос на истиот месец минатата година. Според секторите, најголемо намалување бележи Преработувачката индустрија со пад од 2,9%. Намалување е регистрирано и во секторот Рударство и вадење на камен за 2,0%, како и во секторот Снабдување со електрична енергија, гас, пареа и климатизација за 0,6%. Анализирано според главните индустриски групи, најголем пад на работници е забележан во групата Капитални производи, со значително намалување од 6,4%. Намалување има и во групите Нетрајни производи за широка потрошувачка (2,8%) и Енергија (1,8%). ДЗС регистрира зголемување на бројот на работници во две групи: Трајни производи за широка потрошувачка со раст од 4,8% и Интермедијарни производи, освен енергија, со мал раст од 0,2%. Тренд на намалување се забележува и кумулативно, при што во периодот јануари-септември 2025 година, бројот на работници во индустријата се намалил за 3,7% во споредба со истиот период претходната година. Регулаторната комисија за енергетика, водни услуги и услуги за управување со комунален отпад (РКЕ) донесе Одлука со која се врши зголемување на малопродажните цени на нафтените деривати во просек за 1,03% во однос на одлуката од 30.10.2025 година. Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 2,849%, кај дизелот за 2,319%, кај екстра лесното масло има намалување е 0,05% и кај мазутот има зголемување за 3,433%. Курсот на денарот во однос на доларот во изминатиот период по кој беа формирани цените со претходната пресметка е понизок за 0,0034%. Од 4.11.2025 година од 00:01 часот максималните цени на нафтените деривати ќе изнесуваат: - Моторен бензин (ЕУРОСУПЕР БС-95) - 74,00 (денари/литар). - Моторен бензин (ЕУРОСУПЕР БС-98) - 76,00 (денари/литар). - Дизел гориво (ЕУРОДИЗЕЛ БС Д-Е V) - 71,00 (денари/литар). - Масло за горење (Екстра лесно 1) - 69,50 (денари/литар). - Мазут (М-1 НС) - 36,913 (денари/килограм). Малопродажните цени на бензините ЕУРОСУПЕР БС-95 и ЕУРОСУПЕР БС-98 се зголемуваат за 0,50 ден/лит. Малопродажната цена на ЕУРОДИЗЕЛ (Д-Е V) се зголемува за 1,00 ден/лит. Малопродажната цена на Мазутот М-1 НС се зголемува за 0,856 ден/кг и сега ќе изнесува 36,913 ден/кг. Од РКЕ напоменуваат дека ова се максималните цени на нафтените деривати од 00:01 часот на 4.11.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени. 
