Комисијата за хартии од вредност на Република Македонија на 65-тата седница со која претседаваше Претседателката на КХВ М-р Бујаре Абази, донесе Решение со кое на “АЛТА БАНКА" АД Белград, Р. Србија и се издава дозвола за давање понуда за преземање на "Стопанска банка” АД Битола. Понудата за преземање се однесува на 371.538 обични акции со право на глас издадени од "Стопанска банка” АД Битола, кои заедно со 19.439 обични акции со право на глас кои ги поседуваат преземачот и лицата со кој тој дејствува заеднички претставуваат 100% од нејзината основна главнина. Преземањето на хартиите од вредност ќе се врши по цена од 3.777 денари по акција. Според преземачот, понудата ќе се смета за успешна доколку биде прифатена од акционери кои поседуваат најмалку 273.795 обични акции кои претставуваат 70,03% од вкупниот број обични акции со право на глас издадени од ”Стопанска банка“ АД Битола. При тоа, преземачот и лицата кои дејствуваат заеднички со него би поседувале 75% плус една акција од вкупниот број обични акции со право на глас издадени од “Стопанска банка" АД Битола. На седницата што се одржа на 10 септември, 2025 година, Комисијата донесе Решение со кое на "ТТК Банка” АД Скопје и даде одобрение да ја издаде третата емисија на долгорочни должнички хартии од вредност по пат на приватна понуда. Предмет на понудата се 1.000 корпоративни обврзници на кои продажната цена им е еднаква на номиналната и се нудат по цена од 1.000 евра за обврзница. Вкупната вредност на понудата изнесува 1.000.000 евра. Рокот на достасување на обврзниците ќе изнесува 6 години, при што главницата ќе се исплати наеднаш, заедно со последната исплата на каматата на крајот на рокот на доспевање. Каматната стапка на капиталниот инструмент ќе изнесува 5% фиксна за целиот период, чија пресметка ќе се врши еднаш годишно во денарска противвредност сметано од денот на настанатиот прилив на парични срества во Банката. Првата исплата на каматата ќе започне по истекот на 12 месеци од денот на настанатиот прилив на парични средства во банката. Kупувачи на корпоративните обврзници се 14 физички лица и едно правно лице, сите од Република Северна Македонија. Исто така, КХВ по завршена јавна расправа го усвои Правилникот за видовите на високоликвидните финансиски инструменти во кои овластен депозитар може да ги вложува своите средства. Компанијата Макпрогрес од Виница издаде официјално соопштение за јавноста, доставувајќи нови детали во врска со неодамнешниот пожар што ја зафати фабриката. Сите што беа повредени и хоспитализирани се пуштени дома и се чувствуваат добро. Еден од пожарникарите останува и вечерва хоспитализиран и неговата состојба е добра и се следи од здравствените служби и од тимот за грижа на Макпрогрес. Кон крајот на месец Септември, Макпрогрес ќе организира настан за благодарност и солидарност каде ќе им укаже признанија на сите херои инволвирани во интервенцијата за гасење на пожарот. Надлежните институции интензивно работат на проценки за причините и последиците од пожарот и повторно се апелира да се почекаат на официјалните известувања од надлежните органи. Кризниот штаб на компанијата ги прави сите неопходни активности за да од понеделник, 15.09.2025 година, сите останати фабричките капацитети освен опожарените да бидат пуштени во редовна работа. Како сопственици и менаџмент секогаш биле поткрепа и поддршка за вработените. Денес сите вработени на Макпрогрес се сплотија и обединија во една визија, мотивација и желба за реобнова и повторно издигање на фабриката и почнаа со работа на средување, чистење и дезинфекција на производните капацитети како би можеле од понеделник да започнат со редовно производство. Компанијата успеа да се реорганизира со производните можности и од следната недела сите производи ќе ги има во достапни количини освен категориите Наполитан вафли и вафел барови Премиер, Вафрета и Алми за кои сеуште се бараат можности како најбрзо би можеле да се вратат во производство и на пазарите. Од компанијата бескрајно се благодарни на целата јавност за повиците на социјалните мрежи за поддршка на Макпрогрес и иницијативите за поддршка на компанијата преку купување на производите од индивидуалци, инфлуенсери, истакнати личности, како и за огромната поддршка од Стопанската Комора, клиентите, соработниците, партнерите, целата бизнис заедница, како и владата и повеќето институции. Овој амбиент на поддршка е силно мотивирачки компанијата да опстои во намерите да ја подигне Винчини во уште помодерна и поуспешна домашна индустрија. Компанијата ќе изврши трајно намалување од 10% на цените на 114 производи од брендовите Роки Винчини, Сончева Долина, Натура и Фантазија, како и акциско намалување на 12 производи од Винчини во висина од 10% за време на месец септември. Во следниве денови ова намалување треба да биде видливо во малопродажната мрежа. За Макпрогрес периодот што следи е период на опстанок на работните места и овие намалувања на цените се допринос кон вработените и потрошувачите кои ја даваат неизмерната поддршка. Отпочнаа со преговори за набавка на машини и опрема од неколку светски реномирани производители и во наредниот период се очекува да потпишување договори за набавка на опрема со цел обнова на фабричките капацитети. За денес е планирано потпишување договор за кредитно задолжување со цел отпочнување на ре-обнова на производните капацитети. Во понатамошниот период ќе следи и дополнително задолжување за набавка на машини и опрема за фабриката. Во петок, во Стопанската комора ќе се одржи средба со водечките ланци на маркети и пошироката бизнис заедница како би се презентирал план за ре-обнова и ќе се дискутира за можностите за поддршка од страна на малопродажбата во насока на поттикнување на поголема продажба на производите на Макпрогрес, но и обратно, како Макпрогрес да се вклучи во зголемување на соработката со маркетите а со цел задржување на сите работните места и задржување на животниот стандард на вработените. Вчера, на 9 септември 2025 година, во Стопанската комора се одржа работна средба со француската компанија Буиг (Bouygues). Високите претставници на компанијата изразија интерес и подготвеност на Буиг да учествува во изградбата на големи инфраструктурни проекти во Македонија, како изградбата на железницата и клиничките центри. Компанијата Буиг со диверсифицирано портфолио во секторите градежништво, енергетика, телекомуникации и медиуми, со над 50 милијарди евра обрт и 200.000 вработени во над 80 држави во светот, со себе носи големо искуство, знаење и доверба. Затоа, Стопанската комора на оваа средба ја изрази својата поддршка и помош за компанијата за започнување на активностите во Македонија. Домаќин на средбата беше Деловниот клуб за соработка со Франција и франкофонските земји, каде во присуство на францускиот амбасадор, Н.Е. Кристоф Ле Риголер и регионалниот претставник, шеф на економската мисија за ЗБ со седиште во Белград, Пјер Гранжуан, беше разговарано и за неколку други иницијативи за соработка со француските компании. За октомври е најавен регионален бизнис форум Франција-Западен Балкан во Белград, на кој се поканети и македонските компании. На средбата, Стопанската комора и Амбасадата на Франција во РС Македонија разговараа за можностите за продлабочување на економската соработка, унапредување на трговската размена меѓу двете земји, како и за поттикнување на директни инвестиции. Претседателот на Комората, Бранко Азески, истакна дека постои значаен потенцијал за заеднички проекти, и дека француските компании може да ја сметаат Комората и Деловниот клуб за свој партнер во Македонија. Комората активно работи на создавање поволна деловна клима, олеснување на административните процедури и поврзување на француските компании со домашни партнери. Данската фармацевтска компанија „Ново Нордиск“ најави голема трансформација на своето работење со цел да се насочи кон растот во секторите за дијабетес и дебелина. Оваа одлука ќе доведе до намалување на околу 9.000 работни места на глобално ниво, со што компанијата ќе се обиде да ја поедностави својата структура и да ги реинвестира заштедените средства во клучни области. Како што е објавено, околу 5.000 од предвидените намалувања на работни места се очекуваат во Данска. Со оваа реорганизација, „Ново Нордиск“ се надева на годишна заштеда од 8 милијарди дански круни до крајот на 2026 година, кои потоа ќе бидат пренасочени кон истражување и развој, како и кон комерцијални активности. Извршниот директор на компанијата, Мајк Даустдар, изјави дека оваа трансформација е неопходна поради зголемената конкуренција, особено на пазарот за третман на дебелина. „Нашите пазари се менуваат, особено во областа на дебелината, каде што конкуренцијата е посилна, а потребите на потрошувачите се сè поизразени. Компанијата мора да се развива со тоа“, истакна Даустдар. „Иако е тешко да се разделиме од талентирани колеги, убедени сме дека ова е вистинскиот чекор за долгорочниот успех на „Ново Нордиск“.“ Трансформацијата, исто така, ќе повлече еднократни трошоци за реструктурирање во износ од 8 милијарди дански круни, што ќе се одрази на очекуваниот раст на оперативната добивка за 2025 година. Според новите прогнози, оперативната добивка се очекува да порасне за 4-10%, за разлика од претходната проекција од 10-16%. Компанијата најави дека имплементацијата на планот ќе започне веднаш, со намера да ги извести погодените вработени во наредните месеци. Индексот на трошоците на животот во август 2025 година, во однос на август 2024 година, бележи зголемување од 4.4 %, а индексот на цените на мало бележи зголемување од 4.1 %. Инфлацијата мерена преку индексот на трошоците на животот во август 2025 година, во однос на јули 2025 година, изнесува 0.2 %. Зголемувањето на инфлацијата во август 2025 година, во однос на јули 2025 година, е резултат на зголемувањето на трошоците на животот во следните групи: Ресторани и хотели за 2.1 %, Мебел, покуќнина и одржување на домаќинствата за 0.7 %, Храна и безалкохолни пијалаци и Разновидни стоки и услуги за 0.6 %, Рекреација и култура за 0.3 % и Алкохолни пијалаци, тутун и наркотици за 0.1 %. Во август 2025 година, во однос на јули 2025 година, намалување на трошоците на животот е забележано во следните групи: Транспорт за 3.1 %, Облека и обувки за 0.6 %, Здравје и Образование за 0.1 %. Трошоците на животот во групите Домување, вода, електрика, гас и други горива и Комуникации остануваат на исто ниво како и во претходниот месец. Во петок, 12 септември 2025 година, претседателот на Стопанската комора Бранко Азески, ќе одржи состанок со ланците маркети, на кој ќе треба да се разговара каква форма на кампања ќе биде реализирана преку малопродажбата со цел засилена продажба на производите на Макпрогрес Виница, креатор на серија докажани и потврдено квалитетни брендови (Винчини, Сончева Долина, Натура, Дониа, Фантазиа) како и голем дел од производите кои се произведуваат под приватни трговски марки на водечките малопродажни ланци на маркети во Македонија. Идејата на ваквата заедничка обединета бизнис активност во организација на Комората, е во насока на поддршка на Макпрогрес по пожарот кој сериозно уништи дел од имотот, опремата и капиталот на фабриката, а имајќи ја предвид неговата извозна веќе докажана афирмација. Стимулирањето на зголемената домашна потрошувачка на производите на Макпрогрес според проекциите на менџаментот на Макпрогрес а во координација со активностите во Комората може да биде сериозна поддршка за обезбедување опстанок на фабриката, но најбитно и единствен начин за задржување на сите работници на работа во компанијата со што нема да се предизвика негативен ефект врз вработените и нивниот животен стандард. Концептот за идното работење на Макпрогрес, но и случувањата во саботата во фабриката, првиот човек на Макпрогрес, Глигор Цветанов лично ќе им го соопшти на присутните на состанокот во Комората во петок. Паралелно ако се следат масовните објави и повиците на социјалните мрежи за поддршка на Макпрогрес и иницијативите за акции на купување на нивните производи од различни индивидуалци, инфлуенсери, истакнати личности, за само два дена од случувањето на немилиот настан (пожарот што се случи во фабриката), може да се констатира дека станува збор за исклучително невообичаен настан, односно креирање таков позитивен амбиент во јавноста, што само ја потврдува големината и квалитетот на Макпрогрес како домашен македонски бренд за што менаџментот на компанијата изразува голема благодарност до сите оние кои деновиве несебично иницираат и даваат идеи за поддршка. И како што вели првиот човек на Макпрогрес Глигор Цветанов, „солидарноста која ја видовме деновиве, уште еднаш потврди дека Македонија знае да застане заедно кога е најтешко“. Од ноќеска на полноќ, цените на бензините и дизелот се зголемуваат за 1 денар по литар, одлучи денеска Регулаторната комисија за енергетика, водни услуги и услуги за управување со комунален отпад. Ова зголемување на цените е резултат на поскапувањето на нафтените деривати на светските пазари и падот на вредноста на денарот во однос на американскиот долар. Со оваа одлука, вкупните малопродажни цени на нафтените деривати се зголемуваат во просек за 0,46% во однос на претходната одлука. Нови цени кои ќе важат од 10.9.2025 година, од 00:01 часот: - ЕУРОСУПЕР БС-95 ќе се продава за 76,00 денари за литар. - ЕУРОСУПЕР БС-98 ќе чини 78,00 денари за литар. - ЕУРОДИЗЕЛ (Д-Е V) ќе има цена од 69,50 денари за литар. - Екстра лесното масло за домаќинство (ЕЛ-1) исто така се зголемува за 1 денар и ќе изнесува 69,00 денари за литар. За разлика од другите горива, цената на мазутот М-1 НС се намалува за 1,245 денари за килограм, новата цена ќе изнесува 37,148 денари за килограм. РКЕ напоменува дека овие цени се максималните дозволени цени. Трговците можат да формираат и пониски цени од утврдените, доколку така одлучат. Во голема акција за спроведување на законот, предводена од Службата за имиграција и царинска контрола на САД, речиси 500 лица се приведени на 4 септември во Џорџија. Операцијата, која вклучува повеќе федерални и државни агенции, е насочена кон компанијата Hyundai која е под истрага за илегални практики на вработување и други федерални кривични дела. Според извештајот на ICE, голем дел од приведените користеле визи за посетители, кои не дозволуваат право на работа во САД. Истрагата откри дека многумина од нив биле ангажирани и покрај тоа што нивниот визен статус им забранува да работат. Трамп истакна дека инвестициите од странство се добредојдени и дека САД ги охрабруваат компаниите „легално да ги доведат своите многу паметни луѓе, со голем технички талент“ за да создаваат производи од светска класа. Тој вети дека процесот за тоа ќе биде брз и легален. „Вашите инвестиции се добредојдени, и ве охрабруваме легално да ги донесете вашите многу паметни луѓе, со голем технички талент, за да создадете производи од светска класа, а ние ќе го направиме тоа брзо и легално возможно за вас. Она што го бараме за возврат е да ангажирате и обучувате американски работници. Заедно, сите ќе работиме напорно за да ја направиме нашата нација не само продуктивна, туку и пообединета од кога било досега“, напиша Трамп. 
