Економија

Бројот на странски туристи во Македонија се зголеми за 10 проценти во 2025 година

Државниот завод за статистика објави дека во декември 2025 година се регистрирани над 59 илјади туристи кои реализирале 112 илјади ноќевања. Бројот на ноќевањата го сочинуваат странските туристи со 57,6%, а 42,4% се домашни туристи. Во периодот јануари-декември 2025 година, во однос на истиот период од претходната година, вкупниот број на туристи е зголемен за 6,0%, односно кај домашните туристи има намалување за 2,2%, а кај странските има зголемување за 10,3%. Во периодот јануари-декември 2025 година, во однос на истиот период од претходната година, вкупниот број на ноќевања е зголемен за 0,8% така што кај домашните туристи има намалување за 4,1%, а кај странските има зголемување за 6,4%. Листата на земји од каде доаѓаат најбројните гости во декември ја предводи Турција со 7.303 туристи, по што следуваат соседните земји Бугарија со 5.214, Србија со 4.736 и Грција со 3.438 посетители.

„Интекар Глобал“ планира нова инвестиција од 20 милиони евра во Неготино

Компанијата „Интекар Глобал“, која е веќе етаблиран производител во индустриската зона Дуброво во Неготино, разгледува можности за нов инвестициски циклус вреден најмалку 20 милиони евра. Ова беше потврдено на денешната средба меѓу директорот на Дирекцијата за ТИРЗ, Гоце Димовски, и генералниот менаџер на компанијата, Махмутхан Келеш. Денешните разговори се надоврзуваат на дијалогот започнат во ноември годинава, со фокус на конкретни можности за проширување на производните капацитети. Директорот Димовски ги претстави владините приоритети и ја истакна целосната подготвеност за поддршка на компании кои реализираат проекти со висока додадена вредност. Тој потенцираше дека државата останува посветена на создавање предвидлив деловен амбиент за сите инвеститори кои придонесуваат кон економскиот раст. Генералниот менаџер Махмутхан Келеш ги презентираше досегашните резултати на „Интекар Глобал“ и ја образложи визијата за иден развој. Тој нагласи дека интересот за дополнително инвестирање се должи на потребата од продлабочување на соработката, но и на важноста од стабилна деловна средина и институционална поддршка за реализација на долгорочните планови. Компанијата „Интекар Глобал“ е еден од водечките производители во индустријата за кабли, со широк спектар на производи кои вклучуваат нисконапонски, среднонапонски, соларни и специјални кабли. Нивното работење е препознатливо по високите стандарди за квалитет, енергетската ефикасност и силниот акцент на технолошкиот развој. Оваа средба е дел од новиот концепт за активна комуникација со инвеститорите, со кој Дирекцијата за технолошки индустриски развојни зони преку партнерски однос цели кон отворање нови работни места и одржлив економски напредок на земјата.

Бензините поевтинуваат за еден денар, цената на дизелот останува иста

Регулаторната комисија за енергетика, водни услуги и услуги за управување со комунален отпад (РКЕ) донесе Одлука со која се врши намалување на малопродажните цени на нафтените деривати во просек за 1,18% во однос на одлуката од 19.12.2025 година. Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 2,899%, кај дизелот за 0,779%, кај екстра лесното масло за 5,006% и кај мазутот зголемувањето е за 0,964%. Курсот на денарот во однос на доларот во изминатиот период по кој беа формирани цените со претходната пресметка е понизок за 0,0166%. Од 23.12.2025 година од 00:01 часот максималните цени на нафтените деривати ќе изнесуваат: - Моторен бензин ЕУРОСУПЕР (БС-95) - 70,00 (денари/литар). - Моторен бензин ЕУРОСУПЕР (БС-98) - 72,00 (денари/литар). - Дизел гориво ЕУРОДИЗЕЛ (БС Д-Е V) - 64,50 (денари/литар). - Масло за горење Екстра лесно 1 (ЕЛ-1) - 63,50 (денари/литар). - Мазут (М-1 НС) - 32,607 (денари/килограм). Малопродажните цени на бензините ЕУРОСУПЕР БС-95 и ЕУРОСУПЕР БС-98 се намалуваат за 1,00 ден/лит. Малопродажната цена на ЕУРОДИЗЕЛ (Д-Е V) не се менува. Малопродажната цена на Екстра лесното масло за домаќинство на (ЕЛ-1) се намалува за 2,00 ден/лит. Малопродажната цена на Мазутот М-1 НС се намалува за 0,028 ден/кг и сега ќе изнесува 32,607 ден/кг. Од РКЕ напоменуваат дека ова се максималните цени на нафтените деривати од 00:01 часот на 23.12.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.

Владата потпиша договори од 100 милиони евра за изградба на фотонапонска електрана и ревитализација на хидроелектраните

Премиерот Христијан Мицкоски, најави нов голем инвестициски циклус во енергетскиот сектор вреден речиси 100 милиони евра. Со потпишувањето на договорите за реализација на фотонапонската електрана „Битола 3“ и за третата фаза од ревитализацијата на хидроелектраните, државата го зацврстува патот кон енергетска независност и стабилност. Вкупната вредност на овие стратешки проекти изнесува 97 милиони евра. Финансиската конструкција е обезбедена преку меѓународните партнери, при што 50 милиони евра од КФВ Банката се наменети за фотонапонската електрана „Битола 3“, додека дополнителни 37 милиони евра за истиот проект се обезбедени од Европската банка за обнова и развој (ЕБОР). Преостанатите 10 милиони евра се инвестираат во модернизација на хидропотенцијалите на земјата. Премиерот Мицкоски истакна дека енергетиката во современиот свет е прашање од суштинско значење за националната безбедност и економската конкурентност. Според него, сопствениот и стабилен енергетски систем е клучен предуслов за отпорност на економски и геополитички предизвици. Со изградбата на „Битола 3“, државата ќе ја намали зависноста од увоз и ќе се создадат услови за пониски трошоци на долг рок. Третата фаза од ревитализацијата на хидроелектраните има за цел да ја зголеми ефикасноста и да го продолжи работниот век на овие капацитети. Овие проекти се очекува да поттикнат дополнителен економски развој преку ангажман на домашната индустрија и отворање нови работни места.

Косините на автопатот Кичево-Охрид се стабилизираат со сложен инженерски зафат кој за првпат се изведува во регионот

Вицепремиерот и министер за транспорт, Александар Николоски, заедно со директорот на Јавното претпријатие за државни патишта, Коце Трајановски, и градоначалници од регионот, денеска извршија увид во градежните работи на автопатската делница Кичево-Охрид. Во фокусот на активностите е решавањето на најкритичните точки преку сложени инженерски зафати за стабилизација на косините и земјиштето кои досега не се применети во овој обем. Министерот Николоски најави дека на најтешкиот дел од трасата се применуваат иновативни методи кои се изведуваат за првпат во регионот. Тој објасни дека се работи на пробивање на планини каде косините достигнуваат висина од 100 до 200 метри, а земјиштето постојано се спушта кон главната траса. Вкупно се решаваат 16 косини, а на 14 од нив ќе бидат изградени таканаречени галерии од армиран бетон со кои буквално ќе се зацврсти целата планина за да се овозможи трајна стабилност. Директорот Коце Трајановски истакна дека на терен веќе се вршат интензивни подготовки за понатамошните градежни активности со цел поголем дел од автопатот да биде функционален и ставен во употреба за полесно патување до Охрид.

Алкалоид ќе ја заврши годината со приходи од над 335 милиони евра и рекорден извоз од над 220 милиони евра

Премиерот Христијан Мицкоски денеска ја посети фармацевтската компанија „Алкалоид“, каде заедно со генералниот директор Живко Мукаетов официјално ја пуштија во употреба новата микробиолошка лабораторија. Оваа капитална инвестиција од 3,1 милион евра е насочена кон зајакнување на контролата на квалитетот и зголемување на конкурентноста на компанијата на светските пазари. Новиот објект значително ги проширува капацитетите за микробиолошки анализи на суровини, полупроизводи и готови производи. Директорот Мукаетов објасни дека лабораторијата е опремена за извршување на над 20 илјади анализи годишно. Премиерот Мицкоски, изрази големо задоволство од она што го видел во компанијата, нагласувајќи дека ваквите македонски успешни приказни се најдобриот промотор на државата во светот. Тој истакна дека Владата секогаш ќе ги поддржува компаниите кои вложуваат во развој, посочувајќи дека во Алкалоид својата иднина ја градат над 3.000 вработени. Тој додаде дека фактот што две третини од портфолиото на компанијата се извезува, директно влијае врз растот на бруто-домашниот производ и на целокупното индустриско производство во земјата. И покрај бројните предизвици во текот на оваа година, Алкалоид бележи исклучителни деловни резултати. Мукаетов информираше дека 2025 година ја завршуваат со остварувања над планираното, постигнувајќи вкупни приходи од над 335 милиони евра и рекорден консолидиран извоз од над 220 милиони евра.

Од денеска цената на бензините се намалува за два денари

Регулаторната комисија за енергетика, водни услуги и услуги за управување со комунален отпад (РКЕ) донесе Одлука со која се врши намалување на малопродажните цени на нафтените деривати во просек за 1,08% во однос на одлуката од 15.12.2025 година. Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 6,021%, кај дизелот за 3,929%, кај екстра лесното масло за 3,168% и кај мазутот намалувањето е за 0,401%. Курсот на денарот во однос на доларот во изминатиот период по кој беа формирани цените со претходната пресметка е понизок за 0,6378%. Од денеска максималните цени на нафтените деривати ќе изнесуваат: - Моторен бензин ЕУРОСУПЕР (БС-95) - 71,00 (денари/литар). - Моторен бензин ЕУРОСУПЕР (БС-98) - 73,00 (денари/литар). - Дизел гориво ЕУРОДИЗЕЛ (БС Д-Е V) - 66,50 (денари/литар). - Масло за горење (Екстра лесно 1) - 65,50 (денари/литар). - Мазут (М-1 НС) - 32,635 (денари/килограм). Малопродажните цени на бензините ЕУРОСУПЕР БС-95 и ЕУРОСУПЕР БС-98 се намалуваат за 2,00 ден/лит. Малопродажните цени на ЕУРОДИЗЕЛ (Д-Е V), како и на Екстра лесното масло за домаќинство на (ЕЛ-1) и на Мазутот (М-1 НС) не се менуваат. Од РКЕ напоменуваaт дека ова се максималните цени на нафтените деривати од 00:01 часот на 19.12.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.

Бројот на посетители во театрите е зголемен за 20,5%, прикажани се вкупно 1.391 претстава

Според најновите податоци на Државниот завод за статистика за периодот 2024/2025 година, професионалните театри во земјава бележат пораст на прикажување претстави и привлекување на публика. Вкупниот број на прикажани претстави во професионалните театри е зголемен за 20,9% во споредба со претходната сезона, додека бројот на посетителите бележи пораст од 20,5%. Во 18 професионални театри биле изведени 871 дело со вкупно 1.105 претстави, кои ги виделе 198.756 посетители. Бројот на прикажани претстави во театрите за деца и млади во периодот 2024/2025 година е намален за 24,9%, а има намалување и на бројот на посетители за 30,9% во однос на сезоната 2023/2024. Во овие театри биле прикажани 163 претстави со вкупно 16.534 посетители. Кај аматерските театри е забележана позитивна динамика со зголемување и на бројот на претстави и на бројот на посетители. Во овие театри биле изведени 123 претстави пред публика од 16.846 граѓани. Кога ќе се сумираат сите театарски дејности (професионални, аматерски и за деца), вкупната бројка изнесува 1.391 претстава и 232.136 посетители. Во делот на музичко-сценската дејност, Националната филхармонија бележи пад на бројот на посетители во споредба со периодот 2023/2024 година, реализирајќи 38 концерти со 25.100 посетители. Професионалниот ансамбл за народни игри и песни бележи раст. Кај нив е евидентирано зголемување на бројот на самостојни приредби и концерти, кои во тековниот период достигнале бројка од 28 настапи со вкупно 19.920 посетители.

Николоски: Се работи на нов просторен план кој ќе понуди инфраструктурен концепт за развој на Македонија

Изработката на новиот просторен план на Македонија ќе понуди нов инфраструктурен концепт и ќе ги даде клучните насоки за долгорочен развој на државата, овозможувајќи бенефити за целокупното општество. Ова го истакна вицепремиерот и министер за транспорт, Александар Николоски, на настанот по повод 20 години постоење на Агенцијата за просторно планирање. Николоски потенцираше дека Агенцијата има централна улога во обликувањето на иднината на државата преку овој стратешки документ. Тој објасни дека Македонија, како природна крстосница меѓу Југоисточна и Централна Европа, мора максимално да ја искористи својата геостратешка положба на Коридорите 8, 10 и 10-д. Новиот план предвидува интензивен развој на автопатиштата, железничките поврзувања и формирање на мултимодуларни јазли, особено на вкрстувањето на двата клучни коридори. Министерството за транспорт, во рамки на стратешките политики на Владата, веќе работи и на изработка на современ софтвер за развој и управување со геопросторни податоци.

Netflix го купува Warner Bros за огромни 72 милијарди долари

Стриминг платформата Netflix објави дека постигнале договор за купување на медиумскиот гигант Warner Bros. Discovery (WBD) за проценета вредност од 72 милијарди долари. Со преземањето, Netflix добива контрола врз студијата, стриминг бизнисот и архивите на WBD, вклучувајќи ги највредните брендови како HBO, DC Comics (Batman, Superman), франшизата „Harry Potter“ и „Game of Thrones“. Зделката, која доби согласност од одборите на двете компании, предвидува WBD да го одвои својот оддел за традиционални кабловски мрежи (вклучувајќи ги CNN, TBS и TNT) во посебен субјект. Сепак, аналитичарите нагласуваат дека зделката ќе се соочи со строга антимонополска контрола од регулаторните тела во САД и ЕУ поради големата концентрација на содржина и моќ во рацете на Netflix. Netflix се обврза да го задржи кино-дистрибутерскиот бизнис на Warner Bros. и да продолжи прикажувањето на нивните филмови во кино.